Policija (25.01.16)
Porchow. Njeměrny wječor mějachu minjeny pjatk wobornicy w Porchowje. Tam bě we wuhenju bydlenskeho domu woheń wudyrił. Mjeztym zo tam spočatnje jenož škrički k njebju stupachu, poł hodźiny po alarmowanju wobory hižo płomjenja z wuhenja sapachu. Nimale 50 kameradow z Porchowa, Hornjeho Wujězda a z Wulkeho Wosyka bě zasadźenych. Wětřika dla bě ćežko płomjenja podusyć. Zo móhli lěpje hašeć, wołachu tež hišće jězdźidło z wjerćitym rěblom Biskopičanskeje wohnjoweje wobory k pomocy. Saznik wobornikow při hašenju podpěrowaše. Hakle po třoch hodźinach bě woheń doskónčnje zhašeny. Zranił so na zbožo nichtó njeje.
Policija (22.01.16)
Słona Boršć. Na nuzniku awtodróhoweho wotpočnišća Hornja Łužica pola Słoneje Boršće je tamniši sobudźěłaćer zawčerawšim tobołku z wosobinskimi dokumentami a 500 eurami namakał. Sprawny namakar přepoda wšitko zastojnikam awtodróhoweje policije. Z dokumentami w tobołce wuslědźichu woni firmu w Litawskej, kotraž informowaše swojeho šofera. Tón ani hišće pytnył njebě, zo tobołu wjace nima. Nablaku so wón zawróći a sej ju pola policije wotewza.
Policija (21.01.16)
Rozwodecy. Hładke puće su wčera wječor w Hornjej Łužicy wjacore wobchadne njezboža zawinowali. Jedne sta so krótko do 23 hodź. na statnej dróze S 116 mjez Rozwodecami (Rodewitz) a Korzymjom. Tam zhubi wodźer Toyoty kontrolu nad swojim awtom, zrazy na prawym boku najprjedy do sćežora nadróžneho wobswětlenja a na to z lěwym bokom jězdźidła do štoma. Hakle přiwołana dobrowólna wohnjowa wobora móžeše muža z jězdźidła wuswobodźić. Jeho dyrbjachu zranjeneho do Budyskeje chorownje dowjezć.
Policija (20.01.16)
Cunnersdorf. Njeměrnu nóc mějachu wohnjowi wobornicy dźensa w nocy w Cunnersdorfje pola Kamjenca. Tam je so na priwatnej ležownosći carport palił a pod nim wosobowej awće. Płomjenja hrožachu samo na susodny bydlenski dom přeskočić. Wobornicy pak běchu spěšnje na městnje a móžachu tomu zadźěwać. Přiwšěm so awće dospołnje wupalištej. Problem bě, zo bě jedyn z podzemskich hydrantow zamjerznjeny. Poprawom je wodowy zastaraćel zamołwity, zo hydranty stajnje bjezporočnje funguja, wobydlerjo pak měli sobu na to dźiwać, zo njejsu wone zaparkowane. W zymskim počasu njeměli tež zasněžene być.
Policija (19.01.16)
Kinspork. Njeprošeny wopyt mějachu w nocy na njedźelu mějićeljo bydlenskeho domu w Kinsporku. W času wot 0.30 do 5 hodź. so tam njeznaći zadobychu a na delnim poschodźe wšitko přepytachu, mjeztym zo wobydlerjo na hornim poschodźe spachu. Pokradnyli su paduši digitalnu kameru, časnik a móšni. Škoda wučinja něhdźe 300 eurow.
Policija (18.01.16)
Wojerecy. Mało wjesela nad swojej rubiznu mějachu minjeny pjatk třo rubježnicy we Wojerecach. W nakupowanišću na industrijowej přestrjeni wutorhnychu woni 48lětnej žonje ručnu tobołku a so z njej zminychu. Při tym wjacorych ludźi namócnje nabok storčichu. Wonka pak woni tobołku preč ćisnychu. Snano bu jim nadobo wědome, što běchu runje skućili. Hłupe jeno, zo su z tobołku tež klučiki swojeho awta wotbyli. Z nim rubježna trójka tuž hižo ćeknyć njemóžeše. Wobydlerjej, kiž bě wšitko wobkedźbował, so poradźi jich dosahnyć a tak dołho zadźeržeć, doniž policija njepřijědźe. Mužow w starobje 20 a 30 lět kaž tež 35lětnu žonu zastojnicy zajachu.
Policija (15.01.16)
Mučow. Wobchadne njezbožo stało je so wčera krótko po 19 hodź. mjez Mučowom a Kulowom. 31lětna bě tam kontrolu nad wodźidłom Renaulta zhubiła a z dróhi zjěła. Při tym so awto zwróći a wosta na kromje puća ležo. Žona so na zbožo jeno snadnje zrani.
Policija (14.01.16)
Słona Boršć. Byrnjež šoferojo bencin a diesel tuchwilu za dosć přijomnu płaćiznu dóstali, to za někotrych wodźerjow awtow po wšěm zdaću hišće žana přičina njeje, swoju zličbowanku za tankowanje zapłaćić. Jeničce z dweju awtodróhoweju tankownjow při A 4 pola Słoneje Boršće su wot spočatka tohole lěta šěsć padow wobšudnistwa přizjewili. Škoda wučinja dohromady něhdźe 350 eurow. Zwjetša běchu skućićeljo za swoje awto pokradnjene čisła wužiwali.
Nowa Wjeska. W nocy na wutoru běchu so njeznaći do firmy w Nowej Wjesce při puću do Róžanta zadobyli. Pokradnyli su twarnišćowe radijo a akušrubowak. Cyłkownu škodu trochuja na 2 000 eurow.
Policija (13.01.16)
Wojerecy. Runje před klinikumom sta so wčera rano we Wojerecach wobchadne njezbožo. Rentnarjej staj tam pěši dróhu přeprěčiłoj. 41lětna wodźerka awta to po wšěm zdaću přepozdźe spózna, zajědźe do njeju a 80lětneho muža a 75lětnu žonu ćežko zrani. Jeju dowjezechu do bliskeje chorownje. Nětko pyta policija za swědkami, předewšěm za prěnjej pomocnicu, kotraž bě dźěćacu drastu jako podłohu pod hłowu přewostajiła.
Policija (12.01.16)
Běła Woda. Z padom nuzowanja w nadróžnym wobchadźe zaběra so wot zawčerawšeho policija w Běłej Wodźe. Na tamnišej statnej dróze S 126 do směra na Běłu Wodu bě so njedźelu wječor 18lětny wodźer Opela přewšo blisko před nim jěducemu VWjej bližił. Nimo toho zaswěći wón čerwjeno-žołte błyskate swěcy (Frontblitzer), na čož zawołachu sobujěducy VWja policiju a zdźělichu jej čisło Opela. Zastojnicy Běłowodźanskeho policajskeho rewěra młodostneho na to doma wopytachu. Wón policistam wumjetowane nuzowanje přizna a jim błyskate swěcy přewostaji. Hač změje to za 18lětneho šofera prawniske konsekwency, nětko pruwuja.
