Wotpadki wotbyć chcyła

Brězowka. Swědk wobkedźbowaše srjedu při Brězowčanskim jězoru, kak chcyše žona runje štyri měchi połne wotpadkow ilegalnje wotbyć. Wón zazwoni policiju. Zastojnicy zwěsćichu w awće 65lětneje dalši měch. Žona dyrbješe wšitko zaso sobu wzać a změje so za to zamołwić.

Młodostny trójce napadnył

Wojerecy. Z njepowučomnym paduchom dyrbješe so předwčerawšim poli­cija we Wojerecach hnydom trójce w běhu popołdnja zaběrać. 18lětneho lepichu najprjedy we wobchodźe na Curiejowej, hdźež chcyše žiwidła za dwaj euraj spakosćić. Hodźinu pozdźišo měrješe so wón w kupnicy na Łužiskim naměsće na słód­čizny za dwaj euraj. Něhdźe we 18 hodź. młodostny znowa na Łužiskim naměsće napadny, dokelž spytaše chipsy a napoje za 13 eurow pokradnyć.

Rozestajenje před cyrkwju

Budyšin. K njemdremu rozestajenju je we wčerawšich zažnych rańšich hodźinach při Budyskej serbskej cyrkwi dóšło. Krótko do 2 hodź. staj mužej w starobje 23 a 26 lět dalšeho 35lětneho zranili. Wuchowanske mocy dyrbjachu jeho lěkarsce zastarać. Bičkaj z tuneziskimi a ruskimi korjenjemi zawostajištaj nimo toho na taksiju zranjeneho tójšto wěcneje škody z tym, zo wulke kwětkowe sudobjo na prědnje wokno awta ćisnyštaj. Kriminalna policija pad přepytuje. Mjez druhim pytaja swědkow, kotřiž su w mjenowanym času snano něšto wobkedźbowali. Pokiwy přijimuja na Budyskim policajskim rewěrje pod telefonowym čisłom 03591/ 35 60.

Pod wliwom drogow do kupy zajěł

Hrańca. Drogi běchu sobu wina na wobchadnym njezbožu, kotrež je so minjenu sobotu w Hrańcy stało. Krótko po 16 hodź. jědźeše tam 18lětny wodźer Peugeota na statnej dróze S 101, jako do wobchadneje kupy zrazy a při tym wobchadnej znamjeni skóncowa. Dohromady nasta 500 eurow škody, awto bu dospołnje wobškodźene. Přiwołana policija přewjedźe pola młodostneho drogowy test a zwěsći, zo bě wón amfetaminy brał. Jeho jězbnu dowolnosć sej zastojnicy hnydom wobchowachu.