Policija (20.06.16)
Do chorobneho awta zajěł
Wojerecy. Dokelž njebě předjězbu wobkedźbował, je minjeny pjatk 59lětny wodźer Renaulta we Wojerecach na křižowanišću Heinowa/Kamjentna do chorobneho awta zrazył. Jeho 52lětny wodźer a 26lětna sobujěduca so při tym snadnje zraništaj. Na zbožo njebě žadyn pacient w awće. Wěcnu škodu trochuja na něhdźe 15 000 eurow. Při wobdźěłanju njezboža napadny policistam „chorhojčka“ 59lětneho, tak zo přewjedźechu pola njeho alkoholowy test. Tón wunjese 2,52 promilow, a to krótko do 14 hodź. Jězbnu dowolnosć muža sej zastojnicy hnydom zdźeržachu.
Policija (17.06.16)
Spódnja drasta fuk
Budyšin. Na Weigangowej w Budyšinje bě minjene dny po wšěm zdaću lubowar abo lubowarka žonjaceje spódnjeje drasty po puću, a to nic jenož jónu. W nocy na srjedu je něchtó z balkona bydlenja w přizemju dwaj sportowej nadrowcaj (BH) pokradnył. Trěnja a jeansy, kotrež běchu runje tak wupłokane a tam wisachu, pak so paduchej najskerje tak njelubjachu. 34lětna wobsedźerka zawoła policiju a zastojnikam při tej składnosći zdźěli, zo bě na samsne wašnje před něhdźe dwěmaj tydźenjomaj hižo raz šěsć ćmowych spódnich cholowčkow zhubiła. Policija chce nětko za skućićelom pytać. Hač pak jeho abo ju z pomocu kontrolow dosahnu, je skerje dwělomne.
Policija (15.06.16)
Kopor požadany był
Njeswačidło. Před paduchami kopora su jednoswójbne domy runje tak mało wěste kaž cyrkwje. Mjez skućićelemi wosebje woblubowane su twarnišća, na kotrychž kónc tydźenja nichtó njedźěła, tak zo njejsu dlěši čas wobstražowane. Minjene dny běchu sej paduši wupytali bywše Njeswačanske šulske twarjenje při hrodowym parku. Wulki dom tuchwilu na bydlenja z wobstajnym hladanjom přetwarjeja. Tam pokradnychu něhdźe 90 metrow koporowych rołow z wotpowědnej izolaciju. Nimo toho so z twarnišća dalše twaršćizny zhubichu, kaž Zhorjelska policajska direkcija w nowinskim wozjewjenju zdźěli. Pjenježna hódnota wučinja něhdźe štyricyfrowu sumu. Kriminalna policija nětko za paduchami kopora pyta.
Policija (14.06.16)
Dowolnosć sfalšował a drogi brał
Porchow. Dobry čuch mějachu policisća dźensa w nocy, jako kontrolowachu na awtodróze A 4 pola Porchowa 34lětneho pólskeho staćana, kiž bě z Audijom A 3 po puću. Zastojnikam napadnychu na nim njeho čerwjenej woči a nerwozne zadźerženje. Z pomocu awtodróhoweho policajskeho rewěra přewjedźechu drogowy test, kiž wunjese, zo bě muž kokain a amfetaminy brał. Jako sej jeho jězbnu dowolnosć wobhladachu, zwěsćichu, zo bě ta sfalšowana. Nětko změje so 34lětny potajkim hnydom štyrjoch deliktow dla zamołwić: jězdźenje pod wliwowom drogow a bjez jězbneje dowolnosće, přeńdźenje přećiwo drogowemu zakonjej a falšowanje dokumentow.
Policija (13.06.16)
Z motorskim znjezbožił
Salow. Tragiski wukónc měješe wobchadne njezbožo sobotu popołdnju mjez Salowom a Koćinu. Napřećo přijěduceho VWja dla dyrbješe 43lětny wodźer motorskeho zaborzdźić. Při tym zhubi kontrolu nad swojim jězdźidłom, padny a bu wot VW přejědźeny. Motorski so tak jara zrani, zo na městnje njezboža wudycha. 42lětny šofer VWja wosta njezranjeny.
