Policija (10.12.24)
Wulka akcija policije praskotakow dla
Kamjenc. Dotal njeznaći su njedźelu popołdnju w bydlenju a na balkonje w domje na Kamjenskej Fichtestraße z praskotakami a hudźbu telko hary „nadźěłali“, zo wjacori susodźa policiju informowachu. Policisća spytachu z 20lětnym podružnikom bydlenja rěčeć, tón pak jich wohrožowaše naspomnjo, zo ma brónje, z kotrymiž chce so wobarać, je-li do bydlenja zastupja. Policisća zapodachu wozjewjenje přeńdźenja dla a wotsalichu so. Hižo wječor pak ze susodstwa znowa zdźělenku wo sylnej harje praskanja dla kaž tež wo harowacych pjanych wosobach w bydlenju dóstachu. Policistow přewodźachu tónraz wohnjowa wobora a wuchowanska kaž tež specialna słužba. Po diskusiji wotewrě młodostny podružnik zastojnikam durje do bydlenja. Tam pak ani brónje ani dalše wosoby nadešli njejsu.
Policija (09.12.24)
Do nakupowanišća so zadobyli
Wulka Dubrawa. Njeznaći skućićeljo su so sobotu wječor z namocu do nakupowanišća na Thälmannowej we Wulkej Dubrawje zadobyli. Spakosćili pak ničo njejsu, dokelž zaskoči alarmowa připrawa, tak, zo dyrbjachu městnosć njeskutka nanajspěšnišo wopušćić. Wěcna škoda wučinja něhdźe 4 000 eurow. Kriminalna słužba Budyskeho policajskeho rewěra je slědy na městnje zawěsćiła a pad nětko přepytuje.
Policija (03.12.24)
Namóc mjez dźěćimi
Wojerecy. Njewšědny pad namocy mjez dźěćimi policija nětko we Wojerecach přepytuje. Tam su třo hólcy w starobje dźewjeć do jědnaće lět prěnju adwentnu njedźelu popołdnju na Łužiskim naměsće dźesaćlětneho pachoła nadpadnyli, kaž w rozprawje Zhorjelskeje policajskeje direkcije rěka. Po tychle informacijach bě škodowany z přećelom po puću, jako jeho tamne dźěći narěčachu. Najprjedy dóńdźe mjez pjerachami k werbalnemu rozestajenju, pozdźišo dźěći kamjenje do sebje mjetachu. Jako nadpadnjenaj hólcaj skónčnje do směra kupnicy na Külzowej hasy ćeknyštaj, tamne dźěći za nimaj spěchachu. Jedyn z nich dźesaćlětnemu z pjasću mjezwoči biješe. Při tym jeho tak zrani, zo dyrbjachu hólca do chorownje dowjezć, hdźež jeho lěkarsce zastarachu. Kriminalna słužba Wojerowskeho policajskeho rewěra přepytuje tónle pad nětko zranjenja ćěła dla. Nimo toho pytaja swědkow, kotřiž su snano něšto wobkedźbowali. Pokiwy přijimuje Wojerowski policajski běrow pod telefonowym čisłom 03571 4650 abo kóždy druhi policajski běrow.
Policija (28.11.24)
Amplu skóncowali
Lejno. Na twarnišću při statnej dróze S 234 pola Lejnoho blisko Wojerec su njeznaći wutoru wjacore akuwy pokradnyli, zdźěla kable roztřihali a zamki skóncowali. Jeničce rubizna bě 3 000 eurow hódna. Kelko wěcneje škody nimo toho nasta, njeje znate. Nětko pytaja swědkow, kotřiž su w rańšich hodźinach wutory něšto wobkedźbowali.
Policija (27.11.24)
Pokradnjeny traktor namakał
Pěskecy. Póndźelu je swědk w lěsu pola Pěskec wotstajeny traktor nadešoł a na to policiju informował. Wukopa so, zo běchu njeznaći skućićeljo nowu ratarsku mašinu w minjenym tydźenju na ležownosći předewzaća w Pančicach-Kukowje pokradnyli. Při njeskutku pak paduši wosebje skedźbni njeběchu a něhdźe 95 000 eurow hódny traktor wobškodźichu. Cyłkowna suma wěcneje škody dotal hišće njepředleži. Policisća su slědy na městnje zawěsćili a traktor typa Massey Ferguson wobsedźerjej wróćili. Kriminalna słužba w Kamjencu nětko pad přepytuje.
Policija (25.11.24)
Paduši w bywšim jastwje
Budyšin. Bywše stasi-jastwo a dźensniše wopomnišćo w Budyšinje su sej njeznaći w nocy na sobotu za padustwo wupytali. Tam pokradnychu woni pjenjezy z jałmožnje kaž tež z awtomata za zakuski. Dohromady spakosćichu woni něhdźe 700 eurow. Načinjena wěcna škoda pak wučinja něhdźe 3 000 eurow, Zhorjelska policajska direkcija zdźěli. Policija pad nětko přepytuje.
