Přiběrajcy zaso jebarjo po puću

Hodźij. Policija warnuje znowa před jebarjemi, kotřiž spytaja z pomocu wnučkoweho trika staršim ludźom pjenjezy wulišćić. Wobydlerjo běchu jenož wčera sydom tajkich njeskutkow z cyłeho Budyskeho a Zhorjelskeho wokrjesa při­zjewili, mjez druhim w Hodźiju, Połčnicy a Hórce pola Niskeje. Při tym paduši rozdźělnje postupuja. Pak so telefonisce pola staršich ludźi přizjewjeja a jako wnučki wudawaja abo jich direktnje na dróze narěča. Policija namołwja tuž k wjetšej kedźbnosći.

Eksplozija w bydlenju – třo zranjeni

Njedźichow. Wohnjowu woboru, nuzoweho lěkarja a policiju su wčera rano do Njedźichowa wołali. Tam je krótko po wosmich k rozbuchnjenju w třěšnym bydlenju wjaceswójbneho domu dóšło. Třěcha so zdźěla wotpali, tež swisle domu zdźěla wjac njestejachu, tak sylna detonacija bě. Wšitkich wosom wobydlerjow domu móžachu wobornicy z Wojerec a Njedźichowa wuchować. Třo pak so při njezbožu zranichu, jedyn tak jara, zo dyrbjachu jeho z helikopterom do chorownje dowjezć. Dom njeje tuchwilu wobydlomny. Kriminalisća přičinu eksplozije nětko přepytuja.

Diesel kradnyli

Bluń. Na twarnišću w Blunju w gmejnje Halštrowska Hola běchu njeznaći minjeny kónc tydźenja z twarskeju jězdźidłow diesel kradnyli. Kaž policija zdźěla, su dźěłaćerjo póndźelu, jako na dźěło přińdźechu, pytnyli, zo běchu paduši z tankow dweju bagrow 400 litrow ćěriwa wotklumpali, a to w hódnoće něhdźe 500 eurow.

Lochkomyslnosć k njezbožu wjedła

Prěčecy. Na statnej dróze S 100 mjez Prěče­cami a Lejnom je wčera wječor ně­hdźe w 21.30 hodź. lochkomyslnosće dla k njezbožu dóšło. Jako do směra na Kamjenc jěducy šofer Seata transporter a tež hišće Lkw přesćahny, zrazy wón w křiwicy do napřećo přijěduceho awta. Jeho šoferka so při zražce ćežko zrani, a dyrbjachu ju do chorownje dowjezć. Dokelž chcyše so zawinowar njezboža awtu žony hišće wuwinyć, prasny wón ze swojim Seatom tež hišće zboka do Lkw-ja. Statna dróha S 100 bě hač do poł­nocy dospoł­nje zawrjena.

Awto so dospołnje wupaliło

Ohorn. Wčera připołdnju je so na awtodróze A 4 mjez Połčnicu a Ohornom wo­so­bowe awto paliło. Šofer móžeše je hišće­ na pobóčnu čaru wodźić a wulězć. Byrnjež wohnjowa wobora spěšnje na městnje była a hašała, je so jězdźidło dospołnje wupaliło.

Do twarjenja firmy so zadobyli

Njeswačidło. W nocy na njedźelu su so njeznaći na wobhrodźenu płoninu a do twarjenja firmy při Njeswačanskej tankowni namócnje zadobyli. Kaž policija zdźěla, běchu skućićeljo w běrowach firmy wšitko za móžnej rubiznu přepytali a přeborkali kaž tež wšitke kasy a špinty zwočinjeli. Při tym načinichu škodu ně­hdźe tysac eurow. Spakosćili pak su po zdźělenju zastojnikow jenož dotal hišće njeznate mnóstwo cigaretow. Kriminalna policija pad přepytuje.