Policija (04.07.19)
Zadobywar so nawróćił
Biskopicy. Dokelž bě so něchtó do jich bungalowa zadobył, wołachu wobsedźerjo zawčerawšim policiju a přepodachu zastojnikam wobrazy wo skućićelu z wobstražowanskeje kamery. Runje w tym wokomiku so podhladny bližeše, dokelž chcyše so znowa do lawby zadobyć. Jako jeho kontrolowachu, poča wón do policistow bić a kopać. Skónčnje pak so zastojnikam poradźi 36lětneho čěskeho staćana přewinyć.
Policija (03.07.19)
Do garažow so zadobyli
Wojerecy. We Wojerecach dyrbjachu předwčerawšim zwěsćić, zo běchu so tam njeznaći minjene tydźenje do wjacorych garažow zadobyli. Z nich pokradnychu wubědźowanske koleso, kašćik z rjemjeslniskim gratom, nahłownik za motorskeho a surfowansku desku w cyłkownej hódnoće 1 700 eurow.
Policija (02.07.19)
Kradnjene motorske namakali
Zhorjelc. Při kontroli transportera na parkowanišću při awtodróze A 4 pola Zhorjelca namakachu policisća minjenu sobotu pokradnjene motorske typa Kawasaki. Třoch sobujěducych nachwilnje zajachu. Motorske w hódnoće 7 000 eurow bu w nocy do toho w Drježdźanach pokradnjene. 49lětna wobsedźerka hakle wot policije zhoni, zo bě jeje mašina fuk. Po wotzamknjenju kriminalnotechniskich dźěłow jej motorske zaso wróćichu. Na próstwu statneho rěčnistwa so zawčerawšim jatbowy sudnik z třomi mužemi w starobje 22 do 28 lět zaběraše. Wón rozsudźi, zo přińdu woni do přepytowanskeje jatby. Samsny dźeń jich tuž tam dowjezechu.
Policija (01.07.19)
Na polach a w lěsach so paliło
Hućina. Při ekstremnje horcym a suchim wjedrje je wčera na wjacorych městnach Hornjeje Łužicy k wohenjam dóšło. Tak je so při žnjenskich dźěłach pola Hućiny polo palić započało. Płomjenja přeskočichu na składowansku halu za syno a słomu a zničichu ju. Dalši woheń je na žitnišću w Bólericach pola Sepic wudyrił a so samo na susodny lěs rozpřestrěł. 100 wobornikow z 50 jězdźidłami bě zasadźenych. Někotrych wobydlerjow z Bóleric dyrbjachu ewakuować. Hižo sobotu bě woheń na polu blisko Brězowki tři hektary nazymskeje pšeńcy zničił a so skónčnje na hektar lěsa rozpřestrěł. Na zbožo so nichtó zranił njeje.
Policija (28.06.19)
Swědk padustwo wobkedźbował
Běła Woda. Paduši kolesow po wšěm zdaću dźeń a zasaklišo zachadźeja a njedadźa so najskerje ani wot swědkow wotdźeržeć. Hinak njehodźi so rozjasnić, štož je so předwčerawšim w Běłej Wodźe stało. Tam je swědk wobkedźbował, kak njeznaći přez płót ležownosće zalězechu a zamk kolesa přerězachu. Samo jako wobkedźbowar skućićelow narěča, njedachu so woni wot swojeho njeskutka wotdźeržeć. Z pokradnjenym mountainbikom typa KTM w hódnoće 1 150 eurow paduši ćeknychu. Policija nětko mjezynarodnje za kolesom pyta.
Policija (27.06.19)
Zawinowarja njezboža wuslědźili
Brěžki. Dźakowano pokiwam wobydlerjow wuslědźichu nětko zawinowarja wobchadneho njezboža, kotrež bě so tydźenja mjez Brěžkami a Kulowcom stało. Tam bě so wodźer slěbrobarbneho Nissana mopeda šmórnył a ćeknył. 17lětny mopedist a 13lětna sobujěduca so zdźěla ćežko zraništaj. Kaž policija zdźěli, bě 62lětny muž zražku zawinował. Wón změje so nětko ćeknjenja z městna njezboža a zapowědźeneje pomocy dla na sudnistwje zamołwić.
Policija (26.06.19)
W bydlenju tójšto namakali
Wojerecy. Kabl na kolesowym připowěšaku młodeho muža je předwčerawšim kedźbnosć policije we Wojerecach zbudźił. Kaž so wukopa, bě młody Syričan kabl pokradnył. Nimo toho namakachu pola njeho titku z drogami. Jako sej zastojnicy na to hišće bydlenje 19lětneho bliže wobhladachu, wuhladachu w nim dalše titki z drogami, wšelake dźěle kolesow a hrajnych awtomatow kaž tež pistolu. To bě přičiny dosć, zo młodeho Syričana zajachu.
Policija (25.06.19)
Z nožom do muža kłół
Budyšin. Ze strašnym zranjenjom ćěła skónči so wčera připołdnju rozestajenje mjez mužomaj na Budyskej Serbskej hasy. Dotal njeznaty muž je tam wjacore razy do 33lětneho kłół a na to ćeknył. Zranjeneho dowjezechu do chorownje. Policija za skućićelom pyta.
Policija (24.06.19)
Paduchow na awtodróze lepili
Budyšin. Wjacore razy za sobu posłužowachu so zawčerawšim paduši w nakupowanišću na Delnjokinjanskej dróze w Budyšinje. Mužej w starobje 22 a 34 lět kaž tež 26lětna žona wzachu sej parfim, drastu a alkohol z polcow, wotnjesechu wšitko do parkowaceho awta a wróćichu so do kupnicy. Na te wašnje nakopichu twory w cyłkownej hódnoće 1 570 eurow. Jako kupnicowy detektiw to pytny, informowaše wón policiju. Ta padušnu trójku skónčnje na awtodróze A 4 dosahny. Dokelž je přećiwo 34lětnemu hižo přikaz zajeća předležał, dowjezechu jeho do jastwa. Tamneju su po policajskich naprawach pušćili.
Policija (21.06.19)
Pytaja skóncowane awto
Brěžki. Zhorjelska wobchadna policajska inspekcija zaběra so z wobchadnym njezbožom, kotrež je so wčera krótko po połnocy na statnej dróze S 285 mjez Brěžkami a Kulowcom stało. 17lětny młodostny a 14lětna sobujěduca běštaj tam z motorskim po po puću. Z dotal njeznateje přičiny dóńdźe k zražce z wosobowym awtom, při čimž so wobaj młodostnaj zraništaj. Jeju dyrbjachu do chorownje dowjezć. Zawinowar/ka pak ćekny. Na městnje njezboža namaka policija zbytki skóncowaneho lěweho wonkowneho špihela a dalšich dźělow awta. Kaž puzzle su je hromadźe zestajili a dźakowano informacijam awtowych wikowarjow móžachu potrjechene jězdźidło do dalokeje měry identifikować. Kaž policija zdźěli, jedna so wo slěbrošěry Suzuki Ignis, twarjeny w času wot 2003 do 2007. Na prědnim lěwym boku wokoło špihela je wón skóncowany. Tohodla pytaja nětko swědkow, kiž móhli pokiwy k tajkemu jězdźidłu podać abo kotřiž su skóncowane awto wčera abo dźensa něhdźe widźeli. Pokiwy přijimuja pod telefonowym čisłom 03591/ 36 70.
