Policija (29.10.15)
Kača Korčma. Njerjany kónc měješe zawčerawšim wječor jězba 51lětneho wodźerja awta marki Volvo na wokrjesnej dróze z Kačeje Korčmy do Komorowa. Z dotal njeznateje přičiny zhubi wón krótko před Komorowom w prawej křiwicy kontrolu nad wodźidłom a zrazy do wobhrodźenja mosta nad hrjebju Kejžorskeho hata. Při tym so wobhrodźenje mosta dospołnje wottorhny. Kaž policija informuje, so muž njezrani, wěcna škoda pak je z 15 000 eurami dosć wulka. Specialna firma dósta nadawk, prowizoriske wobhrodźenje připrawić, zo njeby tam k dalšim njezbožam dóšło.
Policija (28.10.15)
Rušica. Kedźbliwy přichodny syn je minjene dny w Rušicy (Rauschwitz) pola Halštrowa sobudźěłaćerce hladanskeje słužby dopokazał, zo je padušnica. Dokelž běchu so z bydlenja jeho přichodneju staršeju po wšěm zdaću stajnje zaso pjenjezy zhubjeli, nastaji tam 58lětny tak mjenowane fotowe pasle. Na te wašnje wón padušnicu lepi, jako chcyše wona runje dalše pjenjezy spakosćić. 36lětna žona z hladanjom staršeju mandźelskeju direktnje ničo činić njeměješe, bě pak sej někak přistup do jeju bydlenja wobstarała. W prěnjej rozrěči z přichodnym synom wobkradnjeneju wona njeskutki přizna a mjenowaše pjenježne starosće jako přičinu, zo je wjacore razy z mjenowaneho bydlenja pjenjezy brała. Po informacijach 58lětneho přichodneho syna je so tak kusk po kusku dohromady wjace hač 1 500 eurow zhubiło. Hdźe su pjenjezy wostali, njeje znate. Minjene dny je muž policiji tónle pad přizjewił a tež hnydom padušnicu prezentował.
Policija (27.10.15)
Biskopicy. Operatiwny wotwobaranski centrum sakskeje policije přepytuje tuchwilu štyri pady, w kotrychž je dotal njeznaty kolesowar w Biskopicach nimo ćěkancow jěł a při tym do nich bił. Stało je so to minjene dny na Belmsdorfskej dróze blisko tamnišeje prěnjeje přijimarnje. Na zbožo so škodowani w starobje 22 do 25 lět njezranichu. Po tuchwilnych dopóznaćach je podhladny 25lětny muž, 180 centimetrow wulki a sylneje postawy. Woblečeny bě wón módre wupłokane jeansy a módry kabat z kapucu. Po puću bě z ćmowym kolesom ze žołtymi smuhami.
Policija (26.10.15)
Šešow. Z policiju honił je so w nocy na sobotu 14lětny mopedist. Zastojnikam bě jězdźidło w Njeswačidle napadnyło, dokelž njeměješe trěbne zawěsćenske znački, a chcychu młodostneho tuž kontrolować. Tón pak jim ćekny. Hakle w Šešowje móžachu jeho k zastaću pohnuć. Kontrola zdobom wujewi, zo njeměješe 14lětny nimo winowatostneho zawěsćenja scyła žanu jězbnu dowolnosć. Policija pad nětko dale přepytuje.
Tornow. Z dotal njeznateje přičiny je sobotu popołdnju na dróze mjez Čornym Chołmcom a Tornowom šofer Renaulta do kolesowarki zrazył a ju ćežko zranił. 75lětna kolesowarka bě do samsneho směra po puću. Dokelž při zražce padny a nachwilnje wědomje zhubi, dowjezechu ju najspěšnišo do chorownje. 80lětny šofer awta wosta njezranjeny. Njezbožowa słužba Zhorjelskeje policajskeje direkcije njezbožo přepytuje.
Policija (23.10.15)
Wjazońca. Z dotal njeznateje přičiny su so wčera popołdnju we Wjazońčanskej cwibakowej fabrice smaženske kachle zapalili. Kaž policija zdźěla, móžachu wšitcy sobudźěłaćerjo twornju dźěłarnje njezranjeni wopušćić. Wohnjowa wobora płomjenja spěšnje zhaša. Tež te, kotrež běchu so hižo do hale předrěli. Kriminalna policija je swoje slědźenja za přičinu wohenja na městnje zahajiła. Za čas hašenja wosta zwjazkowa dróha přez wjes zawrjena. Po prěnich trochowanjach wučinja škoda wjacore stotysac eurow.
