Policija (18.12.20)
Znowa w cyrkwi kradnyli
Pančicy-Kukow. Z třomi mužemi, kotřiž běchu wutoru w Róžeńčanskej cyrkwi křiž, klinkački a škličku pokradnyli, dyrbješe so policija předwčerawšim znowa zaběrać. Po tym zo běchu zastojnicy sakralne wěcy wutoru do Róžanta wróćili, je skućićeljo na samsnym městnje nazajtra znowa spakosćichu. Policija lepi jich z rubiznu w klóštrje Marijinej hwězdźe w Pančicach-Kukowje. Paduchow dowjezechu na Kamjenski policajski rewěr, dweju z nich po lěkarskim přepytowanju do chorownje.
W Róžeńčanskej cyrkwi sakralne wěcy kradnyli
Rakecy/Róžant (SN/MWj). Chrobły taksijowy šofer je předwčerawšim štyrjoch podhladnych paduchow na Budyski policajski rewěr dowjezł, dokelž nochcychu woni zličbowanku za taksijowu jězbu zapłaćić. Nimo toho běchu do toho wjacore delikty skućili, z kotrymiž so nětko zastojnicy zaběraja.
Štyrjo mužojo w starobje 25 do 45 lět dachu so najprjedy z taksijom k Rakečanskemu gmejnskemu zarjadnistwu šoferować. Po informacijach policije dźěše 39lětny do twarjenja, hdźež je jednomu ze sobudźěłaćerjow z wulkim klučom hrozył. Gmejnski přistajeny cuzemu kazaše dom wopušćić, štož pak bě jemu smorže. Hakle jako běchu přiwołani zastojnicy z Wojerowskeho policajskeho rewěra na městnje, wón zarjadnistwo wopušći. W tym padźe přepytuja nětko mylenja domjaceho měra dla.
Policija (16.12.20)
Z trašawku hrozył
Łaz. Na zjawnym puću we Łazu je so předwčerawšim popołdnju 68lětny muž z trašawku na kolesowarja měrił. 38lětny bě do toho rentnarja přesćahnył, na čož tón jemu wupřestrěty srjedźny porst pokaza. Kolesowar na to zasta, zo móhł z mužom rěčeć. Tón pak jemu wudma nadawaše a skónčnje swoju trašawku na njeho měrješe. Policija pozdźišo podhladneho wuslědźi a při nim nabitu bróń. Za nju drje měješe rentnar dowolnosć, přiwšěm njesmě ju w zjawnosći při sebi měć. Policisća pistolu, municiju a dowolnosć sćazachu. Za 68lětneho změje to juristiske konsekwency.
Policija (15.12.20)
Pjenjezy duplikaty byli
Wojerecy. Z witriny wotnožki pjenježneho instituta na Hrodowej we Wojerecach su njeznaći w nocy na minjenu njedźelu wustajene pjenjezy pokradnyli. Kaž policija zdźěli, pak jedna so wo duplikaty. Kelko jednotliwych pjenjez su skućićeljo sobu wzali, njeje hišće jasne.
Policija (14.12.20)
Za hody so zastarać chcyli
Budyšin. Jenož krótki čas móžachu so minjeny pjatk wječor štyrjo mužojo w Budyšinje nad swojej słódkej rubiznu wjeselić. Sobudźěłaćer kupnicy na Drježdźanskej dróze je policiju informował, zo su cuzy wjetše mnóstwo šokolody spakosćili a z awtom wotjěli. Dźakowano dobremu wopisanju skućićelow lepichu policisća štyrjoch muži w starobje 17, 18, 19 a 25 lět na wotpočnišću Hornja Łužica při awtodróze A 4. W jich wosobowym awće typa Daihatsu namakachu na to nimo šokolody tež kofej, płokanski próšk, palenc a drogerijowe wudźěłki w cyłkownej hódnoće něhdźe 1 200 eurow. Wšěch štyrjoch zastojnicy nachwilnje zajachu. Po wotzamknjenju policajskich naprawow jich zaso pušćichu. Kriminalna policija pad dale přepytuje.
