Wudy a whisky kradnył

Wojerecy. Hač je paduch wědźał, što na njeho čaka, jako bě so w nocy na wutoru do pincy wjaceswójbneho domu we Wojerecach zadobył? Tam měješe wobydler mjenujcy wjacore hódnotne wěcy składowane, kotrež su nětko fuk. Tak pokradny njeznaty štyri wudy, dźewjeć nawitych rólow kaž tež štyri specielne nože, z kotrymiž móžeš rybu kutlić. Nimo toho je pakostnik dźewjeć blešow whiskyja sobu­ wzał. Rubiznu trochuja na něhdźe 3 000 eurow. Načinjena wěcna škoda je sto eurow.

Bus so wupalił

Ramnow. Techniskeho defekta dla je wčera připołdnju woheń w linijowym busu na zwjazkowej dróze B 98 w Ramnowje wudyrił, kotryž bě z Drježdźan do směra na Biskopicy po puću. W Ramnowje šofer a třo sobujěducy pytnychu, zo so pali. Wodźer při Ramnowskim zastanišću zasta a ze sobujěducymi wulěze. Na to so płomjenja po cyłym busu rozpřestrěchu a jón dospołnje zničichu. Na zbožo so nichtó zranił njeje. Škoda wu­činja něhdźe 20 000 eurow.

Traktor do awta zrazył

Njeswačidło. Wobchadne njezbožo z traktorom sta so wčera rano w Njeswačidle. 64lětny šofer wjele tonow ćežkeho jězdźidła bě z dotal njeznateje přičiny w křiwicy na lěwy bok puća zajěł. Tam drje spyta so wodźerka wosoboweho awta­ wuwinyć, njemóžeše pak zražce hižo­ zadźěwać. 63lětna so snadnje zrani. Ju dowjezechu do chorownje. Wěcna škoda na awće a traktoru wučinja dohro­mady něhdźe 15 000 eurow.

W šuli swjećili

Wojerecy. Njewšědnu městnosć za party běchu sej njeznaći we Wojerecach wu­pytali. W nocy na minjeny pjatk zado­bychu so woni namócnje do twarjenja bywšeho powołanskeho šulskeho centruma na Hasy Liselotty Herrmann. Za to woni z kamjenjom škleńcu wokna roz­bichu. Nutřka sej njeznaći sobu přinjesene napoje a jědźe słodźeć dachu. Nimo toho wočinichu witriny a kamory a rozmjetachu po twarjenju wšitko, štož namakachu. Pokradnyli pak skućićeljo po wšěm zdaću ničo njejsu.