Zakaz skakanja w stadionje płaći za fanow koparskeho kluba druheje zwjaz­koweje ligi VfL Bochum wot přichodneho tydźenja. Fachowcy běchu tam w běhu twarskich dźěłow zwěsćili, zo móhło zhromadne rytmiske skakanje mnohich ludźi k sylnemu čumpanju tribuny, tak mjenowanemu trampolinowemu efektej, wjesć. „Tute čumpanje móže mjakliwosć wuskutkować“, pisaja zamołwići kluba w nowinskej zdźělence. Měšćanski zarjad Bochuma podšmórny, zo statika woclobetonoweho twara přez to wohrožena njeje.

Smjertnje znjezbožili su štyrjo młodostni w starobje mjez 14 a 19 lětami wčera wječor blisko gmejny Biesenthal w braniborskim wokrjesu Barnim. 61lětny šofer chcyše ze swojim awtom přesćahnyć a zrazy frontalnje do napřećo přichadźaceje skupiny młodych ludźi z mopedami.

SPD a Zeleni kritizuja CDU raznje a žadaja sej wujasnjenje eklata

Magdeburg/Berlin (dpa/SN). Po tym zo su zapósłancy krajneho sejma w Saksko-Anhaltskej prěni raz politikarja AfD do zastojnstwa prezidenta parlamenta wo­lili, sej SPD nětko na zwjazkowej runinje z koaliciskim partnerom CDU rozmołwu žada. Z pochodom pod Braniborskimi wrotami protestowachu socialdemokraća přećiwo wólbam Tobiasa Rauscha za prezidenta­ parlamenta Saksko-Anhaltskeje. W Berlinje diskutuja dźeń a wótrišo wo tak mjenowanej wohnjowej muri, potajkim wo jasnym wotmjezowanju CDU wot AfD kaž tež Lěwicy.

Budyšin (SN/mb). Serbske ewangelske towarstwo (SET) hotuje so na lětušu hłownu zhromadźiznu. Wona so na zwučene wašnje na dnju reformacije, 31. winowca, zjawnje wotměje, a to lětsa w Poršicach w Kubšiskej gmejnje. Nutrnosći w 14 hodź. w cyrkwi přizamknje so zeńdźenje we wosadnym domje při farje, kaž předsyda SET Mato Krygaŕ informuje. Wšitcy zajimcy su wutrobnje přeprošeni. Po rozprawomaj předsydstwa a rewizorow chcedźa namjety za dalšu dźěławosć towarstwa rozjimać, doniž so dr. Anja Pohončowa, wědomostna sobudźěłaćerka wotrjada za rěčespyt Serbskeho instituta, temje „Rěčne kućiki. Kak móžu swoju serbšćinu polěpšić?“ njewěnuje. Kónc zarjadowanja budźe wokoło 17 hodź.

Kaž Mato Krygaŕ wčera w rozmołwje z našim wječornikom wuzběhny, su nimo čłonow towarstwa „hosćo, kotřiž so za serbske ewangelske wosadne žiwjenje zajimuja, lubje witani.“ Towarstwu přisłuša tuchwilu 51 čłonow, z tym je ličba nadal stabilna. Skutkownosć saha mjeztym tež do syćow interneta. Tak je kanal „serbskafararka“ Jadwigi Malinkoweje na Instagramje z techniku podpěrało.

Berlin (dpa/SN). Zwjazkowa ministerka za swójby Karin Prien (CDU) chce swój plan za nowe, tak mjenowane lěto za towaršnosć nětko spěšnje zakonsce zapisać dać. „Chcemy faktisce wšěm tym, kotřiž to chcedźa, prawniski zakład za to dać, zo móža swoju słužbu zahajić. Słužba ma financielnje atraktiwniša być hač tuchwilna dobrowólna słužba, tak zo zamóženje staršeju hižo njerozsudźi, hač móže sej něchtó tajku słužbu dowolić“, rjekny Prien powěsćerni dpa po puću z Kyijwa domoj.

Twarja drje nowu trasu

Berlin (dpa/SN). Za nowotwar wažneje železniskeje trasy mjez Hannoverom a Hamburgom je so zwjazkowy sejm nětko wuprajił. Wobchadny wuběrk wobkrući, zo je železnica zažne planowanje wotzamknyła, kotrež nowotwar trasy předwidźi. Wuběrk pak sej nimo toho na hižo wobstejacej čarje bytostne polěpšenja žada. Jutře, štwórtk, ma so cyły sejm z temu zaběrać.

Knižne wiki zahajene