Policija (22.10.15)
Porchow. Hnydom dweju paduchow awtow je policija wčera na awtodróze A 4 pola Porchowa lepiła a zajała. Při kontroli BMWja, kotryž bě do směra na Zhorjelc po puću, zwěsćichu zastojnicy mnoho dopokazow na jězdźidle w hódnoće wjac hač 50 000 eurow, zo bě wone pokradneje. 35lětneho šofera zajachu.
Krótko na to kontrolawachu zastojnicy w Zhorjelcu při hranicy k Pólskej čorny Audi A 5. Při tym so wukopa, zo je 33lětny šofer prawdźepodobnje pomocnik paducha BMWja był. Policja tež jeho zaja.
Policija (21.10.15)
Klětno. Na statnej dróze S 121 mjez Klětnom a Chrjebju-Nowej Wsu je wčera nawječor 46lětna wodźerka Nissana ćežko znjezbožiła. Kaž policija zdźěla, je wona z dotal njeznateje přičiny kontrolu nad wodźidłom zhubiła a zajědźe do přirowa, hdźež so z awtom přećisny. Ćežko zranjena šoferka běše w Nissanu tak jara zatłusnjena, zo dyrbješe ju Klětnjanska wohnjowa wobora z njeho wurězać, zo móhł jej nuzowy lěkar pomhać. Dróha mjez Klětnom a Chrjebju-Nowej Wsu bě dwě hodźinje zawrjena. Wěcna škoda na awće wučinja něhdźe 10 000 eurow.
Policija (20.10.15)
Njebjelčicy. Na statnej dróze S 94 mjez wotbóčkomaj Njebjelčicy a Pančicy-Kukow je dźensa rano krótko po sedmich k ćežkemu wobchadnemu njezbožu dóšło. Wodźer Nissana měješe po wšěm zdaću jara nuzne. Po tym zo bě małotransporter přesćahnył, jemu to njedosahaše, tak zo najebać napřećiwny wobchad tež hišće Seat přesćahny. Při tym pak so napřećopřijěduceho Hyundaija šmórny, zhubi kontrolu nad wodźidłom, zrazy do nabóčneho wobhrodźenja a zjědźe wróćo na jězdnju. Młoda šoferka Seata njemóžeše hižo doborzdźić a hišće lochce do Nissana storči. Při njezbožu so šofer Nissana ćežko zrani, wodźerka Hyundaija lochko. Wobeju dowjezechu do chorownje. Šoferka Seata poćerpje šok. Dobrowólnej wohnjowej woborje z Njebjelčic a Brěznje městno njezboža rumowaštej. S 94 bě něhdźe tři hodźiny mjez Pančicami-Kukowom a Njebjelčicami dospołnje zawrjena. Policija přepytuje mjeztym přećiwo zawinowarjej njezboža hrubeho zasahnjenja do nadróžneho wobchada dla. Wón bě sam přiznał, zo bě spěšnišo po puću był hač dowolene 100 km/h.
Policija (19.10.15)
Kulow. Z kolesom drje budźe nětko 41lětny muž z Kulowskeje wokoliny hišće tróšku dlěje jězdźić dyrbjeć. Jako jeho sobotu w nocy zastojnicy Wojerowskeje policajskeje direkcije na Budyskej hasy w Kulowje kontrolowachu, napadny jim nimo njewšědneho jězbneho stila tež „chorhojčka“. Test wujewi, zo měješe kolesowar 2,98 promilow alkohola w kreji.
Policija (16.10.15)
Lejno. Njewšědna hara bě to wčera rano na stanowanišću w Lejnom pola Wojerec při tamnišim jězoru. Z wulkim wrjeskotom je tam stanowanski připowěšak rozbuchnył. Wohnjowi wobornicy drje přichwatachu, wjele k hašenju pak hižo njemějachu. Připowěšak bě dospołnje zničeny. Na zbožo žane wosoby w nim njeběchu, kaž móžachu po prěnim wobhladanju městna wolóženi zwěsćić. Dalše připowěšaki na samsnym stanowanišću so njewobškodźichu. Wěcnu škodu trochuja na něhdźe 10 000 eurow.
