Policija (27.08.25)
Chwalba wobhladniwym staršim
Kulow. Póndźelu rano je wobydlerska policistka na Nowowješćanskim puću před Krabatowej zakładnej šulu w Kulowje wobchad přijězdźowacych staršich přepruwowała. Kontrolowała je wona wosebje, hač starši wobchadne předpisy kaž zakaz parkowanja abo zastaća dodźerža a hač su dźěći w awtach připasane. Wuslědk policistki: Hač na jeničke přeńdźenje su wšitcy starši wobchadne předpisy dodźerželi.
Alkohola dla znjezbožił
Klukš. 33lětny šofer je póndźelu nawječor w něhdźe 21.30 hodź. ze swojim wosobowym awtom typa VW Golf na dróze S106 blisko Słoneje Boršće znjezbožił. Do směra Rakec jěducy běše tam pozdatnje přespěšnje po puću. Tohodla je před kružnym wobchadom z jězdneje zjěł a do wobchadneho znamjenja zrazył. Při tym so awto na bok zwróći. Policija zwěsći 0,96 promilow alkohola pola muža. Wona je jeho mjeńšich zranjenjow dla do chorownje dowjezła. Budyska wobchadna słužba pad přeńdźenja wohrožowanja wobchada dla přepytuje. Wěcna škoda wučinja po prěnim posudku dohromady 5 000 eurow.
Policija (26.08.25)
Fake-powěsće policije w medijach
Zhorjelc. Zastojnicy policajskeje direkcije w Zhorjelcu su zwěsćili, zo rozšěrjeja so tuchwilu w socialnych medijach falšowane zdźělenki policije, kotrež wěrnosći njewotpowěduja. Wjacore facebook-skupiny rozprawjeja wo zhubjenej sydomlětnej Lizy Vogel w Budyšinje, za kotrejž policija z psami a helikopterami pyta. Powěsć je „fake“ – njewěrna. Wobšudźerjo tajke zdźělenki wužiwaja, zo bychu sensibelne daty wužiwarjow dóstali. We wobłuku wopačneho přinoška běchu čitarjow mjez druhim namołwjeli, zo swoje facebookowe daty zapodadźa. Policija naležnje namołwja, zo čitarjo wopačnu powěsć njedźěla a swoje daty njezapodadźa.
Policija (25.08.25)
Z awtom na třěchu so zwróćiła
Rěčicy. 19lětna młodostna je sobotu wječor na zwjazkowej dróze B115 w Rěčicach (Rietschen) znjezbožiła. Po puću do směra Stanojšća (Stannewisch) zhubi wona w křiwicy kontrolu nad swojim jězdźidłom a zjědźe z jězdnje. Awto so přewali a wosta na třěše ležo. Šoferka so jenož lochce zrani. Wěcna škoda wučinja něhdźe 10 000 eurow.
Twarske graty pokradnyli
Połčnica. Njeznaći su so kónc tydźenja na twarnišćo při Dr. Wilhelma Külzowej dróze w Połčnicy zadobyli. Skućićeljo pokradnychu w bydlenjach a pincach nowotwara twarske graty a dalše nastroje w cyłkownej hódnoće 1 500 eurow. Kriminalna słužba Kamjenskeho policajskeho rewěra podawk přepytuje.
Młodostny z motorskim znjezbožił
Jenkecy. Młodostny běše sobotu dopołdnja ze swojim motorskim marki Suzuki na zwjazkowej dróze B 6 w Jenkecach po puću dele. Jako před nim jěducy 33lětny šofer ze swojim wosobowym awtom marki VW njejapcy horu dele zaborzdźi, zrazy 19lětny ze swojim motorskim do awta. Při tym so lochce zrani. Chorobna słužba jeho do chorownje dowjeze. Wěcna škoda wučinja něhdźe 3 000 eurow.
Policija (22.08.25)
Tójšto smalakow lepili
Njebjelčicy. Srjedu je wobchadna policija na dróze S100 bjezposrědnje při křižowanišću mjez Jaworu a Miłoćicami spěšnosć wobchada měriła. Wot dohromady 617 pruwowanych jězdźidłow je 41 awtow předpisanu spěšnosć 70 km/h překročiło. Wot tutych dyrbi 18 šoferow warnowanski pjenjez a 23 chłostanski pjenjez zapłaćić. Najspěšniši smalak bě ze 112 km/h po puću. Na njeho čaka pjenježna pokuta we wysokosći 200 eurow. Wot 53 přepruwowanych nakładnych awtow njejsu tři předpisanu spěšnosć dodźerželi.
