Policija (02.07.20)
Dom za drogami přepytali
Biskopicy. Policija je dźensa rano znowa bydlenje w Biskopicach přepytała, hdźež bě hakle w meji drogi našła. Dźensa rozhladowachu so zastojnicy tež na hornjej łubi a w pincy domu a zawěsćichu wjacore sudobja. Pohladneho wobydlerja su na policajski rewěr sobu wzali.
Policija (01.07.20)
Spar jemu zahuba był
Wojerecy. Chětro mučny drje dyrbješe paduch być, kiž bě so w nocy na póndźelu w Ćisku do bydlenskeho mobila, kólnje a twarskeho woza zadobył. Wšako njeje daloko přišoł a je sej na susodnej zahrodźe na stólcu wusnył. Wobydler tam spjaceho nańdźe a zawoła policiju. Jej znaty 22lětny pakostnik spyta hišće ćeknyć, ale bjez šansy. Tež rubiznu w hódnoće něhdźe tysac eurow zastojnicy za wottransport spřihotowanu namakachu. Nimo płonowobrazoweho telewizora běchu to mjez druhim DVD-player, kašćik piwa a powětrowa klumpa za koleso.
Policija (30.06.20)
Awto pod balkonom zatłusnjene
Kamjenc. Nuzowi pomocnicy a wohnjowi wobornicy dyrbjachu wčera wječor napoł sedmich na Njebjelčanskej dróze mjez Kamjencom a Brěznju pomhać. Tam bě Nissan do sćěny chěže zrazył. Awto wosta pod balkonom wisajo, při čimž so jeho šofer zatłusny. Wohnjowi wobornicy jeho ćežko zranjeneho wuswobodźichu a do chorownje dowjezechu. Policija přičiny njezboža přepytuje.
Transporter so palił
Biskopicy. Minjenu nóc krótko do dwěmaj paleše so na hasy Zum Wiesengrund w Biskopicach transporter. Dwanaće dobrowólnych wohnjowych wobornikow je woheń na to zhašało.
Policija (29.06.20)
Woheń na zbožo žadyn njebył
Pančicy-Kukow. Krótko do połnocy na njedźelu wołachu wohnjowu woboru a policiju do klóštra Marijineje hwězdy w Pančicach-Kukowje. Na zbožo pak so wukopa, zo so tam ničo njepali. Płomjenja we wohnjowej škli na ležownosći napřećo dźěłarni běchu so w škleńčanych durjach špihelowali.
Policija (26.06.20)
Paducha lepił
Kamjenc. Sobudźěłaćer Kamjenskeho nakupowanišća je předwčerawšim paducha lepił. Podhladny bě bjez toboły do wobchoda šoł a jón bórze na to z tobołu a tołstym nachribjetnikom wopušćił. Jako jeho sobudźěłaćer narěča, poča tamny agresiwny być a jeho snadnje zrani. Paduch wostaji rubiznu stejo a z kolesom ćekny. Daloko přišoł pak njeje, přetož alarmowana policija jeho bórze dosahny. Rubiznu – drastu a kapsnu lampu w hódnoće 400 eurow – móžachu kupnicy wróćić.
Policija (25.06.20)
Pedalej zaměniła
Kamjenc. Při wuparkowanju na Njebjelčanskej dróze je předwčerawšim w Kamjencu 77lětna wodźerka VWja město spinadła na płun stupiła. Jeje awto zrazy na to do Opela a suny jón dźesać metrow dale, hdźež steješe 76lětna pěška. Wona so při tym ćežko zrani, zo dyrbjachu ju do chorownje dowjezć.
Policija (24.06.20)
Jastwo runje tak wotwobarał
Kamjenc. Zo je lěpje stajnje připasany za wodźidłom awta sedźeć, dyrbješe wčera dopołdnja 33lětny muž na Kamjenskej dróze Při wětrniku nazhonić. Při wobchadnej kontroli jeho mjenujcy bjez škitneho pasa lepichu. To pak bě hišće najmjeńši problem Bołharja. Přećiwo njemu předležeše mjenujcy wukaz zajeća. Dokelž pak je dotal wotewrjenu pokutu 300 eurow nablaku zapłaćił, móžeše wón jastwo wotwobarać.
Policija (23.06.20)
Paduši pola pjekarja
Wojerecy. Do jedneje z Wojerowskich pjekarnjow su so njeznaći minjeny kónc tydźenja zadobyli. Z chłódźaka spakosćichu skućićeljo cyły blach tykanca a so z nim zhubichu. Wobsedźer hódnoćeše škodu na něhdźe 50 eurow. Wěcna škoda na durjach wobchoda wučinja porno tomu dźesać króć telko.
Policija (22.06.20)
Ampla skóncowana była
Budyšin. Hdźež hewak stajnje ampla wobchad rjaduje, maja někotři šoferojo z předjězbu problemy, hdyž ampla raz wupadnje. Tajki pad sta so sobotu dopołdnja na Budyskim křižowanišću Mužakowska/Krakečanska při Röhrscheidtowej kupjeli. Jako ampla njefungowaše, stej tam BMW a VW do so zrazyłoj. Jedna wosoba so při tym snadnje zrani.
Policija (19.06.20)
15lětnu křiwdźili
Wojerecy. Pasanća běchu srjedu nawječor swědcy, kak so mužej w starobje 26 a 32 lět a 29lětna žona na přibrjoze Šibojskeho jězora 15lětneje přimaja a ju křiwdźa. To wobkedźbujo přihladowacy hnydom policiju zawołachu. Při kontroli zastojnicy zwěsćichu, zo běchu njeskutka podhladni z pokradnjenymaj kolesomaj po puću, a jich nachwilnje zajachu.
