Tak kaž na mnohich druhich městnach su minjenu njedźelu tež w Ptačecach pola Wojerec domchowanku swjećili. Poprawna wosebitosć pak bě, zo přeprosychu wopytowarjow po tym na serbske spěwne popołdnjo, kotrež je so po měnjenju hosći jara poradźiło.

Ptačecy (MŠ/SN). Jara derje wopytana bě njedźelu Ptačečanska cyrkej, jako tam domchowanku swjećachu. Dwurěčnu serbsku a němsku nutrnosć swjećeše Blunjanski farar Stefen Reichelt. Rěčna motiwatorka projekta ZARI Maria Šołćic čitaše ewangelij serbsce, farar němsce. Spěwna skupina Přezpólni nyšpor z třomi kěrlušemi hudźbnje wobrubi. Wo cyłkownu­ organizaciju je so Martina Pečikowa­ ze swojimi pomocnikami starała.

Wona je hromadźe z Mariju Šołćinej tež premjeru spěwneho popołdnja přihotowała. Tola po nyšporje wuzwolichu najprjedy kirbsoweho krala. Za to wažachu na nawsy nazběrane kirbsy cyle dokładnje a to nic z modernej digitalnej wahu, ale ze staršej decimalnej. Na kóncu doby młody Ruven z kirbsom, kotyž wjace hač 30 kilogramow wažeše.