Hašenje baterijow wužadanje było
Z dotal njeznatych přičin je so wutoru popołdnju skład baterijow na Schliebenowej w Budyšinje zapalił (SN rozprawjachu). W bliskosći palacych so kontejnerow bydlacy měšćenjo njesmědźachu hač do wčerawšeho popołdnja do swojich bydlenjow. W kontejnerach běchu litium-ionowe baterije, kotrež jědojte maćizny do powětra wotedawachu.
Budyšin. (SN/jp) Baterije z litium-ionow, kiž běchu so zapalili, reaguja na móličke chabłanja miliny a je w krótkim času wurunaja. Woheń w tutym rozměrje a z tutymi maćiznami w Němskej dotal wudyrił njebě. Tuž bě zasadźenje premjera za wohnjowych wobornikow a wšě wobdźělene wuchowanske mocy. Tohodla běše za nich ćežko, wotběhi prawje rjadować a dyrbjachu wusko z ekspertami za baterije hromadźe dźěłać.
Nuzowy staw wohenjow dla
Madrid (dpa/SN). Ćežkich lěsnych wohenjow dla je Španiska za wokolinu stolicy Madrida a dalši region nuzowy staw wuwołała. Nutřkowne ministerstwo je w nocy připowědźiło, zo sćele dalšich pomocnikow k wotwobaranju płomjenjow. Operatiwne komando je wojerska krizowa jednotka přewzała, kotraž je nětko direktnje při knježerstwje zarjadowana. Zdobom steji z wuwołanjom nuzoweho stawa narodneho rozměra wjace pjenjez k dispoziciji. Wohenjow dla dyrbješe wjace hač 11 500 ludźi swoje domy wopušćić.
Skućićelow krajam přepodali
Drježdźany (dpa/SN). Wot spočatka zašłeho lěta su wěstotne mocy 102 mjezynarodnje pytanych abo zasudźenych skućićelow ze Sakskeje do wukraja přepodali. Wo dalšich 63 wosobach na Drježdźanskim generalnym statnym rěčnistwje jednaja, zarjad dźensa zdźěli. Informacije poćahuja so na dobu wot 1. januara 2025 do 18. julija 2026. Skućićelow su nimale wšitkim krajam EU, tež statam kaž Norwegskej, Šwicarskej, Moldawskej, Turkowskej abo Wulkej Britaniskej přepodali.
Ludźo mało kupuja
Při Bodamskim jězorje maja wobsedźerjo čołmow mało wody dla ...
Po atace zemrěł
Nowe bankowki
Merz personalije předstajił
Awtotwarc z negatiwnej bilancu
Wolfsburg (dpa/SN). Koncern Volkswagen (VW) je w druhim kwartalu wozjewił, zo je wospjet mjenje wobrota nadźěłał. Wot apryla do junija je wuslědk koncerna po dawkach wo 32,9 procentow na 1,54 miliardy eurow woteběrał, najwjetši twarc awtow w Europje dźensa we Wolfsburgu zdźěli. W druhim kwartalu loni bě VW pod smužku 2,29 miliardow eurow zasłužił, štož bě tohorunja hižo mjenje hač lěto do toho, mjenujcy 36 procentow.
Nimo toho su wuhlady za cyłkowne lěto špatne. Město tři procenty wyšeho wobrota hač loni wočakuje šef VW Oliver Blume lětsa w najlěpšim padźe hišće stabilne wuwiće. Wunošk pak móhł hač do třoch procentow niši być.
Cła, wójny, geopolitiske napjatosće a wjace konkurency koncern poćežuja. Předewzaće planuje tuž nowe lutowanske naprawy. Hač do 50 000 dźěłowych městnow po cyłym swěće a štyri twornje w Němskej su najskerje z toho potrjechene, a to přidatnje k 50 000 dźěłowym městnam, kotrež chce předewzaće hač do lěta 2030 wottwarić.
Miliardy porno něšto euram
Ukrainjenjo Rusow z efektiwnej metodu přelesćeja
Kyjiw (SN/LuNo). Štyri nadpady, pjeć rozraženych wulkich wikowanskich depotow: Štyri dny su Ukrainjenjo wot minjeneho kónca tydźenja systematisce swoje truty na klučowe městna ruskeje wikowanskeje infrastruktury pola Moskwy, w centralnej Ruskej kaž tež na juhu kraja wusyłali. Wuslědk? Škody na tworach a twarjenjach firmy Wildberries, jednoho z najwjetšich wikowarjow w Ruskej, su wokomiknje wyše hač 1,2 miliardźe ameriskich dolarow. Ukraina je tak na ruski nadpad z raketami logistiskeje syće Nowa póšta reagowała. Akcija Ukrainy je fatalnje kritisku rusku zastaransku wojersku žiłku wobškodźiła, ale hłownje ruske nutřkowne ciwilne wiki.
To a tamne (24.07.26)
Urin psow w gmejnje Chiasso w šwicarskim kantonje Tessin po cyłym měsće smjerdźi. Wot awgusta nimaja wobydlerjo jenož howna swojich štyrinohačow zrumować, ale tež wodu sobu nosyć, zo bychu z njej łuže urina wotstronili. W prěnich tydźenjach chce zarjad za porjad ludźi napominać, hdyž přikaz njedodźerža. Po tym hrozy jim pokuta 100 frankow (něhdźe 107 eurow).
Hnězdo aziskich šeršenjow ma so dźensa prěni raz w Braniborskej wotstronić. Nadawk maja fachowcy ze specialnym wuhotowanjom w Eisenhüttenstadće wukonjeć. Dotal njebě w Braniborskej žanoho dopokaza aziskich šeršenjow. Inwaziwna družina wohrožuje mnohotnosć zwěriny, předewšěm mjedowe pčołki.
Kretschmer chce rěčeć, Peschel tež
Ze swojim wuprajenjom „Štóž hišće wo wohnjoškitnej muri rěči, njeje znamjenja časa spóznał“ je sakski ministerski prezident Michael Kretschmer (CDU) tež reakcije z Łužicy wuwabił.
Budyšin (SN/mb). „Dyrbimy z kóždym rěčeć, kiž chce rěčeć“, bě Kretschmer nowinje „Handelsblatt“ prajił. Na to je Budyski zapósłanc AfD w Sakskim krajnym sejmje Frank Peschel hnydom reagował. Won so dźiwa, wšako bě so AfD dotal hižo wo zhromadne dźěło prócowała, CDU pak tole přeco wotpokaza. Kretschmer porno tomu wuzběhny, zo njeje so najsylniša opoziciska frakcija na „mechanizmje konsultacijow“ z mjeńšinowym knježerstwom CDU/SPD wobdźěliła. Při tym móhli so do wuradźowanja w sejmje wo parlamentariskich iniciatiwach dorozumić. Na tute wašnje bu w aktualnej legislaturnej periodźe samo frakcija Lěwicy – prěni raz w najnowšich stawiznach Sakskeje – poł ducenta razow do tworjenja wjetšiny z koaliciju pod wjednistwom CDU zapřijata.
