Policija (20.02.20)
Z brónju do kocora třělili
Brěmjo. Najskerje 8. abo 9. februara su njeznaći w Brěmjenju (Brehmen) pola Wulkeje Dubrawy do kocora třělili. Skućićel wužiwaše za to dotal njeznatu bróń. Kaž skótny lěkar wobkrući, je lědma móžno, zo bě so kocor sam zranił. Medicinar móžeše ranu zastarać a štyrinohačej pomhać. Přiwšěm wobsteji podhlad, zo je so skućićel přećiwo zakonjej wo škiće zwěrjatow přešoł. Tohodla proša nětko wobydlerjow wo pomoc. Štóž móže pokiwy wo njeskutku abo skućićelu podać, njech to policiji přizjewi.
Policija (19.02.20)
Ćěriwo kradnyli
Zabrod. Něhdźe 350 litrow diesela su njeznaći minjeny kónc tydźenja z twarnišća w Zabrodźe pokradnyli. Kaž dyrbjachu tam póndźelu rano zwěsćić, běchu skućićeljo tankowe wěko wotstajeneju twarskeju mašinow namócnje wočinili a z njeju ćěriwo wotklumpali. Hódnotu diesela trochuja na 500 eurow, nimo toho nasta 100 eurow wěcneje škody.
Policija (18.02.20)
Paduši w bydlenju
Wóslink. Njedźelu dopołdnja dyrbjachu mějićeljo jednoswójbneho domu we Wóslinku zwěsćić, zo běchu so njeznaći do njeho zadobyli, jako wobydlerjo w nocy do toho doma njeběchu. Paduši běchu wšitke stwy a kamory za hódnotnymi wěcami přepytali a su wšelake debjenki a pjenjezy sobu wzali. Cyłkowna rubizna měješe hódnotu wjacorych stow eurow.
Policija (17.02.20)
Stare awto so wupaliło
Budyšin. K hašenju wosoboweho awta wołachu wohnjowych wobornikow wčera rano na kromu Bórka pola Budyšina. Jězdźidło steješe při awtodróhowym mosće. Kameradojo płomjenja spěšnje podusychu, tak zo k žanym dalšim škodam njedóńdźe. Kaž policija zdźěli, jednaše so wo dospołnje wusłuženy a skóncowany čěski VW Polo, kiž tam hižo wjacore tydźenje steješe. Tójšto dźělow z njeho bě hižo wutwarjenych, čehoždla tukaja na zapalerstwo a nic na techniski defekt jako přičinu wohenja.
Policija (14.02.20)
Ze spara wutorhnjeny
Wojerecy. Do pódlanskeho twarjenja jednoswójbneho domu we Wojerecach su so w nocy na srjedu njeznaći zadobyli a sej twarske mašiny za wottransport přihotowali. Jako spytachu tež chěžne durje wočinić a so w bydlenskim domje rozhladować, pak činjachu haru, tak zo wobsedźer wotući a za prawym pohladny. Na to zadobywarjo ćeknychu. Sobu wzali drje ničo njejsu, přiwšěm načinichu něhdźe tysac eurow wěcneje škody.
Policija (13.02.20)
W bydlenju pistole namakali
Rakecy. Wosebje wukubłana skupina policistow bě zawčerawšim w Rakecach zasadźena, dokelž běchu pokiw dóstali, zo ma wobydler pistolu a móhł ju tež zasadźić. W bydlenju 63lětneho namakachu powětrowku, trašawku a pistolu za paintball. Nimo toho storčichu na škričkowanski nastroj Stróžanskeje wohnjoweje wobory. Tón bu w septembru 2017 pokradnjeny. Dokelž měješe muž strowotne problemy, dowjezechu jeho na to do chorownje. Hač smědźeše wón pistole w bydlenju měć, nětko přepytuja.
Policija (12.02.20)
Grat z kolesom wotwjezli
Rakecy. Za čas wichora w nocy na póndźelu su so njeznaći namócnje do zawoda při Rakečanskej hłownej dróze zadobyli. Ze zamkarnjow pokradnychu wšelki grat a wzachu nimo toho mužace koleso sobu. Móžno, zo su z nim swoju rubiznu wotwjezli. Wobsedźer trochuje wěcnu škodu na něhdźe tysac eurow. Pokradnjeny grat pak měješe hódnotu něhdźe 1 900 eurow. Kriminalna policija pad nětko přepytuje.
Policija (11.02.20)
W gmejnskim domje pobyli
Němcy. Zawčerawšim dopołdnja dyrbjachu w Němcach zwěsćić, zo bě so tam w nocy do toho něchtó do gmejnskeho twarjenja při hłownym puću zadobył. Paduši běchu wšitke rumnosće přepytali a njeznatu sumu pjenjez sobu wzali. Wěcna škoda wučinja po informacijach policije něhdźe 2 000 eurow.
Policija (10.02.20)
Wopity z awtom jěł
Kulowc. W póstniskim času dyrbja šoferojo z tym ličić, zo jich policija zadźerži, dokelž za alkoholowymi hrěšnikami slědźi. Ćim bóle je to w karnewalowych centrumach móžno. To wě nětko tež 37lětny wodźer Forda, kotrehož zadźeržachu sobotu wječor w Kulowcu. Při kontroli napadny zastojnikam jeho „chorhojčka“. Z alkoholowym testom naměrichu pola njeho 2,4 promilow alkohola w kreji. Logiska konsekwenca bě, zo dyrbješe muž swoju jězbnu dowolnosć wotedać a ju tak spěšnje tež zaso njedóstanje. Nimo toho změje so 37lětny swojeho zadźerženja dla na sudnistwje zamołwić.
Policija (07.02.20)
Přichodni policisća hewrjekali
Budyšin. Třo młodźi mužojo su w nocy na štwórtk w Budyšinje z woknom bydlenja „Sieg Heil“ wołali. Kaž wot wobydlerjow alarmowana policija zwěsći, jednaše so wo třoch studentow Budyskeje wotnožki Sakskeje policajskeje wysokeje šule. Jeje rektor je potrjechenych na njewobmjezowany čas wot dalšeho studija wuzamknył. Hač změje jich jednanje dalše konsekwency, so pruwuje.
