Policija (01.02.19)
Serwis smjerć drohi był
Ottendorf-Okrilla. Mnozy drje su hižo situaciju dožiwili, zo stejachu před swojimi chěžnymi durjemi, ale njemějachu kluč při sebi. Tele małe njezbožo bě za žonu w Ottendorfje-Okrilli nětko chětro drohe. Přez hotline zazwoni wona klučowy serwis, kiž jej wězo hnydom pomocliweho sobudźěłaćerja pósła. Po zdokonjanym dźěle pak wupisa wón zličbowanku we wysokosći 919,15 eurow. Žona čuješe so w tym wokomiku najprjedy raz winowata, zličbowanku na městnje zapłaćić. Pozdźišo so wona tola hišće z tutej naležnosću na policiju wobroći. Kriminalisća přepytuja tónle pad nětko lichowarstwa (Wucher) dla.
Policija (31.01.19)
Dowolnosć a konop sćazali
Rakecy. Z njepowučomnym wobydlerjom dyrbjachu so policisća zawčerawšim w Rakecach zaběrać. Po přikazu sudnistwa měješe wón jězbnu dowolnosć wotedać, štož pak dotal činił njebě. Jako zastojnicy do jeho bydlenja zastupichu, wuhladachu tam konopjowe rostliny a marihuana. Tuž njesćazachu jeno jězbnu dowolnosć, ale tež njejapku namakanku. To pak 33lětneho scyła njemyleše, přetož bórze na to wón zaso za wodźidłom swojeho awta sedźeše. Policisća wšak jeho při tym lepichu.
Policija (30.01.19)
Spěšnosć měrili
Njebjelčicy. Na statnej dróze S 94 je policija póndźelu při wotbóčce do Njebjelčic spěšnosć měriła. W běhu třoch hodźin kontrolowachu 1 730 wozydłow. W 51 padach wosta při warnowanju. Wosom šoferow změje pokutu płaćić. Rekord docpě awto z Budyskim čisłom, kotrež při dowolenych 70 km/h ze 118 km/h nimo smaleše. Šofer změje nětko 160 eurow pokuty płaćić, dóstanje dypkaj w Flensburgu a dyrbi měsac nóžkować.
Policija (29.01.19)
Kwětki kradnył
Kulow. Štóž je minjenu sobotu w Kulowje abo wokolinje kwětki darjene dóstał, by so radšo prašeć měł, zwotkel wone su. Dopołdnja mjenujcy měješe kwětkowy wobchod na Kulowskim Kolpingowym naměsće njeprošeny wopyt. Tam je njeznaty kwěćel w hódnoće 13 eurow pokradnył. Předawarka runje žonu poradźowaše, jako muž do wobchoda zastupi, so skrótka rozhladowaše a so wotsali. Hakle na to zwěsćichu, zo kwěćel pobrachuje. Po wuprajenju předawarki bě muž něhdźe 180 centimetrow wulki, sylneje postawy a měješe blond, trochu kudźerjate włosy. Woblečeny bě žołto-zeleny kabat. Podobne wopisanje zdźělichu policiji z dalšeju kwětkoweju wobchodow na torhošću. Tam pak so mužej přiležnosć k padustwu skićiła njebě.
Policija (28.01.19)
Jandźel pěston kedźbował
Ćisow. Z dotal njeznateje přičiny je zawčerawšim popołdnju 43lětna wodźerka wosoboweho awta na zwjazkowej dróze B 97 mjez Wojerecami a Njedźichowom při wotbóčce do Ćisowa na lěwy bok puća zajěła. Tam zrazy do dweju štomow, při čimž so ćežko zrani. 21 měsacow stare dźěćo měješe porno tomu kedźbliweho jandźela pěstona a wosta njezranjene. Wosobowe awto pak bě dospołnje skóncowane.
Policija (25.01.19)
Paduši w meblowym wobchodźe
Rakecy. Jako sobudźěłaćerka Rakečanskeho mebloweho wobchoda zawčerawšim rano na dźěło přińdźe, dyrbješe zwěsćić, zo su tam paduši pobyli. Kaž policija zdźěli, běchu so njeznaći z woknom do twarjenja na Jitkowskim puću zadobyli. Přepytachu tam wšitke rumnosće, su namócnje kasu wočinili a z njeje pjenjezy wzali. Cyłkownu škodu trochuja na něhdźe 500 eurow.
Policija (24.01.19)
Dalšej pospytaj znatej
Lubuš. Po tym zo je so póndźelu we Wojerecach rentnarka z woporom telefoniskeho wobšudnistwa stała, buštej nětko dalšej pospytaj znatej. Tak je tohorunja póndźelu cuza wosoba 88lětneho muža w Lubušu zazwoniła, jako wnučka so wudawała a wo pjenjezy prosyła. Samsne sta so tón dźeń we Łutach pola 85lětneje žony. Wobaj pak běštaj kedźbliwaj.
Policija (23.01.19)
Sanki pokradnjene
Běła Woda. We wjaceswójbnym domje w Běłej Wodźe su njeznaći minjene dny sanki pokradnyli a tak jeho wobsedźerjam wjeselo nad tuchwilnej zymu trochu skazyli. Swójba bě 80 eurow drohe sanki 13. januara na chódbu domu stajiła, zo bychu schnyli. Dwaj dnjej pozdźišo běchu wone fuk. Nadźija, zo bě je něchtó ze sobuwobydlerjow zrumował, so bohužel njespjelni. Swójba tuž padustwo na policajskim rewěrje přizjewi.
Nalutowanki zhubiła
Wojerecy. 85lětna žona sta so zawčerawšim we Wojerecach z woporom jebakow. Rentnarku bě njeznata žona zazwoniła, so jako přiwuzna wudawała a jej powědała, zo ma pjenježne starosće. Na te wašnje prošeše wo wjacore tysacy eurow – a dósta je tež. Něhdźe poł hodźiny po telefonaće cuzy muž pjenjezy pola staruški wotewza. Hakle po tym rentnarka na cyłej wěcy dwělować započa a zazwoni policiju. Kriminalisća pad nětko přepytuja. Nalutowanki Wojerowčanki pak su po wšěm zdaću fuk.
Policija (22.01.19)
Stajnje zaso alkohol
Łaz. Hnydom štyrjoch wopitych wodźerjow awtow lepichu njedźelu zastojnicy Wojerowskeho policajskeho rewěra. Tak kontrolowachu we Łazu 49lětneho wodźerja Daewoowa a naměrichu pola njeho připołdnju 1,36 promilow alkohola w kreji. Njecyłu hodźinu do toho zwěsćichu pola 58lětneho šofera Škody we Wojerecach 0,84 promilow. Krótko do 19 hodź. bě wodźer VWja na Salowskej dróze w Kulowje po puću. Dokelž policistam při kontroli jeho chorhojčka napadny, přewjedźechu test a zwěsćichu 0,92 promilow. Nimo toho muž ani jězbnu dowolnosć njeměješe. Njesławny rekord docpě krótko na to 42lětny wodźer Mitsubishija w Bórku z 2,5 promilemi – tohorunja bjez jězbneje dowolnosće.
Policija (21.01.19)
Z jězdnje do přirowa zjěł
Wóspork. We wčerawšich rańšich hodźinach kedźbliwy swědk policiji zdźěli, zo na statnej dróze S 111 mjez Wósporkom a Budyšinom wosobowe awto ze zaswěćenej swěcu w přirowje steji. Kaž policisća zwěsćichu, bě jězdźidło zamknjene, wot šofera pak ničo widźeć njebě. Krótko na to so tam młoda žona zjewi a za swojim přećelom pytaše, kotremuž VW Caddy słušeše. Přećel bě mjeztym wotwlečensku firmu zazwonił a z jeje specialnym jězdźidłom k městnu njezboža přijěł. Na prašenje zastojnikow, čehodla bě na runym puću do přirowa zjěł, muž wotmołwi, zo bě mučny. Alkoholowy test pola njeho wunjese wjace hač hodźinu po wobchadnym njezbožu 0,48 promilow alkohola w kreji. Na awće nasta něhdźe tysac eurow škody. 23lětny změje so nětko wohroženja nadróžneho wobchada dla zamołwić.
