Policija (03.05.21)
Wulka škoda diesela dla
Cokow. 72 wohnjowych wobornikow Budyskeho wokrjesa dyrbješe 1. meje dźěłać. W 11.30 hodź. alarmowachu Budysku powołansku a dobrowólne wobory z Wjelećina, Kumwałda, Medingena, Wachauwa a Huski. Wudźer bě dopołdnja w skale pola Cokowa na wodźe něšto płuwać widźał, při čimž za dieselom smjerdźeše. Wudźerjo a zastojnicy wućehnjechu dieselowy tank ze skały. Njecyłu hodźinu pozdźišo podachu so wobornicy ze Zemic-Tumic a Korzymja-Rodec z hadźicowym čołmom na wodu a sćehnjechu tam zawěru, doniž něhdźe 90 procentow wuběžaneho wolija njezezběrachu. Připrawichu na to wosebite hubicy, z kotrymiž ma specialne předewzaće přichodne dny wšitko wurjedźić. Policija pad nětko přepytuje.
Policija (30.04.21)
Wobšudnikej pjenjezy přepokazała
Budyšin. Wobydlerku na Budyskej Martina Hoopowej su njeznaći tele dny wobšudźili. 54lětna Budyšanka bě SMSku dóstała, zo ma mužej, kiž so jako jeje syn wudawaše, na konto w Španiskej cyłkownje 3 500 eurow přepokazać. Wona jemu tuž próstwu spjelni. Krótko po tym pak zwěsći, zo njebě to jeje syn, kiž sej pjenjezy žadaše, ale wobšudnik, a přizjewi to policiji. Kriminalna policija pad nětko přepytuje.
Policija (29.04.21)
Hałzy a lisćo so palili
Demjany. Zašłu nóc dyrbjachu dobrowólni wohnjowi wobornicy z Demjan, Huski, Drječina/Warnoćic, Hnašec, Dobruše a Noweje Wsy lěsny woheń při statnej dróze S 119 pola Nowych Demjan hašeć. 45 kameradow ze sydom jězdźidłami bě zasadźenych. Rozhladujo so wuhladachu woni woheń, kotryž běchu wobydlerjo přizjewili. Běše to njezawěsćeny a njehašeny lěhwowy woheń, hdźež bě něchtó lisćo a hałzy zapalił. Wobornicy płomjenja zhašachu. Policija so nětko z padom dale zaběra. Wšako móže tajki kaž wčera spěšnje na wokolne štomy přeskočić.
Policija (28.04.21)
Dwě njezboži na A4
Budyšin. Na awtodróze A4 mjez wotjězdomaj Budyšin-wuchod a Wósporkom je so wčera rano nakładnemu awtu wobruč skóncowała. Za sedłowym wlečakom jěducy Seat njemóžeše so lětacym dźělam wuwinyć a zrazy do njeho. Škoda na jězdźidłomaj wučinja něhdźe 10 000 eurow. Wobaj šoferaj wostaštaj njezranjenaj.
Njezbožo na samsnej čarje pola Połčnicy měješe hrozniše sćěhi. Wokoło 8.30 hodź. bě 59lětny šofer nakładneho awta přepozdźe zwěsćił, zo so wobchad do směra na Drježdźany haći, a zajědźe do před nim stejaceho Lkw-ja. Muž z Běłoruskeje móžeše ćežko zranjeny hišće sam wulězć. Z helikopterom transportowachu jeho do chorownje. 37lětny Polak w awće před nim wosta njezranjeny. Wěcna škoda na jězdźidłomaj wučinja po prěnim trochowanju 60 000 eurow. Wo rumowanje starachu so wohnjowi wobornicy, Techniska pomocna słužba kaž tež sobudźěłaćerjo awtodróhoweje mištrownje. Policija bě čaru dospołnje zawrěła, štož hač do zažneho popołdnja traješe. Tak stejachu čakace awta zdźěla hač k parkowanišću Röderska dolina.
Policija (27.04.21)
Tři Lkw-je do so zrazyli
Budyšin. Na awtodróze A4 njedaloko wotjězda Budyšin-wuchod su wčera popołdnju tři nakładne awta do so zrazyli. Zranił so na zbožo nichtó njeje.
Policija (26.04.21)
Hač do nocy woheń hašeli
Hodźij. Dotal njeznaći běchu wčera wječor w Hodźijskej gmejnje hromady hałzow zapalili. Wokoło 21.30 hodź. alarmowachu wohnjowych wobornikow z Prěčec a Myšec, zo bychu palacu so hromadu w Hodźiju hašeli. Krótko do 23 hodź. dyrbjachu kameradojo z Hodźija na dróze mjez Hodźijom a Darinom hašeć. Tam běchu dotal njeznaći wotpadki zapalili. Dokelž njeje tam blisko žana móžnosć wodu klumpać, wołachu wobornikow z Prěčec wo pomoc. Dobrowólni wohnjowi wobornicy běchu tam hač do pózdnjeje nocy zasadźeni.
Policija (23.04.21)
Drogi brała
Budyšin. Pod wliwom drogow awto wodźiła je předwčerawšim žona w Budyšinje. Zastojnicy zadźeržachu 43lětnu na Nowoměšćanskej dróze. Drogowy test reagowaše pozitiwnje na amfetaminy. Dale jěć žona wězo njesmědźeše. Jeje přeńdźenje budźe po wšěm zdaću droha naležnosć. W normalnym padźe woznamjenja to pokutu 500 eurow, dwaj dypkaj w Flensburgu a měsac zakaz jězdźenja.
Policija (22.04.21)
Nowe wašnje wobšudnistwa
Krušwica. Po wšěm zdaću z nowym wašnjom wobšudnistwa spytaja njeznaći ludźom pjenjezy wulišćić. W Krušwicy chcyše 54lětny muž swoje motorske předać a je internetnje poskići. Na to přizjewi so pozdatny zajimc. Wobaj so pjenježnje dojednaštaj a wučiništaj, zo spedicija mašinu wotewza. 54lětny sposrědkowa swoje kontowe daty, zo móhł „kupc“ sumu přepokazać. Město toho pak dósta wón mejlku banki, po kotrejž měješe najprjedy 500 eurow na italske konto přepokazać. Potom bychu jemu wujednanu sumu přepokazali. Krušwičan čuješe, zo něšto njetrjechi, a přizjewi to policiji.
