Policija (05.02.26)
Wyšu šulu ewakuěrowali
Budyšin. Sylnje so dymjaceje, dotal njeznateje substancy dla je Budyska wohnjowa wobora wčera dopołdnja wyšu šulu w Strowotnej studni ewakuěrowała a prěni poschod za dalše wužiwanje zašlahała. Šulerjo běchu podhladnu wóń na hólčim nuzniku zwěsćili. Wosom wuknjacych měješe tohodla ćeže z dychanjom, štyrjoch z nich dowjeze wuchowanska słužba k dalšemu lěkowanju do chorownje. Specialisća přepytowachu rumnosće a pósłachu proby k dalšej analyzy do kriminalneho labora. Šulske wjednistwo je wčerawši šulski dźeń za wšitkich šulerjow dočasnje zakónčiło. Specialna firma ma nadawk, potrjecheny wobłuk šule wurjedźić. Kriminalna słužba přepytuje nětko strašneho zranjenja ćěła dla.
Policija (04.02.26)
Pokradnjene kolesa nadešli
Běła Woda. Pokiwa wobydlerja dla su zastojnicy Běłowodźanskeho policajskeho rewěra njedźelu wječor wjacore pokradnjene kolesa w bydlenju na Karla Liebknechtowej namakali, mjez druhim tež markow Gibbon a Bulls, kotrež maja wysoku hódnotu. Kriminalna policija je přepytowanja přewzała. Njeskutka podhladny 23lětny podružnik je němski staćan.
Policija (03.02.26)
Jězbu agresiwneho šofera zakónčili
Porchow. Policija dyrbješe minjeny pjatk wječor na awtodróze A 4 pola Porchowa nakładne awto zadźeržeć, dokelž běše šofer z agresiwnym, njekedźbliwym a druhich wohrožowacych zadźerženjom napadnył. Wjacekróć běše so pólski staćan ze swojim nakładnym awtom před nim jěducym awtam přewusko přibližił a trubił abo jich z jenož snadnym wotstawkom přesćahnył. Jónu zajědźe tak blisko před přesćehnjene awto, zo pola tutoho nuzowy borzdźenski system zaskoči. Při kontroli skućićela přepruwowachu zastojnicy tež nahrawanja jězby registrowaceho nastroja w awće. Tón pokazowaše 57 króć překročenje dowoleneje maksimalneje spěšnosće w běhu minjeneje połdra hodźiny. W tesće šofera na drogi zwěsćichu substancu konop. Policija je wotpowědne chłostanske a pokutne jednanja zahajiła.
We wobchodźe pjenjezy pokradnyli
Policija (02.02.26)
Njestrózbeho na e-scooteru lepili
Kamjenc. Při wobchadnej kontroli na Njeswačanskej dróze w Kamjencu su zastojnicy tamnišeho policajskeho rewěra mjez druhim 42lětneho na e-scooteru přepruwowali. Dźiwneho zadźerženja dla testowachu jeho na drogi. Test na amfetaminy bě pozitiwny.
Policija (30.01.26)
Listowe znamki a pjenjezy fuk
Rakecy. Paduši su so srjedu nawječor do jednoswójbneho domu w Rakecach zadobyli. W nim wjacore rumnosće přepytachu. Sobu wzali su zběrku listowych znamkow a twjerdych pjenjez. Po informacijach policije běchu wone něhdźe tysac eurow hódne. Nimo toho načinichu skućićeljo 300 eurow wěcneje škody.
Policija (22.01.26)
Rentnarja wobšudźili
Kamjenc. Kaž policija srjedu zhoni, je so w Kamjencu wuměnkar z woporom wobšudnikow stał. Muž bě pozdatnje wot swojeje banki mailku dla pruwowanja identity dóstał. Jako wón na nju wotmołwi, so wobšudnicy telefonisce přizjewichu a muž jim swoje kontowe daty přeradźi. Pozdźišo wón zwěsći, zo bě so z jeho konta 12 000 eurow zhubiło.
