Policija (14.02.22)
Paduchow katalyzatora wuslědźili
Běła Woda. Nimale wšědnje policija rozprawja, zo paduši wot wosobowych awtow katalyzator wotrězaja a pokradnu. W tychle dźělach su wosebite metale, kotrež móža skućićeljo derje wužiwać a předać. Sobotu připołdnju je policija w Běłej Wodźe třoch podhladnych wuslědźiła, kotřiž su znajmjeńša za jedyn tajki pad zamołwići. W jich awće njenamakachu jenož we Wojerecach pokradnjeny katalyzator, ale tež štyri kolesa Peugeota a drohi grat. Muža a žonu z Pólskeje w starobje 25 a 24 lět kaž tež 32lětneho Ukrainjana zastojnicy nachwilnje zajachu. We wobłuku přepytowanjow chcedźa nětko wuslědźić, hač je padušna trójka tež za dalše kradnjene katalyzatory zamołwita. Škoda we Wojerowskim padźe wučinja něhdźe 800 eurow.
Policija (11.02.22)
Garnitury za piwowy stan pokradnyli
Zemicy-Tumicy. Jeli so lětsa někajke wjetše swjedźenje wotměja, drje policija dokładnišo pohlada, hač je tam wšo w porjadku. W Čerwjenych Nosaćicach (Rothnaußlitz) pola Zemic-Tumic mjenujcy su njeznaći wuhotowanje za tajki swjedźeń ze składa pokradnyli. Zhubiło je so dwanaće garniturow za piwowy stan, piwo točenski nastroj, chłódźenska připrawa a zabawjenska elektronika. Rubizna ma hódnotu nimale 8 000 eurow. Paduši načinichu nimo toho 200 eurow wěcneje škody.
Policija (10.02.22)
Hrajkanišćo zapusćili
Klětno. Swoje mocy wupušćili su njeznaći w nocy na wutoru na hrajkanišću w Klětnom. Kaž policija rozprawja, wutorhnychu woni drjewjanu čumpjel z jeje konstrukcije. Nimo toho wułamachu łaty z wrotow a ćisnychu je na třěchu bliskeho domskeho. Dale sćahnychu njeznaći basketballowy korb z ležownosće a donjesechu jón do susodneho lěsa. Wěcnu škodu trochuja na něhdźe 1 500 eurow. Kriminalna policija pad přepytuje a prosy pod telefonowym čisłom 03576/ 26 20 wo pokiwy.
Policija (09.02.22)
Wojacy paduchow lepili
Hamor. Třo wojacy zwjazkoweje wobory lepichu předwčerawšim třoch paduchow, kotřiž běchu pola Hamora 50 metrow kabla w hódnoće 2 000 eurow pokradnyli. Awto skućićelow bě na wojerskim zwučowanišću tčacy wostało. Kameradojo to pytnychu a jich tak dołho zadźeržachu, doniž policija njepřijědźe. W awće třoch pólskich staćanow w starobje 26, 31 a 39 lět namakachu wšelki grat.
Policija (08.02.22)
Z kolesom smjertnje znjezbožił
Brězow. Tragiski wukónc měješe předwčerawšim wječor jězba 44lětneho z e-bikeom w Kubšiskej gmejnje. Wón bě na wokrjesnej dróze z Budyšina do Brězowa (Blösa) po puću, jako něhdźe w 19.30 hodź. w lěwej křiwicy na prawy bok zajědźe a do štoma prasny. Muž hišće na městnje njezboža zemrě. Wobchadna policajska inspekcija Zhorjelskeje policajskeje direkcije pyta nětko za swědkami, kotřiž móhli informacije k wujasnjenju njezboža podać. Pokiwy přijimuja pod telefonowym čisłom 03591/ 36 70 abo w kóždym policajskim rewěrje.
Policija (07.02.22)
Policija (04.02.22)
Štyri přeńdźenja naraz
Słona Boršć. Hnydom štyrjoch deliktow dla změje so 38lětny zamołwić, kotrehož Audi zadźeržachu předwčerawšim w Słonej Boršći. Při kontroli so wukopa, zo muž scyła žanu jězbnu dowolnosć nima, zo jeho awto zawěsćene njebě a zo přičinjene čisło scyła njeeksistowaše. Dale reagowaše drogowy test pola wodźerja Audija pozitiwnje na amfetaminy.
Towarstwowy dom wobškodźili
Wulka Dubrawa. Srjedu je policija zhoniła, zo běchu njeznaći we Wulkej Dubrawje na Parkowym puću towarstwowy dom wobškodźili. Tak pomórachu wonkowne sćěny a skóncowachu škleńcu zachodnych durjow z powětrowku. Po prěnim trochowanju nasta něhdźe 500 eurow wěcneje škody.
Policija (03.02.22)
Po njezbožu so zminył
Kamjenc. Dotal njeznateho wodźerja jězdźidła pyta policija w Kamjencu. Wón bě so minjenu póndźelu po wobchadnym njezbožu z awtom na Macherowej z městna njezboža zminył, štož po zakonju dowolene njeje. 57lětny šofer Toyoty bě swoje awto rano něhdźe w 7.30 hodź. na Macherowej wotstajił. Jako so wón připołdnju wróći, dyrbješe wustróžany zwěsćić, zo bě zady naprawo něchtó do Toyoty zrazył. Škoda wučinja po informacijach policije něhdźe tysac eurow. Při prědnim woknje wuhlada škodowany cedlu, na kotrejž drje bě zawinowar swoje daty zawostajił. Wjedra dla pak cedla hižo čitajomna njebě, dokelž bě dešćik pismo zamórał. Policija prosy nětko swědkow a předewšěm wosobu, kotraž bě při awće wonu cedlu zawostajiła, so na Kamjenskim policajskim rewěrje pod telefonowym čisłom 03578/ 35 20 abo druhdźe pola policije přizjewić.
Policija (02.02.22)
Na wołanje susoda reagowała
Běła Woda. Wobhladniwje jednała je předwčerawšim wječor wobydlerka na Puškinowej w Běłej Wodźe, jako słyšeše z bydlenja swojeho susoda, kak wón wo pomoc woła. Nablaku informowaše wona měšćanski policajski rewěr, kotryž je hnydom wobsadku policajskeho awta pósłał. Z pomocu wohnjowych wobornikow dóstachu so zastojnicy do bydlenja 91lětneho. Wón bě padnył a njemóžeše sej hižo sam pomhać. Wuchowanscy sanitetarjo so na to wo muža starachu. Kedźbliwej žonje, kotraž bě wołanje starca słyšała a pomoc organizowała, so policija wuraznje dźakuje.
Policija (01.02.22)
W domje woheń wudyrił
Budyšin. Wulka škoda nasta wčera rano při wohenju w bydlenskim domje na Nowoměšćanskej dróze w Budyšinje. Po wšěm zdaću běchu podružnicy rano zahe kachle zatepili. Bórze na to sapachu płomjenja hižo z třěchi twarjenja. Přiwołani wohnjowi wobornicy je zhašachu. Škodow wohenja a hašenskeje wody dla najprjedy raz nichtó w domje bydlić njemóže, kaž z policajskeje rozprawy wuchadźa. 48lětneho muža dyrbjachu zranjeneho do chorownje dowjezć, dokelž bě so při hašenju zranił. Rozměr škody wučinja něhdźe 150 000 eurow.
