Policija (04.02.21)
Na zbožo trik dwójce zwrěšćił
Dubrawka. 83lětny muž w Dubrawce pola Malešec by so předwčerawšim bjezmała z woporom wobšudnika stał. Cuzy powědaše jemu po telefonje wo wobchadnym njezbožu, při kotrymž bě jedna wosoba žiwjenje přisadźiła. Zo njeby dźowka rentnarja do jastwa trjebała, měješe wón 25 000 eurow do Zhorjelca k namjeznemu přechodej přiwjezć. Hišće za čas telefonata pak přińdźe wnučk 83lětneho domoj, zazwoni policiju a tak hóršemu zadźěwa. Tež w Hbjelsku (Gebelzig) w gmejnje Wysoka Dubrawa bychu rentnarku nimale wobšudźili. 15 000 eurow měješe wona zapłaćić, dokelž je dźowka pječa při wobchadnym njezbožu někoho moriła. Staruška tuž na bance dźěl pjenjez wotzběhny. Jako chcyše wona sumu k awtu před domom donjesć, zakroči na zbožo susodka, kotraž to wobkedźbowaše. Awto wotjědźe.
Policija (03.02.21)
Přespěšnje a pod drogami jěł
Wojerecy. We wobłuku kontrole spěšnosće su policisća předwčerawšim na Kinajchtskej dróze we Wojerecach pod wliwom drogow stejaceho šofera lepili. Hdźež je tempo na 30 km/h wobmjezowane, zadźeržachu wodźerja transportera, kiž bě 16 km/h přespěšnje po puću. Zastojnicy přewjedźechu pola 32lětneho drogowy test, kotryž je pozitiwje na amfetaminy reagował. Tuž njezměje so muž nětko jeničce přespěšneho jězdźenja dla zamołwić, ale tež wodźenja awta pod wliwom wopojnych srědkow dla, kaž policija w swojej rozprawje pisa.
Policija (02.02.21)
Kupnicu wobšudźili
Wojerecy. Z woporom njeznatych telefonowych wobšudnikow je so minjenu sobotu kupnica na Wojerowskim Łužiskim naměsće stała. Něhdźe w 17.30 hodź. tam cuzy zazwoni a wudawaše, zo kupnica wěstu ličbu tak mjenowanych Google-Play-kartow hižo předawać njesmě. Njeznaty předawarku namołwi, zo měła jemu cody jednotliwych kartow mjenować. Pozdźišo so wukopa, zo běchu wobšudnicy karty bjezposrědnje po tym na pjenjezy zaměnili. Wojerowskej kupnicy nasta na te wašnje dohromady něhdźe 4 500 eurow škody.
Policija (01.02.21)
Strašny płun zawěsćili
Kamjenc. Rutinowe zasadźenje wuchowanskich mocow wjedźeše předwčerawšim wječor k wohnjowobornemu alarmej w Kamjencu. Krótko do 19 hodź. wołachu sanitetarjow do seniorskeho centruma na Wysokej wo pomoc. Tam měrjenske nastroje pomocnikow pokazachu, zo bě koncentracija wuhlikoweho monoksida w domje přewulka. Na to alarmowachu wohnjowych wobornikow. Kameradojo wšitke stwy ze sensibelnej techniku přepytachu, zo bychu zwěsćili, zwotkel strašny płun pochadźa. Po něhdźe dwěmaj hodźinomaj zasadźenje zakónčichu, dokelž ničo namakali njeběchu a dokelž bě so koncentracija płuna zaso normalizowała. Zranił so nichtó njeje. Dróha před starownju bě sčasami dospołnje zawrjena.
Policija (29.01.21)
Wopity ze skóncowanej swěcu jěł
Budyšin. Chětro hłuboko do piwoweje škleńcy hladał a na to z kolesom domoj jěł je předwčerawšim 43lětny muž w Budyšinje. By-li jeho zadnja swěca fungowała, njeby to najskerje žadyn problem był. Ale tak staj jeho policistaj na Becherowej zadźeržałoj a hnydom pytnyłoj, zo bě wón tójšto pił. Naměriłoj staj pola njeho wjace hač dwaj promilej. Muž dyrbješe swoje koleso stejo wostajić a ze zastojnikomaj sobu jěć, zo bychu jemu krej wotewzali.
