Policija (23.09.19)
Dźěl rubizny stejo wostali
Bjezdowy. Njeznaći su w nocy na sobotu w twarskim zawodźe gmejny Halštrowska Hola wjacore drohe zahrodniske nastroje kaž tež jedyn traktor-trawusyčak pokradnyli. Nimo toho wobškodźichu wjacore jězdźidła gmejny. Wšitko sobu wzać pak so jim njeporadźi. Při wottransporće dalšeho traktora-trawusyčaka z pomocu gmejnskeho Multicarja wostachu z nim w dźiwiznowym płoće wisajo a na to tež hišće na čerstwje woranej roli tčacy, tak zo dyrbjachu dźěl rubizny stejo wostajić. Policija trochuje hódnotu rubizny na něhdźe 2 000 eurow.
Pod wliwom drogow po puću był
Kamjenc. Zastojnicy su njedźelu rano w Kamjencu zwěsćili, zo bě 21lětny šofer VWja drogi brał, a přikazachu test kreje. Šofer ma nětko z wysokej pokutu ličić.
Policija (20.09.19)
Ćežko zranjenej wosobje
Njebjelčicy. Při zražce wosoboweju awtow wčera popołdnju krótko po štyrjoch na S 94 pola Njebjelčic buštej dwě wosobje ćežko zranjenej. Policija dyrbješe dróhu dospołnje zaraćić.
Policija (19.09.19)
Pozitiwne: Jenož štyri přeńdźenja
Zdźěr. Slědowacu powěsć policije móhli tež pod rubriku tež tole dawa wozjewić. Zastojnicy su póndźelu dopołdnja w Zdźěri spěšnosć awtow kontrolowali a chětro pozitiwny wuslědk dóstali. Z cyłkownje 1 425 kontrolowanych jězdźidłow w štyri a poł hodźinje, běchu jeničce štyri spěšniše hač dowolene 50 km/h.
Policija (18.09.19)
45lětny konop plahował
Hlina. Zastojnicy kriminalneje policije běchu minjeny kónc tydźenja w Hlinje (Gleina) pola Malešec konopjowu plantažu našli a ju znješkódnichu. Wobydler policiji anonymnje zdźěli, zo bě 45lětneho Dana při plahowanju w rostlinarni wobkedźbował. Při pytanju za drogami zasadźichu tež na to specializowane psy. Wone 24 rostlin wučušlichu.
Kóčce čwělnje zahinyłoj
Drječin. Hižo před něšto časom su njeznaći w Drječinje (Dretschen) kóčce zajědojćili. Štyrinohačej grawoćiwje zahinyštej. Skótny lěkar čwělowanje wobkrući, njemóže pak rjec, kotry jěd stej žrałoj. Zo njeby k tomu dóšło, chce policija dračowarja na kóždy pad wuslědźić.
Policija (17.09.19)
Wjacore razy „čerćik alkohol“
Hórki/Kulowc/Wjazońca. W Hórkach je policija njedźelu na Jasčanskej rano we wosmich wodźerja motorskeho lepiła, kiž měješe 1,74 promilow alkohola w kreji. 41lětny biker bě kontrolu nad jězdźidłom zhubił, z dróhi na polo zjěł, padnył a so při tym ćežko zranił. Motorske njebě zawěsćene. Tohorunja w Kulowcu bě 18lětny wopity njedźelu w nocy po puću. Policija jeho w 2.55 hodź. zadźerža. Z testa wuchadźa, zo měješe 1,56 promilow alkohola w kreji. Z hišće wjace, mjenujcy z 2,54 promilemi bě we Wjazońcy njedźelu w 22 hodź. 51lětny kolesowar do pedalow teptał a kontrolu zhubił. Na hłownej dróze wón padny a so zrani.
Policija (16.09.19)
Dźěl twarjenja so sypnył
Biskopicy. Krótko do 17 hodź. su wobydlerjo w Biskopicach na Karl-Liebknechtowej dróze wohnjowu woboru zazwonili. Tam bě so dźěl prózdny stejaceho twarjenja sypnył a na chódnik padnył. 26 kameradow bě na městnje a z pomocu přistajenych Biskopičanskeho twarskeho dwora a městnosć zawěsćichu.
