Policija (18.06.20)
Składnosć znjewužiwali
Kamjenc. Njeznaći su předwčerawšim w Kamjencu njekedźbliwosć wobsedźerja wosoboweho awta, kiž bě wokno na prawym boku jězdźidła jeno přizačinjene wostajił, šamale znjewužiwali. Skućićeljo sahnychu přez wokno a wotamknychu durje. Na to spakosćichu ručnu tobołku, w kotrejž běchu 60 eurow, wupokaz a dalše wosobinske wěcy wobsedźerja. W tym zwisku policija na to skedźbnja, zo je minjeny čas wjacekróć k tajkim deliktam dóšło. Šoferojo a sobujěducy měli na to kedźbować, zo w awće žane hódnotne wěcy widźomnje ležo njewostaja.
Policija (17.06.20)
Dwójce tak spěšnje jěł
Lěskej. Na zwjazkowej dróze B 156 w Lěskej w Malešanskej gmejnje je policija póndźelu dopołdnja spěšnosć měriła. Při dowolenych 50 km/h jědźeše w běhu pjeć hodźin nimale tysac wozydłow nimo błyskača. 72 šoferow bě přespěšnych. 41 z nich dósta warnowanje, wjac hač třicećo pak dyrbja pokutu płaćić. Najspěšniši bě Škoda ze Zhorjelskim čisłom. Jeho wodźer z 99 km/h po wsy smaleše, potajkim nimale dwójce tak spěšnje kaž dowolene. To woznamjenja 200 eurow pokuty, dwaj dypkaj a měsac nóžkować.
Policija (16.06.20)
W nocy wokoło so třěleli
Pančicy-Kukow. Kedźbliwy swědk bě w nocy na póndźelu w Pančicach-Kukowje słyšał, zo něchtó třěla, a je tuž policiju alarmował. Zastojnicy zwěsćichu tam krótko do połnocy štyri wosoby w starobje 16 do 32 lět. Tři z nich běchu chětro alkoholizowane. Pola nich naměrichu mjez jednym a 2,40 promilemi alkohola. W bliskim kerku namakachu policisća dwě trašawce a powětrowku, kotrež běchu lepjeni tam spěšnje schowali. Jako podhladneju identifikowachu młodeju muži w starobje 19 a 32 lět. Žanu dowolnosć, někajku bróń wobsedźeć směć, wonaj předpołožić njemóžeštaj. Tak je policisća sćazachu. Kriminalna policija so z padom nětko zaběra a přepytuje přeńdźenja přećiwo zakonjej wo brónjach dla. 16lětneho młodostneho přepodachu zastojnicy hišće w samsnej nocy jeho staršimaj.
Policija (15.06.20)
Muža z blešu zranił
Wojerecy. K namócnemu rozestajenju dóńdźe sobotu we Wojerowskim dejnerowym wobchodźe. Tam je so 29lětny muž z rozbitej blešu do 50lětneho dał a jeho na ruce zranił. Rany dyrbjachu w bliskim klinikumje lěkarsce zastarać. Přiwołani policisća skućićela najprjedy raz zajachu. Pola njeho naměrichu 1,82 promilow alkohola w kreji. Po tym zo su wšitke trěbne policajske naprawy zakónčili, 29lětneho zaso pušćichu.
Policija (12.06.20)
Hobbyjowy nurjak w nuzy pomhał
Wojerecy. Zo hodźi so nurjenska technika tež za hinaše zaměry wužiwać, je předwčerawšim muž we Wojerecach dopokazał. Wobydlerka wjaceswójbneho domu je tam cokorowy sirup wariła a po wšěm zdaću na hornc zabyła, tak zo so z njeho chětro kurić započa. Kuražěrowany susod a hobbyjowy nurjak dźěše na to ze swojej nurjenskej techniku do bydlenja žony a donjese hornc won. Žana wěcna škoda tuž njenasta, a zranił so tež nichtó njeje. Alarmowani wohnjowi wobornicy móžachu swoje zasadźenje spěšnje skónčić. Zasadnje pak policija radźi, w padźe wohenja na kóždy pad wohnjowu woboru informować a njewustajić so sam móžnemu strachej. Přiwšěm so kameradojo zmužitemu wobydlerjej za jeho njesebične jednanje dźakuja.
