Policija (31.01.18)
Njeznaći dwójce přišli
Njedźichow. Po tym zo běchu so njeznaći hižo minjenu sobotu do předawanišća napojow w Njedźichowje zadobyli, ale po wšěm zdaću ničo njepokradnyli, dyrbjachu mějićeljo wobchoda zawčerawšim rano zwěsćić, zo běchu tam zadobywarjo znowa pobyli. Tónraz pak bjez rubizny njewoteńdźechu, ale spakosćichu wobrazowce w hódnoće 500 eurow. Wěcna škoda wučinja porno tomu 3 000 eurow.
Motor wutwarili
Ochranow. Njewšědnu rubiznu wupytali su sej njeznaći na twarnišću Zinzendorfoweho gymnazija w Ochranowje. Tam wutwarichu a pokradnychu motor kružneje piły. Dokelž motor tajkeho typa nihdźe w poskitku njeje, mějićel swoju piłu hižo wužiwać njemóže. Škoda wučinja něhdźe 3 000 eurow.
Policija (30.01.18)
Wobydler zadobywanje njepytnył
Šěrachow. Nade wšo kruty spar měješe po wšěm zdaću w nocy na minjenu njedźelu wobydler wjaceswójbneho domu na Budyskej dróze w Šěrachowje. Hakle njedźelu dopołdnja wón zwěsći, zo běchu so njeznaći w nocy do toho do domu zadobyli, płót skóncowali, wjacore wokna a chěžne durje rozbili, jako so z nimi do twarjenja łamachu. Kaž přiwołani policisća pozdźišo zwěsćichu, běchu zadobywarjo w bydlenju w přizemju pobyli. Dokelž pak bě te runje njewobydlene, drje tam ničo pokradnyć njemóžachu. Wo wšěm tym wobydlerjo hornjeho poschoda ničo pytnyli njejsu. Načinjenu wěcnu škodu trochuje wobsedźer na něhdźe 2 000 eurow. Kriminalna policija so nětko z tymle padom bliže zaběra a spyta skućićelow wuslědźić.
Policija (29.01.18)
Wopiteho dwójce lepili
Budyšin. Hnydom dwójce je policija sobotu wječor w Budyšinje dospołnje wopiteho muža za wodźidłom awta lepiła. Při kontroli na Drježdźanskej dróze zwěsćichu pola 31lětneho 2,1 promil alkohola w kreji. Zastojnicy sej tuž jězbnu dowolnosć muža wobchowachu. Bórze na to so njepowučomny znowa do awta sydny a chcyše z nim wotjěć. Tónraz pak zastojnicy tež klučik awta sćazachu, zo bychu dalšej jězbje zadźěwali.
Policija (26.01.18)
Wupad miliny wužić chcyłoj
Mały Wjelkow. Cyle překlepani drje zdachu so być njeznaći, kotřiž chcychu so hižo minjeny pjatk, 19. januara, wječor do kupnicy při hłownym puću w Małym Wjelkowje zadobyć. W tym času tam mjenujcy runje žanu milinu njemějachu, tak zo spytachu zachodne durje z ruku wočinić. To pak so jim njeporadźi, a tak dyrbjachu z prózdnymaj rukomaj woteńć. Policija pyta nětko swědkow, kotřiž su wony dźeń w času wot 20.50 do 21.30 hodź. wosoby abo jězdźidła před kupnicu wobkedźbowali. Štóž je něšto widźał, njech přizjewi so pod telefonowym čisłom 03591/ 35 60.
Policija (25.01.18)
Wjelk do awta běžał
Hamor. Turbulentne dožiwjenje měješe wodźer transportera typa VW wčera rano na zwjazkowej dróze B 156. Wón bě krótko po 7.30 hodź. z Delnjeho Wujězda do směra na Hamor po puću, jako nadobo wotprawa wjelk na jězdnju stupi. Wodźer awta njemóžeše hižo borzdźić, tak zo dóńdźe k zražce z dźiwim zwěrjećom. Wone wosta na to zranjene na kromje dróhi ležo. Přiwołany skótny lěkar wjelka přewza, do toho pak jeho pohłuši, zo móhł jeho wotwjezć. Škoda na transporteru wučinja 500 eurow.
Policija (24.01.18)
Dobry čuch měli
Policija (23.01.18)
Šoferow kontrolowali
Družkecy. Hač wodźerjo awtow při wobchadnym znamjenju „STOP“ tež woprawdźe zastanu, je policija minjeny kónc tydźenja dwójce w Družkecach w gmejnje Dobruša-Huska kontrolowała. Tam stawaja so časćišo wobchadne njezboža, při kotrychž stej loni dwě wosobje žiwjenje přisadźiłoj. Jědnaće šoferow njeje znamješko tónraz wobkedźbowało.
Policija (22.01.18)
Woheń dom zničił
Mułkecy. Wšo druhe hač měrnje je so kónc tydźenja za dobrowólnych wohnjowych wobornikow wokoło Slepoho započał. W nocy na sobotu wołachu jich do Mułkec, hdźež bě woheń w jednoswójbnym domje wudyrił. Zranił so na zbožo nichtó njeje. Wobornicy z Miłoraza, Dźěwina, Brězowki, Slepoho, Rownoho, Mułkec a z Běłeje Wody běchu ze 14 jězdźidłami na městnje, zo bychu płomjenja zhašeli. Twarjenje so přiwšěm dospołnje zniči a njehodźi so hižo wobydlić. Škodu trochuja na wjacore dźesaćitysacy eurow.
Sebjemordarstwu zadźěwali
Policija (19.01.18)
Plantažu drogow namakali
Zhorjelc. Profesionelnje wjedźenu plantažu drogow je policija pola Zhorjelca wuslědźiła. Je to najwjetša tajka plantaža, kotruž su minjene lěta w Zhorjelskim a Budyskim wokrjesu zwěsćili. W pincy bywšeho běrowoweho kompleksa plahowaše 65lětny muž něhdźe 420 konopjowych rostlin. W dalšich rumnosćach wuhladachu sušene łopjena, kanistry z chemikalijemi a techniske nastroje k wjedźenju plantaže. Wšo dohromady maja namakane rostliny a drogi hódnotu wjace hač 10 000 eurow.
Policija (18.01.18)
Wobšudnicy zaso po puću
Kinspork/Wojerecy. Policija warnuje před wobšudnikami, kotřiž běchu minjene dny wokoło Wojerec a Kinsporka po puću. Tak zaklinkaštej w Kinsporku žonje při bydlenju 77lětneho a prošeštej, pola njeho směć na nuznik hić. Rentnar jej do bydlenja pušći. Jedna ze žonow zapleće muža do rozmołwy, mjeztym zo tamna za jeho móšnju pytaše. Z njeje wza sej třicyfrowu sumu pjenjez, a na to so žonje wotsalištej. Padustwo muž hakle pozdźišo pytny. Podobnje zeńdźe so 90lětnej we Wojerecach. Po tym zo bě wona durje wočiniła, při kotrychž něchtó zaklinka, ju njeznatej žonje k zemi storčištej. Z lěharnje pokradnyštej wonej na to debjenki w hódnoće něhdźe tysac eurow. Policija w tym zwisku warnuje cuzych do bydlenja pušćić. Wudawana nuzowa situacija je woblubowany srědk, předewšěm staršich ludźi wobšudźić.
