Zaso štyri lěta čakać!
Frustrěrowacy kónc za Němsku
Kajka bě to dramatiska hra dźensa w nocy! Němska drje je bul a hru nimale cyły čas kontrolowała. Najebać to docpě přećiwnik w šěsnaćifinalu mišterstwa – wubranka z Paraguayja – w 42. mjeńšinje prěnje wrota. Po přestawce poradźi so němskemu koparjej Kaijej Havertzej w 54. mjeńšinje zastatk wurunać. W podlěšenju hry, w 102. mjeńšinje, zhłójčkowa Jonathan Tah samo druhe wrota za němski team. Tola sudnik zniči wšu euforiju němskich fanow a němskeho mustwa, dokelž wrota pozdatneho foula na wrotarju dla po pruwowanju wideja zaso wróćo sćahny. Potajkim dyrbještej mustwje hru z třělenjom jědnatkow rozsudźić. Paraguayscy hrajerjo mějachu lěpše čuwy a na kóncu dobychu.
Na Sprjewi so wubědźowali
To a tamne (30.06.26)
Portret wo sebi je bywša kanclerka Angela Merkel (CDU) za galeriju portretow w kanclerskim zarjedźe wot dotal njeznateho němsko-francoskeho molerja Jérémieja Queyrasa zhotowić dała. W Berlinskim Bode-muzeju jón dźensa zjawnosći předstaja. Tam budźe mólba tři měsacy wustajena, doniž do kanclerskeho zarjada njepřećehnje.
Mobilny pool w připowěšaku nakładneho awta je sej minjeny kónc tydźenja 52lětny Silvio Hoffmann z Radebeula stworił. Hladajo na přepjelnjene kupjele běše so šefa logistiskeho předewzaća, w kotrymž dźěła, woprašał, hač smě sej nakładne jězdźidło krótkodobnje wupožčić. Hromadźe z přećelemi wukładźe připowěšak z tołstej foliju a po tym zo běchu jón z něhdźe 15 kubiknymi metrami wody napjelnili, skočichu zhromadnje do wody.
Přepytowanje k wólbam
Köln (B/SN). Po online-naprašowanju YouGov w nadawku katolskeje powěsćernje mjez 1 793 wosobam w starobje wot 18 lět srjedź junija bychu katolikojo a ewangelscy křesćenjo rědšo stronu AfD wolili – wobě skupinje po 24 procentach – hač cyłkowne wobydlerstwo z 32 proc. Němska biskopska konferenca a Ewangelska cyrkej w Němskej stej wospjet wuzběhnyłoj, zo njemóža křesćenjo AfD wolić, pisa katolska powěsćernja.
Nadpady na židow
Berlin (B/SN). Zwjazk Rias je w swojej lětnej rozprawje loni 8725 nadpadow na židow w Němskej registrował, trójce telko kaž do nadpada Hamas na Israel. Wjace hač dwě třećinje – 5 916 padow – wuchadźeštej z antisemitizma přećiwo Israelej. Pady z prawicarsko-ekstremnym pozadkom su wo dźewjeć proc. stupali.
Dušepastyrske zastaranje
Wojuja wo kóždeho zasypaneho
Caracas (dpa/SN). Po zahubnym zemjerženju we Venezueli minjenu srjedu su wuchowanske słužby tež wčera hišće žiwych z rozpadankow wuryli. „Tohodla z wuchowanskimi dźěłami nadal pokročujemy“, komisariska prezidentka kraja Delcy Rodríguez wčera wuzběhny. Eksperća měnja, zo maja zasypani po třoch dnjach lědma hišće šansy přežiwić. Něhdźe 1 450 ludźi je zemjerženja dla zemrěło, něhdźe 3 200 Venezuelčanow je zranjenych.
Israel genocid připóznawa
Jerusalem (dpa/SN). Israelske knježerstwo je genocid Osmaniskeho mócnarstwa na Armenjanach před wjace hač 110 lětami oficialnje připóznało. Kabinet je wotpowědny namjet wonkowneho ministra Gideona Saara jednohłósnje přiwzał. Dokelž nochcychu politiscy zamołwići poćahi k turkowskemu statej wohrožować, běchu wšelake pospyty w israelskim parlamenće w zańdźenosći zwrěšćili. Mjezsobne poćahi wobeju krajow pak su so minjene lěta spochi pohubjeńšili.
Cile w Afghanistanje nadpadnyli
Wjacore lěsy w Němskej su so kónc tydźenja wulkeje suchoty dla ...
Kritizujetaj plany VW
Šwikawa (dpa/SN). Minjeny tydźeń je němski awtotwarc VW drastiske lutowanske naprawy připowědźił. Wot dohromady wjace hač 600 000 dźěłowych městnow po cyłym swěće chcedźa zamołwići koncerna něhdźe 100 000 městnow šmórnyć. Wšitkim štyrjom němskim zawodam VW, mjez nimi tež Šwikawskemu, hrozy zawrjenje. Hladajo na to staj so sakski ministerski prezident Michael Kretschmer (CDU) kaž tež sakski hospodarski minister Dirk Panter (SPD) kónc tydźenja w zdźělence němskeje powěsćernje dpa słowa jimałoj.
Po měnjenju Kretschmera njesměł Zwjazk zawrjenje němskich zawodow dopušćić. „Hdyž předewzaće kaž VW swoje němske stejnišća spušći, je to fatalny signal za cyłu Němsku“, wón podšmórny a doda: „Němska dyrbjała zaměr měć, mjezynarodne hospodarske wubědźowanje dobyć. Za to dyrbjeli produkciske kóšty miniměrować a produktiwitu stopnjować.“
1 300 mortwych wulkeje horcoty dla
Genf (dpa/SN). Po měnjenju předsydy Swětoweje strowotniskeje organizacije (WHO) je tuchwilna žołma horcoty z rekordnymi temperaturami w Europje za sta zemrětych sobu zamołwita. „Wot 21. junija smy w Europje wjace hač 1 300 přidatnych smjertnych padow registrowali, kotrež w bjezposrědnim zwisku z wysokimi temperaturami steja“, piše Tedros Adhanom Ghebreyesus na platformje za krótkopowěsće X. Wón doda: „Europa je tón kontinent na swěće, kotryž so najspěšnišo woćopla – dwójce tak spěšnje kaž globalny přerězk“.
Tuchwilu ćerpi něhdźe 150 milionow ludźi pod wuskutkami ekstremneje horcoty. Bydlenja, dźěłowe městna, šule a dróhi w Europje za tajke temperatury konstruowane njejsu, wuzběhuje Tedros. Hižo minjeny tydźeń běše wón warnował, zo liči WHO po cyłym swěće lětnje z něhdźe poł milionom zemrětych w zwisku z horcotu. Tejle wulkej ličbje móhli přidatne škitne naprawy zadźěwać, nawoda WHO zwurazni.
Brónje jenož skrótka mjelčeli
Iran a USA najebać dojednany přiměr z nadpadami pokročowałoj
Washington (dpa/SN). Po tym zo běchu so USA a Iran před dobrym tydźenjom na kónc wojowanjow w Hormuskim přeliwje dojednałoj, su Zjednoćene staty dwě nocy za sobu cile w Iranje atakowali. Jako přičinu za to mjenuja zamołwići USA iranski nadpad minjeny štwórtk na tankowc, kotryž běše z Katarskeho přistawa do Zjednoćenych arabiskich emiratow (VAE) po puću. Jako reakciju na nowe nadpady USA je iranske wójsko znowa wojerske stejnišća USA w Bahrainje a Kuwaiće bombardowało.