Policija (21.08.25)
15lětny mopedist ćežko zranjeny
Budyšin. K ćežkemu wobchadnemu njezbožu je wutoru wječor na Drježdźanskej dróze w Budyšinje dóšło. 42lětny chcyše ze swojim wosobowym awtom nalěwo k tankowni wotbočić, přewidźa pak přichadźaceho 15lětneho mopedista a do njeho zrazy. Młodostny so ćežko zrani. Wuchowanska słužba dowjeze jeho z helikopterom do kliniki. Wěcna škoda wučinja něhdźe 13 000 eurow. Policija prosy swědkow wo nazorniše informacije wo njezbožu. Tući njech so telefonisce pod čisłom 03591 3670 přizjewja.
Předjězbu njewobkedźbował
Pančicy-Kukow. 70lětny šofer awta typa Opel je wutoru dopołdnja na Dróze Ćišinskeho w Pančicach-Kukowje do přichadźaceho awta typa Mitsubishi zrazył, jako chcyše z wujězda na dróhu wotbočić. Nichtó so zranił njeje. Wěcna škoda wučinja něhdźe 7 000 eurow.
Policija (20.08.25)
Padustwo z hórkej konsekwencu
Zhorjelc. 50lětny muž je sej póndźelu w Zhorjelskim nakupowanišću konserwu mjasa do zaka tyknył a chcyše wobchod bjeze zapłaćenja wopušćić. Jako jeho předawar narěča, skućićel padustwo přida, potom pak twochny. Bórze policisća ćěkaceho lepichu. Jako zastojnicy jeho personalije přepruwowachu, zwěsćichu, zo pólski staćan prawo na zapućowanje a přebywanje w Němskej nima. Sudnik postaji na próstwu statneho rěčnistwa přepytowansku jatbu za njeho. Skućićel přebywa nětko w Zhorjelskim jastwje.
Policija (19.08.25)
60lětny ćežce znjezbožił
Hamor. 60lětny šofer je ze swojim awtom typa VW Golf na zwjazkowej dróze B 156 wutoru rano ćežce znjezbožił. Blisko Hamora je wón njejapcy na prawu kromu chódnika zajěł, so nastróžił a kontrolu nad swojim jězdźidłom zhubił. Poměrnje spěšnje je do lěsa na prawym boku jězdneje wujěł, do štoma zrazył a so z awtom přećisnył. Dohromady 20 čłonow wohnjoweje wobory je z pomocu ćežkeje techniki, w awće zatłusnjeneho šofera wuswobodźiło. Helikopter je jeho do chorownje dowjezł. Wěcna škoda wučinja po informacijach policije 23 000 eurow.
Policija (18.08.25)
Lěs blisko Wojerec so wospjet palił
Wojerecy. Sobotu dopołdnja a popołdnju mějachu wohnjowi wobornicy wospjet lěs blisko Ćiska bjezposrědnje při zwjazkowej dróze B96 hašeć. Nichtó so zranił njeje. Policija je přepytowanja njekedźbliweho zapalerstwa dla zahajiła.
Policija (14.08.25)
Wosobowe awto zatłusnjene
Budyšin. Na zbožo bjez zranjenych, za to pak z tójšto wěcnej škodu je so wobchadne njezbožo wutoru na awtodróze A 4 mjez Wósporkom a Budyšinom skónčiło. Tam chcyše nakładne awto druhe jězdźidło přesćahnyć a zajědźe na lěwu jězdnju. Tam pak jědźeše runje w tym wokomiku Škoda Octavia, kiž bě něhdźe 180 km/h spěšny. Tón bu ze swojim 46lětnym wodźerjom mjez srjedźnym wobhrodźenjom a nakładnym awtom zatłusnjeny. Škoda na Octaviiji wučinja něhdźe 15 000 eurow škody, kaž policija rozprawja.
Policija (12.08.25)
Paduši miłu nóc wužili
Njedźichow. Jako sej wobydlerjo w Njedźichowje w nocy na njedźelu wonka miłu lětnju nóc za wočerstwjenje wužichu, so do jich bydlenja na Kulowskej dróze paduši zadobychu. Kaž policija rozprawja, pokradnychu skućićeljo sportowu tobołu, šmóratko a móšeń z 200 eurami. Dohromady naparachu 700 eurow škody. Wěcna škoda nastała njeje.