Šokoladu sobu wzał
Běła Woda. Z kriminelnej energiju je pjatk popołdnju muž w Běłej Wodźe po wšěm zdaću hižo na hodowne dariki myslił. 38lětny z běłoruskim staćanstwom je z nakupowanišća na Berlinskej dróze 30 taflow šokolady pokradnył. Po informacijach policije bě rubizna 116 eurow hódna. Tuž drje najnowša dubajska šokolada mjez pokradnjenymi wěcami njebě. Sobudźěłaćerjo kupnicy tónle pad wobkedźbowachu a muža narěčachu. Kaž policija zdźěli, bě wón kooperatiwny. Přiwołani zastojnicy Běłowodźanskeho rewěra identitu muža zwěsćichu a chłostanske přizjewjenje wupisachu.
Policija (21.11.24)
Žonu w online-bankingu zjebali
Ottendorf-Okrilla. Njeznaći wobšudnicy su žonje z Ottendorfa-Okrille kónc tydźenja jeje nalutowanki kradnyli. Woni skontaktowachu 49lětnu najprjedy z SMSku, pozdźišo z telefonom a wudawachu so jako sobudźěłaćerjo jeje nalutowarnje. Z argumentom, zo přepruwuja wopačne wotknihowanje z jeje konta, přeswědčichu skućićeljo žonu. Tak wona jim swoje přistupne daty za online-banking přeradźi. Na to wotknihowachu něšto tysac eurow z konta. Wěstotne naprawy banki za proces onlineknihowanja dalšim transakcijam wobšudnikow zadźěwachu. Kriminalna policija pad přepytuje a ludnosć wuraznje namołwja, cuzym w telefonaće nihdy přistupne daty, klučowe hesła abo dalše sensibelne daty sposrědkować.
Policija (15.11.24)
Rubježniscy hońtwjerjo zachadźeli
Radwor/Lipič. Surowy pad rubježniskeho hońtwjerjenja su policisća srjedu w nocy při hatach w Lipiču, wjesnym dźělu Radworskeje gmejny zwěsćili. Njeznaći běchu tam z třělbu wjacore kołpje zatřělili a jim dźěle mjasa wotkrali. Zbytki morjenych zwěrjatow pak wostajichu prosće na městnje ležo. Po dotalnych dopóznaćach je so njeskutk w času wot srjedy w połnocy hač do připołdnja w 12 hodź. stał. Budyska kriminalna słužba je přepytowanja rubježniskeho hońtwjerjenja kaž tež přeńdźenja přećiwo zakonjej wo škiće zwěriny dla zahajiła a prosy ludnosć wo pomoc. Swědkojo, kotřiž maja pokiwy nastupajo móžnych skućićelow abo podawki, njech so na Budyskim policajskim rewěrje pod telefonowym čisłom 03591 3560 abo na kóždym druhim policajskim rewěrje přizjewja.
Policija (12.11.24)
Mobilnje spěšnosć kontrolowali
Zhorjelc. Kónc tydźenja běchu zastojnicy za awtodróhu přisłušneho policajskeho rewěra z ProVida-mobilom – jězdźidłom za přepruwowanje wobchada, mjez druhim z pomocu wideja – na awtodróze A 4 mjez Pólskej hranicu a Hermsdorfom po puću. Sobotu zwěsćichu dohromady šěsć překročenjow spěšnosće. Na městnje z dowolenymi 80 km/h překroči najspěšniše awto spěšnosć ze 40 km/h. Za šofera woznamjenja to dypk w Flensburgu a 200 eurow pokuty. Njedźelu lepichu zastojnicy sydom awtow, kiž běchu dowolenu spěšnosć překročili.
E-bike z pincy pokradnyli
Budyšin. Na dróze Martina Hoopa w Budyšinje su so njeznaći skućićeljo kónc tydźenja z namocu do pincy wjaceswójbneho domu zadobyli. Tam pokradnychu e-bike w hódnoće 2 450 eurow. Policisća zawěsćichu slědy. Kriminalna słužba Budyskeho rewěra pad přepytuje.
Policija (11.11.24)
Lochkomyslnosće dla lawbu přisadźił
Lubij. Palaceje lawby dla chwatachu sobotu wječor zastojnicy Lubijskeje wohnjoweje wobory kaž tež policije k zahrodce na dróze Martina Luthera. 36lětny muž běše tam w swojich kachlach bjezposrědnje pódla lawby mjaso abo rybu kurił, so pak potom na dlěši čas wotsalił. Jako so nawróći, so lawba hižo mócnje paleše. Dohromady 32 wobornikow płomjenja zhašachu. Cyłkowna škoda wučinja něhdźe 2 000 eurow.
