Policija (14.05.20)

štwórtk, 14. meje 2020 spisane wot:

Wopity paduch popadnjeny

Budyšin. Twory w hódnoće nimale 500 eurow, mjez nimi wjacore elektriske graty, je paduch předwčerawšim w kupnicy na Drježdźanskej dróze w Budyšinje spakosćić chcył. Jako jeho sobudźěłaćer narěča a zadźerža, spyta 37lětny ćeknyć a wobaraše so, při čimž jeho lochko zrani. Najebać to muž skućićela dźeržeše, doniž policija njepřijědźe a jeho sobu njewza. Přewjedźeny alkoholowy test wunjese 1,74 promilow. Kaž policija zdźěli, běchu 37lětneho hakle njedawno z jastwa pušćili. Wčera su jeho hnydom zaso jatbowemu sudnikej předstajili.

Policija (13.05.20)

srjeda, 13. meje 2020 spisane wot:

Brónje a drogi namakali

Kamjenc. Specialne jednotki a Kamjenska policija su minjeny štwórtk při přepytanju bydlenja 28lětneho na Kamjenskej Hasy bratra a sotry Scholl wjacore brónje a drogi namakali. Nimo wjacorych pistolow běštej to tež prokawa (Armbrust) a zakazany wulki jednoručny nóž. Dale storčichu zastojnicy na dohromady 320 gramow drogow. Kaž policija zdźěli, jedna so přewažnje wo crystal meth. Našli su tež grat a dalše utensilije za braće drogow. 28lětneho su hišće na městnje zajeli. Hižo pjatk je sudnik za njeho přepytowansku jatbu postajił.

Policija (12.05.20)

wutora, 12. meje 2020 spisane wot:

Nimale kaž w krimiju

Policija (11.05.20)

póndźela, 11. meje 2020 spisane wot:

Njeborzdźeny do Audija

Porchow. Třo zranjeni a 30 000 eurow škody je bilanca sobotneho njezboža pola Porchowa. Kaž policija zdźěli, je 72lětny šofer Suzukija njeborzdźeny do Audija zrazył, kotryž chcyše dolěwa wotbočić. 72lětny so ćežko zrani. 36lětny šofer Audi­ja a jeho sobujěduca lochko.

VW do busa zrazył

Lejno. Pjatk stej w Lejnje VW Sharan a bus frontalnje do so zrazyłoj. Po in­forma­ci­jach policije je šofer VWja we wsy wjacore awta přesćahnyć chcył. Bilanca: 8 000 eurow škody a jedyn ćežkozranjeny.

Policija (08.05.20)

pjatk, 08. meje 2020 spisane wot:

Pjanej awto wodźiłoj

Pančicy-Kukow/Jěžow. Jězbu hnydom dweju šoferkow, kotrejž běštej wopitej z awtom po puću, je policija předwčerawšim popołdnju w Pančicach-Kukowje a w Jěžowje skónčiła. Na Dróze Ćišinskeho w Pančicach napadny zastojnikam při kontroli „chorhojčka“ 53lětneje šoferki Forda. Test wunjese 0,54 promilow. W Jěžowje zakazachu policisća 67lětnej dalejězbu. Test bě wujewił, zo měješe wona 1,34 promilow alkohola w kreji.

Policija (07.05.20)

štwórtk, 07. meje 2020 spisane wot:

Kontroluja škitne naprawy

Budyšin/Zhorjelc. Policija wokrjesaj Budyšin a Zhorjelc tele dny podpěruje, zwoprawdźenje wukazow škitnych naprawow koronawirusa dla pruwować. Kaž w zdźělence policije rěka, su zastojnicy tohodla w zjawnosći prezentniši, tež na dwurěčnych wsach Hornjeje Łužicy, a pruwuja zdobom pokiwy wobydlerjow. Wjetšina so po postajenjach ma. Wutoru pak dyrbjachu uniformowani wjacore razy zakročić a zetkanja rozpušćić.

