Do kolesowarki zajěła

Njeswačidło. Při wobchadnym njezbožu w Njeswačidle je so předwčerawšim kolesowarka snadnje zraniła. Wodźerka Suzukija chcyše tam něhdźe w 9.30 hodź. z Bóščanskeho puća do směra na Wětrow wotbočić. Při tym pak zajědźe po wšěm zdaću přejara nalěwo a tak do čakaceje kolesowarki. 63lětnu, kotraž na to ze swojim kolesom padny a so snadnje zrani, dyrbješe lěkar ambulantnje zastarać. Po informacijach policije wučinja škoda něhdźe 1 200 eurow.

Do traktorow so zadobyli

Kubšicy. Tójšto škody načinili su njeznaći minjeny kónc tydźenja na terenje firmy w Kubšicach. Tam zadobychu so do šěsć traktorow, kotrež stejachu pod hołym njebjom a w halach. Z nich pokradnychu jězdźidłowe kompjutery kaž tež GPS-nastroje. Wěcnu škodu trochuja na něhdźe 15 000 eurow. Hódnota pokradnjenych wěcow wučinja na wšě 80 000 eurow. Fachowcy zawěsćichu slědy, a kriminalisća přewzachu přepytowanja.

Kolesowar smjertnje znjezbožił

Biskopicy. Rjane wjedro je předwčera­wšim mnohich kolesowarjow won wabiło. Bohužel je při tym tež k njezbožam dóšło. W Biskopicach je 69lětny muž z dotal njeznateje přičiny z kolesom padnył, jako po Ramnowskim puću jězdźeše. Wuchowanske mocy dowjezechu jeho do chorownje, hdźež muž na sćěhi zranjenjow zemrě. Při Parcowskim jězoru je so 77lětna ćežko zraniła. Jeje mandźelski jědźeše před njej a dyrbješe zaborzdźić, štož žona přepozdźe pytny a padny. Ju dyrbjachu do chorownje dowjezć.

Pěskecy (SN/MWj). Při tragiskim dźěłowym njezbožu na swojej priwatnej ležownosći je předwčerawšim rano w Pěskecach młody muž žiwjenje přisadźił. 32lětny bě runje při tym, zemju wokoło swojeho domu wurywać, jako so dźěl zakładneje murje sypny a na njeho padny. Přiwołany nuzowy lěkar znjezboženemu hižo pomhać njemóžeše. Přiwuzny muža spěšnje hišće na bok skoči a so na zbožo jeno snadnje zrani. Zasypaneho wućahnyć bě komplikowane a traješe hač do wječora, dokelž hrožeše strach, zo so dom sypnje. Hakle wokoło 18.30 hodź. so poradźi, z pomocu specialneje konstrukcije Techniskeho pomocneho skutka (THW) dom stabilizować, tak zo mó­žachu 32lětneho pod sypnjenej murju wućahnyć. Kaž policija dale rozprawja, su so wo jeho přiwuznych dušepastyrsce starali. Dróha w Pěskecach do směra na Róžant bě za čas zasadźenja dospołnje zawrjena. Nimo sobudźěłaćerjow THW z Budyšina, Kamjenca a Lipska běchu tež wokolne wohnjowe wobory a krizowy interwenciski team zasadźene.

Jastwu runje hišće zadźěwała

Běła Woda. Napołoženu pjenježnu pokutu dyrbiš tež zapłaćić, hewak hrozy jastwo­. Tomu runje hišće raz zadźěwała je předwčerawšim žona w Běłej Wodźe. Ju z přikazom zajeća pytachu, dokelž pokutu zapłaćiła njebě. Jako zastojnicy policajskeho rewěra pola njeje zaklinkachu, wona jim žadanu sumu bjez diskusije přepoda. Bohužel njeje znate, kelko to bě.