Policija (11.12.20)
Z jejom so „wjećił“
Łuty. Hdyž přespěšnje jěducych šoferow z błyskačom lepja, to potrjechenych wězo mjerza, njeje pak přiwšěm žana přičina so za to wjećić, kaž činješe to předwčerawšim muž we Łutach. 54lětneho běchu připołdnju „fotografowali“, dokelž bě tam na Gerharda Hauptmannowej z awtom přespěšnje jěł. Poł hodźiny pozdźišo so wón na wone městno z kolesom nawróći a ćisny jejo wo durje jězdźidła, z kotrehož policisća kontrolowacu techniku posłužowachu. Jich jězdźidło drje so při tym njewobškodźi, přiwšěm wupisachu mužej skóržbu. W njej rěka, zo bě wón „powšitkownosć wobćežował“.
Policija (10.12.20)
Před zastojnikami ćěkał
Wojerecy. Hnydom wjacore razy je so 18lětny wodźer Audija předwčerawšim we Wojerecach kontroli policije wuwinył. Wokoło 21.45 hodź. chcychu jeho na Južnej hasy kontrolować, młody muž pak stupi na płun. Wón smaleše z awtom do směra na Židźino, hdźež dyrbješe kolesowarka nabok skočić. Policajsku zawěru šofer ignorowaše, jědźeše wokoło njeje a by nimale do policistow załoži. Hakle na dalšim kontrolnym městnje so 18lětny poda. Wón a 16lětny sobujěducy steještaj pod wliwom drogow. Nimo toho bě Audi bjez dowolnosće přetwarjeny.
Policija (09.12.20)
W busach kontrolowali
Kulow. Na cyłoněmskim akciskim dnju za wužiwanje nahubnika w zjawnych wobchadnych srědkach běchu předwčerawšim tež zastojnicy Wojerowskeho policajskeho rewěra wobdźěleni. Woni kontrolowachu we wjacorych busach kaž tež na zastanišćach w Kulowje a Rakecach. Kaž w rozprawje Zhorjelskeje policajskeje direkcije rěka, su w busach wšitcy sobujěducy postajenje dodźerželi. Na zastanišćach někotre dźěći tónle předpis ignorowachu. Zastojnicy je napominachu.
Policija (08.12.20)
Pokradnjene awto namakali
Kamjenc. Dźakowano dobremu techniskemu wuhotowanju su minjeny kónc tydźenja awto zaso namakali, kotrež běchu njeznaći w Kamjencu pokradnyli. Wobsedźer 60 000 eurow droheho jězdźidła pjatk rano pytny, zo jeho Audi na zwučenym městnje njesteji. Na to aktiwěrowaše wón ze smartfonom app, z kotrejž hodźi so městnosć awta zwěsćić. Po tym steješe Audi A 4 dźesać kilometrow za Zhorjelcom w Pólskej. Tamniši zastojnicy namakachu Audi skónčnje na wopisanym městnje zawodźěty. Wot paduchow pak njebě ničo widźeć.
Policija (07.12.20)
Wulku škodu načinili
Wóspork. Komunalny twarski zawod městačka Wósporka bě w nocy na sobotu cil paduchow. Tón dźeń dopołdnja dźě dyrbjachu zwěsćić, zo bě so tam něchtó zadobył a najprjedy wonkowne wrota a po tym dalše wrota składu a gratoweje hale namócnje wočinił. Z hale pokradnychu njeznaći tam wotstajeny Ford Transit. Dwanaće lět stare awto je něhdźe 10 000 eurow hódne. Dale su skućićeljo na připowěšaku ležacy grat w cyłkownej hódnoće 15 000 eurow sobu wzali. Nimo toho nasta při zadobywanju 2 000 eurow wěcneje škody. Kriminalisća pad nětko přepytuja.
