Awtowe kolesa w mobilu našli
Přiwčicy. Dobry čuch měješe póndźelu wječor zhromadna skupina sakskeje a zwjazkoweje policije, jako kontrolowaše na awtodróhowym parkowanišću při A 4 blisko Přiwćic w Litawskej přizjewjeny bydlenski mobil. W nim namakachu dohromady 60 zdźěla nowe kompletne awtowe kolesa w hódnoće něhdźe 20 000 eurow. Z camperom jěducaj mužej w starobje 33 a 42 lět njemóžeštaj rjec, zwotkel kolesa mataj. Po wšěm zdaću běštaj je něhdźe pokradnyłoj. Kriminalna policija pad nětko přepytuje.
Praskotaki na awto mjetali
Budyšin. Harowali a při tym tež hišće wosobowe awto wobškodźili su młodźi ludźo w nocy na njedźelu w Budyskej Strowotnej studni. Na Nagelowej mjetachu woni silwesterske praskotaki na VW Passat. Škoda na awće wučinja 2 000 eurow, kaž je to wobsedźer wobličił. Při prěnim přepytowanju wuslědźi policija třoch podhladnych muži w starobje 21, 22 a 29 lět. W bydlenju 29lětneho namakachu zastojnicy 315 praskotakow, kotrež njeběchu z wěstotnej značku BAM woznamjenjene, a sćazachu je.
Padušny porik lepił
Dobruša-Huska. 47lětny muž w Dobruši-Husce je sobotu dopołdnja padušny porik lepił a policiji přepodał. Jako wón nakupowane twory do domu donjese, steješe jeho pućowanska toboła pódla awta. 44lětna žona a 48lětny muž tobołu hrabnyštaj. Jako chcyštaj so wotsalić, jeju 47lětny lepi a zadźerža, doniž wobsadka policajskeho awta njepřijědźe.
Wjelk wopor njezboža
Krynhelecy. Wo mortwym wjelku na statnej dróze S 131 mjez Krynhelecami a Rychwałdom su wčera rano policiju informowali. Wobsadka policajskeho awta so na městnje wo tym přeswědči, nihdźe pak njebě awto, kotrež bě do wjelka zajěło. Hakle pozdźišo přijědźe wodźer VWja, kiž bě po zražce z rubježnym zwěrjećom najprjedy dale jěł. Dokelž wone na puću ležeše, móžeše so jemu wodźer motorskeho runje hišće tak wuwinyć. Mortweho wjelka přepodachu sobudźěłaćerjam krajnoradneho zarjada. Wodźer VWja změje so nětko wotsalenja z městna njezboža dla zamołwić.
Pjenjezy kradnył
Budyšin. Njeznaty muž je rentnarjomaj zawčerawšim w Budyšinje 40 resp. 60 eurow pokradnył. Wón bě jeju prosył, jemu dwaj euraj zaměnić. Žona w swojej móšni drobne pjenjezy njeměješe, tak zo jeje mandźelski ze swojeje wupomha. Pozdźišo pytnyštaj, zo jimaj pjenjezy faluja.
W zahrodowych domčkach kradnyli
Budyšin. Do 15 zahrodowych domčkow při Budyskej Müntzerowej su so njeznaći w nocy na minjenu póndźelu zadobyli. Pokradnychu z nich wšelake elektriske nastroje, alkoholiske napoje kaž tež wozyčk. Nimo toho skóncowachu z motorskej piłu třěchu bungalowa a rozbichu studnjowu rynku. Hódnota pokradnjenych wěcow wučinja 500 eurow, wěcna škoda pak wjace hač 4 000 eurow.
Wodźerce awta žiwjenje wuchowali
Tyhelk. Prěni pomocnicy su wčera rano znjezboženej žonje po wšěm zdaću žiwjenje wuchowali. Wobchadne njezbožo sta so na wokrjesnej dróze mjez Tyhelkom a Bórkom blisko Wojerec. 32lětna wodźerka VWja bě tam z dotal njeznateje přičiny w lěwej křiwicy na prawy bok jězdnje zajěła a z awtom zwróćiła. Při tym započa so jězdźidło palić. Prěnim pomocnikam so poradźi, žonu z awta wućahnyć a płomjenja podusyć. Wuchowanska słužba dowjeze snadnje zranjenu do chorownje. Nastata wěcna škoda na VWju wučinja něhdźe 8 000 eurow.
Rubježnika z drogami lepili
Běła Woda. W kupnicy na Budyskej dróze chcyše sobotu popołdnju młody muž twory sobu wzać, bjez toho zo bě je zapłaćił. Předawarka spyta muža zadźeržeć, wón pak ju nabok storči a ćekny z kolesom. Žona so snadnje zrani. Muža wuslědźi policija pozdźišo w jeho bydlenju, hdźež namakachu drogi.
Pod wliwom drogow jěła
Budyšin. Wobsadka policajskeho awta je zawčerawšim wječor na Budyskej Beethovenowej wosobowe awto typa VW a jeho wodźerku kontrolowała. Drogowy test wunjese, zo bě 28lětna po wšěm zdaću canabis k sebi brała. Na to přikazachu kontrolu kreje młodeje žony. Wobkrući-li so podhlad, dyrbi wona znajmjeńša 500 eurow pokuty płaćić, nimo toho měsac nóžkować a dóstanje dwaj dypkaj w Flensburgu. W najhóršim padźe žonje dopokazaja, zo wona dołhodobnje wodźenju awta kmana njeje.
Pěšk so ćežko zranił
Budyšin. Ćežke wobchadne njezbožo je so wčera wječor w Budyskej Strowotnej studni blisko Röhrscheidtoweje kupjele stało. Tam chcyše 35lětny muž něhdźe w 17 hodź. dróhu přeprěčić, jako wosobowe awto typa Audi přijědźe. Jeho 25lětny wodźer njemóžeše zražce hižo zadźěwać a do muža zajědźe. 35lětny so při tym ćežko zrani. Jeho dyrbjachu z helikopterom do Drježdźanskeje chorownje transportować. Na wosobowym awće nasta něhdźe 2 500 eurow škody. Policija zawěsći na městnje wšelake slědy. Přiwšěm pytaja swědkow, kotřiž su wobchadne njezbožo snano wobkedźbowali. Tući njech so pod telefonowym čisłom 03591/ 36 70 přizjewja.