Radźićeljo wustawki wo podpěrje towarstwam wobzamknyli

Hamor (AK/SN). Hamorska gmejna chce towarstwa na teritoriju komuny zaso podpěrować a jich spěchowanje wožiwić. Jednohłósnje je gmejnska rada na swojim posedźenju póndźelu wobdźěłane wustawki wo spěchowanju towarstwow wobzamknyła. We wustawkach zapisane je zasadne spěchowanje wšitkich w Hamorskej gmejnje zapisanych towarstwow. Předwidźane njeje jenož zakładne spěchowanje. Móžne su tohorunja přiražki za inwestiwne naprawy towarstwow a jich wosebite projekty. Do rozsudow wo tym, kotre towarstwo ma kelko spěchowanja dóstać, chcedźa mjez druhim čłonow wjesnych radow zapřijeć. Na te wašnje ma so zaručić, zo so móžne spěchowanje tež z wida wjesnych zajimow posudźuje. Nowe wustawki maja towarstwowe žiwjenje na wsach skrućić a spěchować. Dotalne wustawki běchu z lěta 2002. Wone dyrbjachu so po wobsahu a formalnje předźěłać.