Policija (20.01.26)
Smjertny wopor njezboža
Hrodźišćo. Tragiske wobchadne njezbožo ze smjertnym wukóncom je so njedźelu připołdnju na statnej dróze S 111 mjez Budyšinom a Wósporkom na křižowanišću do Hrodźišća stało. 28lětna wodźerka Opela bě do směra na Wóspork po puću a chcyše na křižowanišću nalěwo do Hrodźišća wotbočić. Dokelž měješe napřećiwny wobchad, dyrbješe zastać. 73lětny wodźer Saica a 33lětny šofer Renaulta za njej tohorunja zastaštaj. 84lětny wodźer Škody pak po wšěm zdaću přepozdźe pytny, zo awta steja, a bjez borzdźenja do Renaulta prasny. Tón bu do awta před nim storčeny a te do Opela cyle prědku. Wodźer Škody a jeho sobujěduca so ćežko zraništaj. 84lětna žona hišće na puću do chorownje zemrě. Při zražce nasta nimale 30 000 eurow škody. Policija pyta nětko swědkow, kotřiž móhli pokiwy k njezbožu dać. Tohorunja proša prěnich pomocnikow so pola wobchadneje policajskeje direkcije pod telefonowym čisłom 03591/ 36 70 přizjewić.
Policija (16.01.26)
Rentnarjow wobkradnył
Kamjenc. Paduch je srjedu w Kamjencu porik rentnarjow wobšudźił. Wonaj pušćištaj muža do swojeho bydlenja, kotryž so jimaj jako sobudźěłaćer hladanskeje słužby předstaji. Njeznaty da sej kontowe wućahi a pjenježnu kasetu pokazać. Z njeje wza wón 4 000 eurow. Na to so muž zhubi. Policija pyta nětko swědkow, kotrymž je srjedu popołdnju w Kamjencu 30- do 35lětny muž w zymskim pjezlu napadnył.
Policija (15.01.26)
Awtodróha dźěrata była
Słona Boršć. Wuskutki kruteje zymy su nětko na awtodróze A 4 k škodam na wosobowych awtach dowjedli. Hłubokich dźěrow dla buchu mjez Słonej Boršću a Hornim Wujězdom wutoru tři awta wobškodźene. Připołdnju bě 50lětny wodźer Škody do Drježdźan po puću. Jako přez hłuboku dźěru zajědźe, nasta na awće 500 eurow škody. Podobnje zeńdźe so popołdnju 29lětnemu šoferej Opela na samsnym městnje. Wobě lěwej kolesy jeho awta buštej wobškodźenej, wón přisadźi něhdźe tysac eurow. A skónčnje so tež Opel 33lětneho skóncowa, jako so jemu krótko po 18 hodź. to samsne sta. To płaći jeho 500 eurow. Na zbožo so nichtó zranił njeje. Awtodróhowa mištrownja je dźěry na awtodróze mjeztym zapłatała.
Policija (09.01.26)
Šofer agresiwnje wustupował
Hórnikecy. Zastojnicy Wojerowskeho policajskeho rewěra su srjedu popołdnju 51lětneho wodźerja transportera typa Mercedes zadźerželi, kotryž bě w Hórnikecach na dróze Při stadionje po puću. Najprjedy muž na signal policistow scyła njereagowaše, skónčnje pak tola zasta. Dokelž so dźiwnje zadźeržeše zastojnicy tukachu, zo bě muž drogi brał. Wotpowědny test pak wón wotpokaza. Kaž w rozprawje Zhorjelskeje policajskeje direkcije dale rěka, bu muž přiběrajcy agresiwny. Tuž policisća přikazachu, zo ma 51lětny krej wotedać. Nimo toho zahajichu woni jednanje dla podhlada jězdźenja pod wliwom drogow.
