Policija (09.05.25)
Kolesowarce znjezbožiłoj
Wojerecy. Hnydom dwě wobchadnej njezboži, při kotrymajž běštej kolesowarce wobdźělenej, stej so srjedu we Wojerecach stałoj. Najprjedy kolesowaše 72lětna po připołdnju na Friedrichowej, jako ju 86lětny wodźer Hyundaja přesćahny. Za dosć wotstawka pak dróha šěroka dosć njebě, tak zo so kolesowarka nabóčneho kamjenja šmórny a padny. Žonu dyrbjachu zranjenu do chorownje dowjezć. Hodźinu pozdźišo chcyše 65lětna wodźerka Audija na Nisčanskej dróze naprawo do industrijoweje přestrjenje wotbočić, njewobkedźbowaše pak, zo pokazowaše ampla čerwjenu swěcu. W tym wokomiku 41lětna kolesowarka dróhu přeprěči, dokelž jeje ampla zelene pokazowaše. Žona padny, ale so na zbožo jeno snadnje zrani. Škoda na kolesu a awće wučinja dohromady něhdźe 5 000 eurow, kaž policija zdźěli.
Policija (08.05.25)
Garaža so paliła
Biskopicy. Něhdźe 23 000 eurow škody nasta wutoru popołdnju w Biskopicach, jako je so tam z dotal njeznateje přičiny garaža paliła. Při hašenju wuhladachu wobornicy wjacore płunowe bleše a je z twarjenja nošachu.
Policija (02.05.25)
Do firmy so zadobyli
Rakecy. Njeprošeny wopyt mějachu w nocy na srjedu w jednym Rakečanskim zawodźe. Kaž dyrbjachu tamniši sobudźěłaćerjo rano zwěsćić, běchu so paduši namócnje do pódlanskeho twarjenja zadobyli a wšelaki grat pokradnyli. Mjez druhim běchu to nuzowy milinowy agregat, dwě točenskej mašinje marki Bosch, specielne klěšće a něhdźe 600 metrow kabla. W rozprawje Zhorjelskeje policajskeje direkcije rěka, zo měješe rubizna cyłkownu hódnotu něhdźe 5 000 eurow. Nimo toho načinichu paduši něhdźe 300 eurow wěcneje škody. Kriminalna słužba Wojerowskeho policajskeho rewěra pad přepytuje.
Policija (29.04.25)
Wopity hišće dale pić chcył
Łaz. Pokiw wo po wšěm zdaću pjanym šoferu je policiju njedźelu popołdnju we Łazu dóstała. Tam je wodźer Dacije tankował a nochcyše na to jenož bencin, ale tež alkoholiske napoje zapłaćić. To pak wón njemóžeše, dokelž pjenježne karty njefungowachu. Tak sydny so muž, kotryž bě pječa hižo chětro natutkany, do swojeho jězdźidła, zo by pjenjezy wobstarał. Te sej wot znateho wupožči a swój dołh zapłaći. Policija pak bě mjeztym tež na městnje. Pola muža naměrichu 1,86 promilow alkohola w kreji.
Policija (25.04.25)
Pytaja swědkow njezboža
Chrósćicy. Wodźer mopeda je srjedu rano na dróze mjez Chrósćicami a Wudworjom bjez wobdźělenja dalšich wosobow znjezbožił. 38lětny poda so k lěkarskemu přepytowanju do chorownje. Při přepruwowanju městnosće policisća zwěsćichu, zo bě na dróze wolij. Dalše tajke zanjerodźenje zwěsćichu we Worklecach. Nětko pytaja swědkow njezboža a dalšich, kotřiž su snano wobkedźbowali, štó je pola Chrósćic a we Worklecach wolij zhubił. Pokiwy přijimuja na Kamjenskim policajskim rewěrje pod 03578/ 35 20.
Policija (24.04.25)
Kolesowar ćeknyć chcył
Budyšin. Zastojnikam Budyskeho policajskeho rewěra je wutoru wječor krótko do 23 hodź. kolesowar na Mosće měra napadnył, dokelž tam trochu njewěsće jědźeše. Jako chcychu policisća muža kontrolować, tón nadobo mócnje do pedalow teptaše, zo by jim wućeknył. Najprjedy jědźeše po dróze Při pólnym hrodźiku. Na to pak muž znjezboži, nichtó druhi wobdźěleny njebě. Pola njeho naměrichu 1,74 promilow alkohola w kreji.
Policija (22.04.25)
Drohe koleso pokradnyli
Budyšin. Ani jutrownička njebě paducham w Budyšinje swjata. W času mjez připołdnjom a 18.00 hodź. pokradnychu woni z pincy na Tuchorskej droze koleso typa Specialized. Kaž policija zdźěli, bě jězdźidło něhdźe 8 000 eurow hódne.
Alkoholizowaneho šofera lepili
Wěteńca. Dobry čuch mějachu policisća w nocy na póndźelu blisko Wěteńcy. Krótko do połnocy kontrolowachu tam 30lětneho wodźerja VW Golfa a zwěsćichu, zo młody muž alkoholizowany za wodźidłom sedźi. Dale jěć wón wězo njesmědźeše, ale dyrbješe sobu na policajski rewěr přińć. Tam naměrichu pola njeho 0,54 promilow alkohola w kreji. Muž změje nětko pokutu płaćić, dóstanje dypki w Flensburgu a budźe so swojeho awta chwilu wzdać dyrbjeć.
Policija (16.04.25)
Njezbožo so w haće skónčiło
Kulow. Zbožo w njezbožu měješe wutoru rano muž w Kulowje. 82lětny bě na Młynskej z dotal njeznateje přičiny na lěwy bok jězdnje zajěł. Na kromje Měšćanskeho hata so jeho jězdźidło strašnje nachiliło. Kaž policija rozprawja, je wuměnkar po wšěm zdaću z awta do wody padnył. Dokelž swědka spěšnje jednaše, móžeše wona muža wuchować. Hewak drje by so wón zatepił. Přiwołane wuchowanske mocy 82lětneho skónčnje z wody wućahnychu a jeho do chorownje dowjezechu.
Policija (15.04.25)
Zapakowane kolesa namakali
Bukecy. Minjene měsacy je policija wuchodnje Budyšina wjacore kolesa namakała. Wone ležachu w přirowach w Delnjej Kinje, Kubšicach a Bukecach a běchu hišće originalnje zapakowane. Jedna so wo kolesa markow Versiliana a Frejus. Nětko pytaja swědkow, kotřiž su minjene tydźenje něšto podhladneho wobkedźbowali. Pokiwy přijimuje policija pod telefonowym čisłom 03591 3560.
Policija (11.04.25)
„Kóń“ na jězdni stał
Zhorjelc. Swědk je w nocy na štwórtk na zwjazkowej dróze B 6 w Zhorjelcu konja na jězdni wuhladał a policiju informował. Skoćo popadnyć njebě ćežko, dokelž jednaše so wo wulke plyšowe zwěrjo. Njeznaći běchu je po wšěm zdaću jako žort na puć stajili. Zastojnicy konika sobu wzachu a wotjědźechu. Policija prosy, so tajkich akcijow wzdać.