Policija (11.06.20)
Znata moped spóznała
Rakecy. Mało wjesela nad pokradnjenym mopedom měještaj předwčerawšim skućićelej w starobje 17 a 39 lět w Rakecach. Po tym zo je wobsedźer popołdnju policiji přizjewił, zo bě něchtó jeho moped pokradnył, wuhlada jeho znata jězdźidło wječor w Psowjach. Přiwołanym zastojnikam spytaštaj skućićelej napowědać, zo běštaj moped online kupiłoj. Kaž so wukopa, bě 39lětny z S 51 jěł, njeměješe pak scyła žanu jězbnu dowolnosć, dokelž běchu ju jemu hižo dawno sćazali. Nimo toho steještaj wón kaž tež młodostna pod wliwom drogow. Policija wobsedźerjej moped zaso wróći. Paduchaj změjetaj so nětko hnydom wjacorych deliktow dla sudnisce zamołwić.
Policija (10.06.20)
Kofej radšo doma pić
Ptačecy. Kofejowy nopašk za „po puću“ je předwčerawšim rano na wokrjesnej dróze mjez Złym Komorowom a Ptačecami po wšěm zdaću wobchadne njezbožo zawinił. Horcy napoj steješe na pódlanskim sydle VW Tourana a so při jězbje powróći. To 56lětnu wodźerku drje bóle zaběraše, hač na puć dźiwać. Tak wona na prawy bok jězdnje zajědźe a do štoma zrazy. Zranjenu dowjezechu ju do chorownje. Awto so dospołnje skóncowa, škodu trochuja na něhdźe 22 000 eurow.
Policija (09.06.20)
Do firmy so zadobyli
Drětwja. Njeznaći su so minjeny kónc tydźenja namócnje do firmy w Drětwi (Zerre) w gmejnje Sprjewiny Doł zadobyli a tam tójšto škody načinili. Kaž Zhorjelska policajska direkcija rozprawja, rozbichu skućićeljo wšelake techniske nastroje a pokradnychu dwě róli koporoweho kabla. Jeju hódnotu trochuja na 20 000 eurow. Načinjena wěcna škoda wučinja dohromady 5 000 eurow. Technikarjo kriminalneje policije móžachu wjacore slědy zawěsćić a so nadźijeja, zo móža z jich pomocu paduchow dosahnyć.
Policija (08.06.20)
Drohej kolesy fuk
Ćisk. Před kupnicu w Ćisku su njeznaći sobotu popołdnju e-bikaj znački Scott pokradnyli. Přizamknjenej kolesy měještej po informaciji wobsedźerjow hódnotu dohromady 10 000 eurow. Jedna so wo neonzeleno-čorne Genius 710 plus a wo fijałkojto-čorne EGenius Contessa 720 plus. Štóž je něšto wobkedźbował, njech to policiji zdźěli.
Pola frizera pobyli
Wojerecy. Lědma zo smědźa frizerojo zaso dźěłać, su so njeznaći w nocy na sobotu do tajkeho salona we Wojerecach zadobyli. Tam pokradnychu pjeć frizerskich mašinow w hódnoće 500 eurow.
Policija (05.06.20)
Medicina wina była?
Krušwica. Hač bě znaty přirodny lěk „Klosterfrau Melissengeist“ wina na tym, zo měješe šofer tójšto alkohola w kreji, dyrbi nětko policija w Krušwicy wujasnić. Jako zastojnicy awto 59lětneho wčera rano kontrolowachu, jim alkoholowa chorhojčka hnydom napadny. Muž so wurěčowaše, zo měješe problemy ze žołdkom a zo bě lunk woneho srědka pił. Zo pak je tón dwaj promilej alkohola zawinił, je skerje wěrjenjepodobne.
