Policija (26.06.24)
Pjenježne dary pokradnyli
Wojerecy. Přewšo njekřesćansce su so njeznaći minjenu njedźelu popołdnju we Wojerowskej Janskej cyrkwi zadźerželi. Kaž policija zdźěli, wočinichu woni w času wot 12 do 17 hodź. jałmožnu a wzachu z njeje njeznatu sumu pjenjez. Nimo toho pokradnychu drjewjanu pišćel, z kotrejž su w cyrkwi dalše pjenježne dary zběrali a w kotrejž bě tohorunja njeznata suma pjenjez. Jeničce wěcnu škodu trochuje policija na 150 eurow.
Policija (24.06.24)
Dźěćo so při wohenju zraniło
Budyšin. Wuchowansku słužbu, wohnjowu woboru a policiju wołachu sobotu wječor na Einsteinowu w Budyšinje. Tu bě krótko po 19 hodź. w dźěćacej stwě bydlenja na pjatym poschodźe wjaceswójbneho domu woheń wudyrił. Płomjenja na meble přeskočichu. Kaž w rozprawje Zhorjelskeje policajskeje direkcije rěka, móžachu wobornicy woheń spěšnje zhašeć a tak dalšemu rozšěrjenju zadźěwać. Jědnaćelětneho hólca dyrbjachu podhlada zajědojćenja z kurom dla do chorownje dowjezć. Podružnicy dom samostatnje wopušćichu a móžachu po zakónčenju zasadźenja zaso do swojich bydlenjow. Jenož w potrjechenym bydlenju najprjedy raz nichtó bydlić njemóže. Wohenja a kura dla nasta w nim něhdźe 25 000 eurow škody. Při hašenju bě 14 kameradow Budyskeje powołanskeje wohnjoweje wobory zasadźenych a dźewjeć kolegow dobrowólneje wohnjoweje wobory Budyšin-centrum z dohromady pjeć wohnjowobornymi awtami.
Žiwjenje wuchował
Policija (19.06.24)
Bijeńca w Biskopicach
Biskopicy. K werbalnym a ćělnym rozestajenjam mjez skupinomaj młodostnych w starobje 18 do 23 lětami je njedźelu rano na Nowoměšćanskej dróze w Biskopicach dóšło. Chorobna słužba dowjeze šesćoch z nich, sylnych zranjenjow dla na dalše přepytowanja do chorownje. Pjeć młodostnych, z Němskeje kaž tež z Iraka a Libanona pochadźacych, wza policija k přepytowanjam na rewěr. Kak je k tomu dóšło, zastojnicy tuchwilu njewědźa.
Bydlenje so wotpaliło
Zhorjelc. Wobydlerjo wjaceswójbneho domu na Dróze Jamesa-von-Moltke w Zhorjelcu su sobotu popołdnju policiju kaž tež wohnjowu woboru na pomoc wołali. Z dotal hišće njeznatych přičin běše so na balkonje domu płunowy gril zapłomjenił a spěšnje wuhotowanje na balkonje, fasadu domu kaž tež wotpowědne bydlenje zapalił. Wohnjowym wobornikam poradźi so, woheń zhašeć a wobydlerjow wuchować. Wěcna škoda wučinja něhdźe 100 000 eurow. Bydlenje a balkon tuchwilu hižo wužiwajomnej njejstej.
Woheń zamiškrili
Kulow. Při lěsnej kupjeli běchu njeznaći srjedu popołdnju pod dubom woheń zamiškrili. Kedźbliwy wobydler tole wobkedźbowaše a policiju informowaše, rozprawjejo, zo spytaja młodostni za busowym zastanišćom pod dubom woheń zamiškrić. Na to přichwata wohnjowa wobora a palace so drjewo zhaša, kotrež njebě so na zbožo hišće na wokolne drjewo rozpřestrěło. Policajski rewěr we Wojerecach pad nětko přepytuje, byrnjež žanych podhladnych na městnje nadešli. Hač a kajka wěcna škoda je při wohenju nastała, tuchwilu hišće doskónčnje jasne njeje.