Policija (28.01.21)
Tójšto rubizny namakali
Běła Woda. 40 akutočakow, wjacore kolesa, tak mjenowany pocketbike, wšelake družiny drogow kaž ecstasy a crystal, wjetšu ličbu brjendow (Sägeblätter) kaž tež nahladnu sumu pjenjez je policija předwčerawšim při kontroli zahrodoweje chěžki a dweju bydlenjow w Běłej Wodźe namakała. Nimo toho zawěsćichu tam zastojnicy wjacore brónje małeho kalibra, pistole, trašawki, nože a dalše nastroje. Při tym je so zasadźenje poměrnje njespektakularnje započało, jako chcychu 34lětneho wodźerja Seata zadźeržeć. Tón drje najprjedy zasta, na to pak pěši do zahrodoweje chěžki twochny. Tam jeho zastojnicy lepichu. W domčku napadnychu jim wjacore kolesa, kotrež běchu po wšěm zdaću pokradnjene. Zahroda słušeše 33lětnemu. Na přikaz statneho rěčnistwa zahrodu kaž tež bydleni wobeju muži přepytachu. Hač su namakane brónje kmane někoho zranić, abo hač jedna so wo imitacije, to budu nětko fachowcy zwěsćić dyrbjeć.
Policija (27.01.21)
Žadosć za šulu měli
Wojerecy. Z lockdownom zwjazane zawrjenje šulow štyrjom dźěćom we Wojerecach najskerje předołho traje. Po wšěm zdaću mějachu woni tajku žadosć zaso raz do šule hić, zo so předwčerawšim popołdnju po jednym Wojerowskim kubłanišću rozhladowachu. Policisća lepichu před twarjenjom dźesaćlětneho, kiž najskerje stražowaše, a w domje samym třoch jědnaćelětnych. Hač chcychu woni něšto pokradnyć, njeje znate; tež wobškodźili ničo njejsu. Přiwšěm jich policisća powučichu, zo jedna so při rozhladowanju po zawrjenej šuli wo njeskutk. Na to přepodachu dźěći jich staršim. Kaž z rozprawy Zhorjelskeje policajskeje direkcije dale wuchadźa, kriminalna słužba tónle pad dale přepytuje, što dokładnje, tohorunja znate njeje.
Policija (26.01.21)
Drogi w bydlenju měł
Wojerecy. Přepytowanja su policajskich zastojnikow předwčerawšim do domu na Wojerowskej Dróze měra wjedli. Jako woni něhdźe we 18 hodź. do schodźišća zastupichu, jim spodźiwna a zdobom charakteristiska wóń napadny. Na to klinkachu při durjach 39lětneho wobydlerja. W jeho bydlenju so tróšku dokładnišo rozhladowachu a namakachu dohromady 400 gramow konopje kaž tež wšelake nastroje za wužiwanje drogow. Zastojnicy wšitko sćazachu. Tež 39lětny sam steješe pod wliwom drogow, kaž so při wotpowědnym tesće wukopa. Policisća dowjezechu jeho tuž k wotedaću kreje, wzachu wotćišće porstow a muža fotografowachu. Wón změje so nětko přeńdźenja přećiwo zakonjej wo wopojnych jědach dla zamołwić.
Smjertny wopor njezboža
Policija (22.01.21)
Štó dodźerži 30 km/h?
Pančicy-Kukow. Zwjetša měri policija spěšnosć na hłownych dróhach. Druhdy pak hladaja tež za tym, hač šoferojo na pódlanskich spěšnosć dodźerža. Předwčerawšim popołdnju su tuž w Pančicach-Kukowje na Róžeńčanskej kontrolowachu, hač šoferojo předpisane 30 km/h dodźerža. Wot 23 měrjenych jězdźidłow bě šěsć přespěšnych. Najspěšniše awto jědźeše ze 44 km/h nimo kontrolneho městna. Wšitcy lepjeni pak dyrbja jeničce warnowanski pjenjez zapłaćić.