Policija (10.06.16)
Frontalnje do so zrazyłoj
Rychbach. Tragiski wukónc měješe wobchadne njezbožo wčera popołdnju na zwjazkowej dróze B 6 pola Rychbacha. Tam bě wosobowe awto typa Kia do směra na Lubij po puću. Z dotal njeznateje přičiny zhubi jeho 37lětny šofer kontrolu nad wodźidłom a zajědźe na napřećiwnu jězdnju. Tam přijědźe jemu VW Tiguan napřećo, kotrehož 30lětny šofer frontalnej zražce hižo zadźěwać njemóžeše. Za nim jěducy VW Polo móžeše hišće w prawym času zastać. Při zražce so wodźer Kije tak ćežko zrani, zo hišće na městnje njezboža zemrě. Wodźerja Tiguana dowjezechu zranjeneho do chorownje. Šofer Pola so njezrani, jeho 27lětneho sobujěduceho ambulantnje zastarachu. Zasadźenych bě něhdźe 20 wohnjowych wobornikow z Rychbacha a Za- łomja, kotřiž zemrěteho z dospołnje skóncowaneho awta wućahnychu.
Policija (09.06.16)
Na nabóčnej čarje A 4 wróćo jěł
Słona Boršć. Na awtodróze A 4 je zawčerawšim w pólskej přizjewjeny Ford Focus na nabóčnej čarje k Słonoboršćanskemu wotpočnišću wróćo jěł. Strašny a njedowoleny manewer njewosta wězo njewobkedźbowany. Wobsadka policajskeho jězdźidła awto krótko na to kontrolowaše. W nim sedźacaj ruskaj staćanaj w starobje 27 a 38 lět měještaj jenož w Pólskej registrowane azylowe dokumenty při sebi. Awto bě na lěwym boku wobškodźene. Najskerje běštaj mužej wot městna njezboža twochnyłoj.
Policija (08.06.16)
Ćeknyć mužej njepomhało
Běła Woda. Do wjacorych železnych nadróžnych zawěrow a do sćěny domskeho je 62lětny muž ze swojim Toyotu zawčerawšim wječor na Berlinskej dróze w Běłej Wodźe zrazył. Na to wón z awtom z městna njezboža ćekny. Dokelž pak bě při zražce jedne ze swojeju awtoweju čisłow zhubił, jeho policisća spěšnje wuslědźichu a doma wopytachu. Při alkoholowym tesće zwěsćichu pola 62lětneho nahladne 2,9 promilow alkohola w kreji. Jězbnu dowolnosć jemu zastojnicy na městnje sćazachu. Muž změje so nětko wohroženja wobchada a ćeknjenja z městna njezboža dla zamołwić.
Policija (07.06.16)
Hólčec z kolesom padnył
Kašecy. Ćežko zranił je so jědnaćelětny hólc wčera nawječor na wokrjesnej dróze mjez Kašecami a Wotrowom. Z kolesom po puću do směra na Wotrow zajědźe wón něhdźe we 18 hodź. z jězdnje na kromu puća a tak njezbožownje padny, zo z hłowu na puć zrazy. Ćežko zranjeneho dowjezechu jeho z helikopterom do Drježdźanskeje chorownje. Policija pad přepytuje. Dróha bě něhdźe poł hodźiny do wobeju směrow zawrjena.
Na rentnarja z hałzu šoł
Wojerecy. Maličkosće dla je zawčerawšim wječor na kołopuću při Šibojskim jězoru k rozestajenju mjez mužomaj dóšło. 76lětny rentnar bě tam ze swojim psom po puću, jako jeho krótko do 18 hodź. zahrodowy susod nadpadny, kaž policija zdźěli. Wón seniorej najprjedy werbalnje hrožeše a jemu na to z hałzu na hłowu biješe. Při tym poćerpje wopor krawjacu ranu, kotruž dyrbjachu ambulantnje zastarać. Přičina nadpada bě po wšěm zdaću rozdźělne měnjenje wo parkowanskim porjedźe w zahrodnišću. Tole je nětko pad za kriminalnu policiju, dokelž jedna so wo zranjenje ćěła.
Policija (06.06.16)
Howjadźe zatřělić dyrbjeli
Lejno. Minjeny pjatk w Prawoćicach ćeknjenej howjadźe su sobotu připołdnju pola Lejna zatřělić dyrbjeli. Runje tak kaž pjatk wječor so tež nazajtra poradźiło njebě skoćeći popadnyć. Tež wjacori přiwołani skótni lěkarjo njezamóchu jej změrować. Dokelž njehodźeše so wuzamknyć, zo móhłoj wonej za ludźi strašnej być, so z krajnoradnym zarjadom a wobsedźerjom dorozumichu jej zatřělić, štož wukubłany hajnik wobstara. Wobsedźer howjadźe wotwjeze.