Policija (06.05.20)

srjeda, 06. meje 2020 spisane wot:

Žanu rozbuchlinu njenamakali

Zhorjelc. W Zhorjelskim krajnoradnym zarjedźe mějachu so wčera z bombowym hroženjom rozestajeć, kotrež bě tam připołdnju dóšło. Po dorěčenju z policiju wšak zamołwići z konkretneho wohroženja njewuchadźachu. Přiwšěm je po­licija popołdnju dom na Dwórnišćowej z pomocu psow za schowanej rozbuch­linu přepytała, zdźěla zarjad. Namakała tam na zbožo ničo njeje, a dźěło na zarjedźe njebě zasadźenja dla wulce mylene, w nowinskej zdźělence dale rěkaše.

Njewšědne zasadźenje za policiju

Mortkow. Čorny ryćer je minjeny štwórtk w Mortkowje zasadźenje policije zawinił. Kaž wona hakle wčera zdźěli, bě wobydlerka nuzowe čisło woliła a zdźěliła, zo chcetej so maskěrowanej wosobje ze sekeru na tamnišu twjerdźiznu zadobyć. Zastojnicy na městnje zwěsćichu, zo jednaše so wo fotoshooting. 21lětny bě so zwonka areala w samopaslenym ryćerskim brónidle a kumštnej sekeru před twjerdźiznu fotografować dał.

Policija (05.05.20)

wutora, 05. meje 2020 spisane wot:

Wopity z awtom do štoma zrazył

Dobrošecy. Wěcna škoda 11 000 eurow, dospołnje skóncowany VW Polo a ćežko zranjeny šofer. To je wuslědk njezboža minjenu sobotu w Dobrošecach (Doberschütz) w Malešanskej gmejnje. 23lětny je tam pod wliwom alkohola ze swojim Polom po puću był, w křiwicy z dróhi zajěł a do štoma zrazył. Zražka běše po wšěm zdaću tak wulka, zo zleća VW wróćo na dróhu a motorowy blok so z jězdźidła pušći. Ćežko zranjeneho šofera dowjezechu do chorownje. Prěni test policije wunjese 1,44 promilow alkohola w kreji.

Policija (04.05.20)

póndźela, 04. meje 2020 spisane wot:

Dom so dospołnje wotpalił

Budestecy. Z dotal njeznatych přičin je so minjeny pjatk nawječor w Budestecach bydlenski dom wotpalił. Kaž policija zdźěla, bě něhdźe w 17 hodź. woheń w kólni na priwatnej ležownosći wudyrił a na dom kaž tež carport na susodnej ležownosći přeskočił. Třo wobydlerjo móžachu dom sčasom wopušćić. Domske, kólnja, carport a tam wotstajeny bydlenski wóz pak stachu so z woporom płomjenjow a so dospołnje wotpalichu. Zasadźeni wohnjowi wobornicy trjebachu wjac hač tři hodźiny, zo bychu woheń zhašeli. Škoda wučinja po prěnich trochowanjach wjac hač 100 000 eurow. Specialisća policije přičinu wohenja nětko dokładnje přepytuja.

Wałporna nóc měrna była

Policija (30.04.20)

štwórtk, 30. apryla 2020 spisane wot:

Na awtodróze prasnyło

Słona Boršć. Zranjeny šofer a dołhi rynk čakacych awtow bě wuslědk wobchadneho njezboža wčera wječor na awtodróze A 4 mjez Hornim Wujězdom a Słonej Boršću. Krótko po 20 hodź. zrazy Škoda z wulkej spěšnosću do transportera, kotrehož wodźer zhubi na to kontrolu nad wodźi­dłom. Wón zajědźe do lěweho wobhrodźenja a zwróći, na zbožo pak so njezrani. Wodźerja Škody dyrbjachu ­porno tomu do chorownje dowjezć. ­Awtodróha do směra na Zhorjelc bě hač do 22.30 hodź. zawrjena.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND