Žarowanje a politika
To a tamne (13.10.26)
Po wjace hač 27 hodźinach su wohnjowi wobornicy slědźerja z prózdnjeńcy na Sardiniskej wuchowali. 31lětneho wuchowachu z masow walankow, zdźělichu zamołwići. Sypnjena skłonina hory bě Italčana předwčerawšim we hłubokosći něhdźe dźesać metrow zamjetała, walanki běchu zachod do prózdnjeńcy Urzulei zasypali. Cyłu nóc a wčera dopołdnja běchu za mužom pytali.
Po smjerći krala Haralda V. njeje norwegska kralowna Sonja (89) po podaćach na webstronje kralowskeho domu hižo oficialnje z dźělom kralowskeje swójby. Město toho wozjewjeja jeje portret mjeztym pod kategoriju „dalši swójbni“. Ke kralowskemu domej słušeja nětko jenož hišće nowy kral Haakon VIII., jeho žona Mette-Marit a princesna Ingrid Alexandra.
Apel nabožinow
Metz (B/SN). Na kóncu njedawneho přebytka w Francoskej zawjaza so bamž Leo XIV. zhromadnje z ortodoksnymi, ewangelskimi a katolskimi křesćanami, muslimami, židami a buddhistami, za měr, sprawnosć, čłowjeske prawa a škit planeta wustupować. W apelu rěka: „Rozeznawamy so w nabožnych přeswědčenjach, ale zhromadny bój wo měr na swěće a čłowjesku dostojnosć kóždeho čłowjeka nas jednoći.“
Přemóžace medialne echo
Metz (B/SN). Wopyt bamža Leja XIV. je w Francoskej hłuboki zaćišć zawostajił. 800 000 Francozow a 120 tamnišich biskopow jeho zahoriće witaše. Medialne echo bě přemóžace. Wosebje spóznajomny na wopyće bě jasny cyrkwinski a politiski profil Leja. Z Ameriki pochadźacy bamž je ideju zjednoćeneje Europy z jeje wodźacej kulturu za tolerancu, dialog a prawo chwalobnje wuzběhnył.
Dlěše žiwjenje mnichow
Bamž operaciju připowědźił
Rom (dpa/SN). Na njedźelnišim připoł-dnišim modlenju we Vatikanje je bamž Leo XIV. před dźesaćitysacami wěriwych njewočakujo připowědźił, zo změje w běhu přichodnych dnjow operaciju. Lěkarjo su pola 71lětneho suk w płucach nadešli, kotryž chcedźa wotstronić. Hač dyrbi tohodla swoju spočatk nowembra planowanu jězbu přez Uruguay, Argentinsku a Peru wotprajić, tuchwilu jasne njeje.
Huthi lětanišći nadpadowali
Riad/Sanaa (dpa/SN). Po sobotnišim nadpadźe na mjezynarodne lětanišćo w sawdiskej stolicy Riadźe, kotrehož dla je dwanaće ludźi zemrěło a 309 so zraniło, je jemenitiska Huthi-milica tež dźensa w nocy ze swojimi atakami pokročowała. Při poslednim nadpadźe na dalše wulke lětanišćo Zjednoćenych arabskich emiratow King Chalid zemrě wčera pakistanski staćan. Wo tym informowaše sawdiski lětanski zarjada. Jědnaće wosobow so zrani.
EU sylne sankcije wobzamknyła
Hač na poslednje městno wobsadźena běše tachantska cyrkej minjeny ...
Zahaja wutwar kolijow w Radušu
Bas wotstupi
Trump žada sej wotstup Zelenskeho
Washington/Kyjiw (dpa/SN). „Je na času, zo Ukraina noweho prezidenta dóstanje, kiž je zwólniwy, wójnu z Ruskej skónčić“, to je prezident USA Donald Trump wčera w krótkim interviewje z reporterami na knježerstwowym lětanišću Joint Base Andrews zwuraznił. Po měnjenju Trumpa maja sej Ukrainjenjo noweho prezidenta pytać, kotryž docpěje wuspěšne dojednanje za skónčenje wójny.
Runja mnohim demokratiskim kaž tež republikanskim zapósłancam w ameriskim kongresu je ukrainski prezident Wolodymyr Zelenskyj krótko do toho plany Trumpa kritizował. Tón chce mjenujcy diesel z Ruskeje importować. Dokelž steji Trump wysokich płaćiznow za ćěriwa dla w kraju pod sylnym ćišćom, je so wón z ruskim prezidentom Putinom dorozumił: Ruska ma USA dohromady 300 000 tonow diesela dodawać. To wozjewi wón předwčerawšim na swojim powěsćowym kanalu Truth Social. Krjeml to krótko po tym w nowinskej zdźělence wobkrući. Mnozy europscy politikarjo su Zelenskemu wčera swoju krutu podpěru zwuraznili.
Jednota Němskeje wuspěšna?
Budyska narěč Thomasa de Maizièra mnoho připosłucharjow přiwabiła
Budyšin (CS/SN). Prašenje, hač je so zjednoćenje Němskeje radźiło abo nic, to wjele ludźi jima – tež w Budyšinje. Tuž njezadźiwa, zo běše zajim za Budysku narěč, w kotrejž so bywši zwjazkowy zakitowanski minister Thomas de Maizière tutej temje wěnowaše, přemóžacy wulki. Tachantska cyrkej minjeny pjatk bě kopaće połna.
„Zjednoćenje Němskeje běše wulkotny a zbožowny stawizniski podawk“, podšmórny de Maizière na spočatku swojeje narěče. Lětstotki dołho běchu europske hranicy zwadliwe – po 3. oktobrje 1990 běchu wone jasne. „Statne zjednoćenje je dokónčene“, zwěsći politikar CDU. Porno tomu pak nutřkownu jednotu hišće docpěli njejsmy, wón přispomni. Jednota a mjezsobna přezjednosć „stej wšelakej poraj črijow“. Zo pak na kóncu wšitcy jenacy smy, to njeměł naš zaměr być. Město toho dyrbjeli sej jedyn druhemu rozdźělnosć popřeć.
