Policija (31.03.26)
Wěko wotwjezli
Wbohow. Na zwjazkowej dróze B 96 w Wbohowje (Halbendorf) pola Budestec su njeznaći w nocy na njedźelu wěko gullyja wuzběhnyli. Kaž policija rozprawja, dowjezechu je z nakupowanskim wozom do bliskich Jiłoc (Eulowitz). Tam wóz z wěkom wotstajichu a so hižo wo njón njestarachu.
Policija (30.03.26)
Z rolerom ćeknyć chcył
Rakecy. Dokelž elektroroler žane zawěsćenske čisło njeměješe, chcyše policija sobotu připołdnju jeho wodźerja w Rakecach zadźeržeć. Muž pak spyta ćeknyć a při tym tež čerwjenu swěcu ample njewobkedźbowaše. Jako policisća 28lětneho dosahnychu, zwěsćichu, zo bě roler přetwarjeny a zo steješe muž pod wliwom drogow.
Policija (27.03.26)
Žonam tobołku pokradnyli
Wojerecy. Hnydom třom žonam su njeznaći srjedu we Wojerecach jich ručnu tobołku pokradnyli, jako běchu wone nakupować. Tak su skućićeljo připołdnju na Šulskej tobołku 64lětneje žony spakosćili. W njej bě něhdźe 70 eurow. Dalši pad sta so pozdźišo w kupnicy na industrijnišću, hdźež 88lětna žona nakupowaše. Wokomik, jako wona swoju tobołku skrótka z wočow pušći, paduši wužichu a ju hrabnychu. Škoda wučinja w tymle padźe 250 eurow. A skónčnje so 70lětna na Łužiskim naměsće z woporom paduchow stała, jako so jeje tobołka z něhdźe 60 eurami zhubi.
Policija (26.03.26)
Praskotak awće wobškodźił
Budyšin. Z luteje rozwólnosće su njeznaći w nocy na wutoru na Budyskej Gagarinowej tójšto wěcneje škody naparali. Woni zapalichu silwesterski praskotak a ćisnychu jón pod parkowacy Citroen. Při tym su tutón kaž tež pódla stejacy Seat wobškodźištej. Cyłkownu škodu trochuje policija na něhdźe 3 000 eurow.
Policija (25.03.26)
Z awta ćěriwo wuklumpali
Rakecy. Wysokich płaćiznow bencina a diesela dla wobšudnistwo při tankownjach přiběra. Paduši pak přeco husćišo tohorunja ćěriwo z awtow kradnu. Tole je so w nocy na póndźelu tež w Rakečanskej platowej štwórći stało. Tam dyrbješe wobsedźer VW Passata rano zwěsćić, zo bě tank jeho awta prózdny. Jako chcyše muž bencin z kanistra napjelnić, ćěriwo na puć wuběža, dokelž běchu paduši dźěru do tanka točili a z njeje bencin wuklumpali. Wěcnu škodu trochuje policija na sto eurow. Tank porjedźić pak budźe zawěsće dróše. Kriminalna słužba so z tymle padom dale zaběra.
Policija (24.03.26)
Motorskej pile pokradnyli
Serbske Pazlicy. Po wšěm zdaću hižo minjeny štwórtk je so w Serbskich Pazlicach padustwo stało, wo kotrymž Zhorjelska policajska direkcija hakle nětko na naprašowanje Serbskich Nowin rozprawja. Wony wječor je wobydler policiji přizjewił, zo bě so něchtó do jeho bróžnje zadobył. Paduši běchu dwě motorskej pile kaž tež kapsnu lampu pokradnyli. Rubizna ma hódnotu něhdźe 2 300 eurow. W kotrym času bě so to dokładnje stało, njeje znate. Kriminalna słužba Kamjenskeho policajskeho rewěra nětko za paduchami pyta.
Policija (23.03.26)
W bydlenju so sušak palił
Budyšin. Wohnjowych wobornikow su sobotu wječor na Jerjowu w Budyšinje wołali. Tam bě so něhdźe w 20.30 hodź. w bydlenju sušak šatow zapalił. Po informacijach policije jednaše so wo techniski defekt. 48lětna wobydlerka woheń najprjedy sama podusy. Po tym z dźěsćomaj w starobje 12 a 14 lět kaž tež z nopawomaj bydlenje wopušći. Wohnjowi wobornicy zbytki wohenja zhašachu a dalšu nopawu z bydlenja wuchowachu. W chorowni bu swójba lěkarsce zastarana. Na zbožo hodźi so bydlenje dale wužiwać. Škoda wučinja něhdźe tysac eurow.
Policija (20.03.26)
15lětna znjezbožiła
Łupoj. Wobchadne njezbožo je so srjedu we Łupoji w Radworskej gmejnje stało. 15lětna bě tam ze swojim mopedom do směra na Łomsk po puću. W lěwej křiwicy přijědźe młodostnej běłe wosobowe awto napřećo. Po wšěm zdaću jězdźidło dosć daloko na swojim boku njejědźeše, tak zo dyrbješe so mopedistka wuwinyć, zo by zražce zadźěwała. Při tym zajědźe na kromu dróhi, padny a so zrani. Běłe awto pak so wotsali.
Nócny měr mylił
Budyšin. W nocy na štwórtk je 67lětny na Budyskej Müntzerowej nócny měr susodow mylił. Wokoło połnocy wón wótře hudźbu hraješe. Jako policija přijědźe, so wón spjećowaše hudźbu mjelčo stajić a so zastojnikam wobaraše. Woni muža nachwilnje sputachu. Jako bě so wón změrował, jemu puta zaso wotewzachu, a susodźa móžachu dale spać.
Policija (17.03.26)
W garažach kradnyli
Běła Woda. Do wjacorych garažow su so minjene dny paduši w Běłej Wodźe zadobyli. Z nich pokradnychu moped S 51, motorske KTM, motorsku drastu a elektriski grat. Rubizna wučinja něhdźe 20 000 eurow.
Policija (16.03.26)
Cigaretowy awtomat rozbuchnyli
Budyšin. Na Nowosólskej w Budyšinje su njeznaći w nocy na njedźelu cigaretowy awtomat rozbuchnyli. Swědkojo běchu tři wosoby wobkedźbowali, kiž so z wulkej tobołu wotsalichu. Policija pak wo njeskutku hakle hodźinu pozdźišo zhoni, jako běchu so skućićeljo dawno zminyli. Dźěle awtomata namaka policija nimale 20 metrow dale. Na nim nasta něhdźe 5 000 eurow škody. Dokelž sy tam jenož z kartu zapłaćić móhł, rubichu njeznaći jeničce cigarety, ale žane pjenjezy. Kelko cigaretow to bě, pak njeje znate.