„Fan“ dyrbi do jastwa
Misnjene padustwo
Zbožo w njezbožu
Zhorjelc. Póndźelu připołdnju je w Zhorjelcu k njezbožu mjez Mercedesom a kolesowarku dóšło. 47lětny šofer awta chcyše při lětanišću naprawo na Girbigsdorfersku dróhu wotbočić a zrazy do kolesowarki, kotraž měješe předjězbu. Nazbožo so žona njezrani. Wěcny škoda wučinja 200 eurow. Koleso pak hižo jězbykmane njeje.
Po njezbožu so wotsaliła
Wojerecy. 62lětna wodźerka Opela je póndźelu we Wojerecach při wuparkowanju na dróze Liselotty Herrmann dróze do płotu zrazyła a jón masiwnje skóncowała. Wona pak městnosć njezboža po tym wopušći. Někotre hodźiny pozdźišo so pola policije přizjewi, zo by njezbožo zdźěliła. Wěcna škoda wučinja dohromady něhdźe 5 000 eurow. Wojerowski policajski rewěr pak pad njedowoleneho wotsalenja wot městnosće njezboža dla přepytuje.
Žiwy płót zapalili
Kamjenc. Njeznaći su sobotu na pózdnim popołdnju na Pobrjóžnej dróze w Kamjencu 20 metrow dołhi žiwy płót zapalili. Wohnjowa wobora woheń zhaša. Wěcna škoda wučinja 5 000 eurow. Kriminalna słužba přepytuje zapalerstwa dla.
Pod wliwom kokaina jěł
Čorny Chołmc. Po wobchadnej kontroli mjez Čornym a Nowym Chołmcom póndźelu w nocy su zastojnicy policije 39lětneho wodźerja Peugeota zadźerželi. Spěšny test na drogi pokazowaše na kokain w kreji muža. To dopokaza pozdźišo tež wobšěrne přepytowanje kreje. Nětko je jězdźer přestupjenja porjada dla wobskorženy.
Pytaja za 14lětnej
Běła Woda. Zastojnicy policajskeho rewěra w Běłej Wodźe pytaja hižo wot srjedy, 5. junija, za 14lětnej Ashley D. a proša ludnosć wo podpěru. Młodostna je šwižna, něhdźe 1,60 m wulka a waži 63 kg. Wona ma ćmowo-swětłe, napoł dołhe włosy a nosy nawoči. Prawdźepodobnje běše so wona naposledk pak čorny pulower a čorne cholowy abo běły pulower a zelene cholowy woblekła. Prošu podajće pokiwy na policiju w Běłej Wodźe pod čisłom 03576- 2620 abo na kóždym policajskim rewěrje we wašej wokolinje.
Tankownju wobškodźił a ćeknył
Budyšin. Dotal njeznaty šofer nakładneho awta je tydźenja štwórtk do tankowanskeho stołpa na wotpočnišću Hornja Łužica-juh při awtodróze A4 zrazył a potom wotjěł. Škoda wučinja něhdźe 1 000 eurow. Policija přepytuje njedowoleneho wotsalenja z městna njezboža dla.
W truskalcach „pobyli“
Kamjenc. Zastojnicy policajskeho rewěra w Kamjencu su w nocy na srjedu na polu pola Gelenauwa dweju pozdatneju paduchow truskalcow lepili. Swědkojo běchu jich informowali. Skućićelaj běštaj 72lětny muž a 71lětna žona. Měještaj bow při sebi, kotryž bě k třećinje z truskalcami pjelnjeny. Wobaj spytaštaj so před zastojnikami schować. Škoda za bura wučinja něhdźe 20 eurow.
Do mopeda zrazył
Mješicy. Njeznaty šofer wosoboweho awta je póndźelu rano w Bukečan gmejnskim dźělu Mješicach do mopeda zrazył, potom pak dale jěł. 19lětny młodostny běše z mopedom z Bukec do Mješic po puću. Před zachodom do wsy wón zaborzdźi. Tole za nim jěducy wodźer awta po wšěm zdaću přewidźa a do njeho zrazy. Młodostny so lochce zrani. Wěcna škoda na mopedźe wučinja 500 eurow.