Wandalojo zachadźeli
Budyšin. Budyšenjo njewědźachu sej sobotu rano rady a wołachu policiju. Na Budyskim dźiwadłowym naměsće někotři hewrjekachu a piwowe bleše wo zemju mjetachu. Samo měšćanske rjedźenje dyrbješe wupomhać.
Policija (13.09.19)
Pod wliwom medikamentow jěła
Budyšin. Starosćiwi wobydlerjo informowachu dźensa w nocy policiju, zo běchu na awtodróze pola Hornjeho Wujězda njewobswětleny Opel z Budyskim čisłom wobkedźbowali. Tam jědźeše awto ze směra Drježdźan do Zhorjelca w kwaklatej liniji. Patrulja awtodróhoweje policije zwěsći na to 63lětnu wodźerku Corsy, kotraž bě sylne medikamenty brała.
W měsće do awtow kopałoj
Wojerecy. Předwčerawšim wječor staj mužej w starobje 27 a 28 lět w starym měsće Wojerec randalěrowałoj. Na Hasy Clary Zetkin kopaštaj do wotstajenych awtow, mjetaštaj bleški na nje a pjerještaj samo ze železnym rjećazom do nich. Patrulja Wojerowskeho policajskeho rewěra wza jeju sobu na rewěr. Wěcna škoda wučinja dohromady něhdźe 20 000 eurow.
Policija (12.09.19)
Bulowe saki pokradnjene
Kamjenc. Kamjenscy koparjo so njemało dźiwachu, jako zwěsćichu, zo bě jim něchtó saki, kotrež bule wotpopaduja, pokradnył. Po 60 metrach běchu wone w stadionje na Dittrichowej na wjacore sćežory přičinjene. Wěcna škoda wučinja něhdźe 6 000 eurow. Problem je, zo budu bórze nowe saki trjebać.
Podhladneho zadźerželi
Wojerecy. We Wojerecach je policija wutoru wječor při kontroli 36lětneho lepiła, kiž bě z hižo loni pokradnjenym kolesom po puću. Nimo toho měješe podhladny zakazany nóž při sebi.
Policija (11.09.19)
Woclowe dźěle na dróze
Budyšin. Na Budyskej Lubijskej dróze je so wčera rano připowěšak po zdaću złamaneho dźěla dla z turkowskeho nakładneho awta wutorhnył. Na nim běchu ćežke woclowe dźěle składowane, kotrež wšitke na dróhu spadachu. Wotrězk zwjazkoweje dróhi B 6 bě hač do wječora zawrjeny, dokelž dyrbjachu dźěle rumować a skóncowane nakładne awto wotwjezć.
Z mašiny diesel wuklumpali
Bluń. Na twarnišću w Blunju (Bluno) běchu njeznaći minjeny kónc tydźenja z twarskeje mašiny něhdźe 300 litrow diesela wuklumpali. To je twarski dźěłaćer hakle wčera zwěsćił. Kriminalna policija nětko za paduchami slědźi.
Policija (10.09.19)
Motorski do přirowa zajěł
Kulow. 33lětny wodźer motorskeho je póndźelu připołdnju na S 95 mjez Němcami a Kulowcom z dotal njeznateje přičiny kontrolu nad swojej Kawasaki zhubił a do přirowa zajěł. Muž so zrani, a jeho dyrbjachu do chorownje dowjezć.
Mountainbike pokradnyli
Hnašecy. W Hnašecach su paduši kónc tydźenja při Łučnym puću wotstajeny mountainbike sobu wzali. Njedźelu připołdnju je wobsedźer dosć droheho žołto-čorno błyšćaceho so kolesa pytnył, zo je wone preč.
Pod wliwom drogow z kolesom jěł
Kamjenc. Jako policisća póndźelu rano na Wojerowskej dróze w Kamjencu 34lětneho kolesowarja kontrolowachu, dyrbjachu zwěsćić, zo steješe wón pod wliwom drogow. Na to namakachu pola njeho něšto gramow crystala a cannabisa.
