Dźěćo z woknom skočiło

Budyšink. Dramatiske sceny su so dźensa rano w Budyšinku wothrali. Krótko po 7.30 hodź. bě tam we wjaceswójbnym domje na Cyrkwinskim puću woheń w by­dlenju na prěnim poschodźe wudyrił. Dwaj dorosćenej a dwě dźěsći móžachu bydlenje po schodźe wopušćić. Jedne dźěćo pak pobrachowaše. Štyrilětny hólčec bě na zadnim boku twarjenja najskerje w žiwjenskim straše z woknom skočił. Při tym so wón tak ćežko zrani, zo dyrbjachu jeho z helikopterom do chorownje dowjezć. Tamnych štyrjoch swójbnych kaž tež dalšeju wobydlerjow z domu dyrbjachu tohorunja lěkarsce zastarać, dokelž běchu kur do so dychali. Čehodla je woheń w bydlenju wudyrił, njeje znate.

Pčołarja zamknyli

Załom. 81lětneho muža, kotryž so sobotu popołdnju w Załomju runje swoje pčołki zastarowaše, su njeznaći do pčoleńcy zamknyli. Na to pokradnychu woni před wozom elektrokoleso rentnarja w hódnoće 850 eurow a z nim wotjě­dźechu. Hakle mandźelska pčołarja jeho pozdźišo wuswobodźi. Zranił so wón ­na zbožo njeje.

W lěsu drogi plahowali

Hórnikecy. Předwčerawšim popołdnju přizjewi so na Wojerowskim policajskim rewěrje swědk a rozprawješe, zo je w lěsu pola Hórnikec po wšěm zdaću konopjowu plantažu namakał. Tež dweju muži je tam widźał. Na městnje policisća drje nikoho njewuhladachu, za to pak zličichu dwanaće rostlin konopje, něhdźe 50 centimetrow wysokich. Dale zwěsćichu kwětkowcy, wšelki grat, zemju za kwětki a kanistry z wodu.

Wudy a whisky kradnył

Wojerecy. Hač je paduch wědźał, što na njeho čaka, jako bě so w nocy na wutoru do pincy wjaceswójbneho domu we Wojerecach zadobył? Tam měješe wobydler mjenujcy wjacore hódnotne wěcy składowane, kotrež su nětko fuk. Tak pokradny njeznaty štyri wudy, dźewjeć nawitych rólow kaž tež štyri specielne nože, z kotrymiž móžeš rybu kutlić. Nimo toho je pakostnik dźewjeć blešow whiskyja sobu­ wzał. Rubiznu trochuja na něhdźe 3 000 eurow. Načinjena wěcna škoda je sto eurow.