Wuswojenjam zadźěwać
Berlin (dpa/SN). Ze zakonjom za škit inwesticijow chce zwjazkowy nutřkowny minister Alexander Dobrindt (CSU) wuswojenjam, kajkež je Lěwica w Berlinje planuje, zadźěwać. Jeho ministerstwo wobkrući Němskej nowinarskej agenturje dpa detaile wo planowanym zakonju.
Mjez druhim ma zakoń wuswojenje bydlenjow jenož potom dowoleć, hdyž knježerstwo kraja nuznu trěbnosć dopokaza. To rěka: Iniciator wuswojenja dyrbi znazornić, zo je wšitke druhe móžne srědki, na přikład spěchowanje bydlenjotwara, w połnej měrje wučerpał, tak zo jemu druha móžnosć hižo njezbywa. Dóńdźe-li k wuswojenju, maja so wuswojeni bjezposrědnje z pjenjezami wotškódnić a to na zakładźe aktualnych płaćiznow na bydlenskich wikach, kotrež fachowcy we wotpowědnym posudku zwěsća.
Serbiska: Vučić we wólbach podležał
Běłohród (dpa/SN). We wčerawšich dočasnych wólbach serbiskeho parlamenta je njewočakowano nowa opoziciska studentska lisćina jasnje dobyła. Wjelelětny serbiski prezident Aleksandar Vučić je swoju poražku w narěči zjawnje přiznał. Wot lěta 2012 bě wón serbisku politiku w měnjacych so funkcijach postajował a so ze swojim Ruskej a Chinje přichilenym politiskim kursom lěto a dale wot Europy zdalował.
„Krótko po narěči Vučića wozjewi skupina za wólbne slědźenje CRTA prěnje nachwilne wuslědki. Po tutych je wjetšina Južnych Serbow – 52 procentow – opozicisku studentsku lisćinu woliło. Serbiska doprědkarska strona (SNS) Vučića zdoby sej 39 procentow hłosow. Ani jeničkej dalšej stronje njeje so poradźiło, do serbiskeho parlamenta zaćahnyć. Za wobdźělenje w parlamenće trjebaja strony znajmjeńša tři procenty wšěch hłosow, strony etniskich mjeńšin pak jedyn procent.
Po wozjewjenju wuslědkow ludźo na dróhach a naměstach po cyłym kraju juskachu a wyskachu.
Hněwna na fosilnu industriju
Prawiznicy a inženjerej Němske myto za wobswět spožčili
Aachen (dpa/SN). Z Němskim mytom za wobswět wuznamjenja Němska zwjazkowa załožba za wobswět (DBU) kóžde lěto ludźi, kotřiž so z wulkim angažementom za škit a zdźerženje wobswěta zasadźuja. Z mytowanskimi pjenjezami we wobjimje 500 000 eurow, je wone najwyše dotěrowane wobswětowe myto w Europje. Inženjer Klaus Vossenkaul z Aachena a Hamburgska prawiznica Roda Verheyen sej sumu lětsa dźělitaj. Na swjatočnym zarjadowanju w Aachenje je jimaj zwjazkowy prezident Frank-Walter Steinmeier wuznamjenjenje přepodał. Vossenkaula mytowachu za jeho inowatiwne dalewuwiće membranowych filtrow za rjedźenje wopłóčkow we wodočisćernjach, Verheyen wuznamjenichu za zwoprawdźenje skutkownych směrnicow we wobswětowym a klimowym prawje.
Nowy rozmach?
Mloko klětu prawdźepodobnje dróše
Tuchwilu su płaćizny mloka tak niske kaž to minjene pjeć lět hižo njeběchu. Za mlokowych burow pak kóšty nadal stupaja. Kak so to na kupcow wuskutkuje?
Drježdźany (dpa/SN). Němski zwjazk mlokoweje industrije (MIV) z toho wuchadźa, zo so produkty z mloka klětu podróša. Na to skedźbni předsyda MIV Detlef Latka na dwudnjowskim lětnym schadźowanju zwjazka minjeny kónc tydźenja w Drježdźanach. Hač woprawdźe k zwyšenju płaćiznow dóńdźe, pak wotwisuje wot nowych zrěčenjow mlokowych burow z mlokarnjemi a rjećazami drobnowikowarjow.
Na aktualne lěto zhladuje zwjazk z měšanymi začućemi. Detlef Latka znazorni, zo bě lěto 2025 za mlokowych burow hladajo na płaćizny mloka njewšědnje pozitiwne: Přerězna płaćizna 52 centow na liter mloka běše druha najwyša syła. Přiwšěm pak zwěsća lětsa zaso rekordny minus wuwića mlokowych płaćiznow w dobje minjenych pjeć lět. We wěstych regionach su mlokowi burja liter mloka jenož hišće za 30 centow předawali.
Morbidna scenerija wabi
To a tamne (26.10.26)
Jenčec a Šiman za stabilitu Sakskeje
Smě sakska mjeńšinowa koalicija CDU/SPD najebać zwadu wo móžnym lěwicarskim knježerstwje w Berlinje za wobzamknjenje etata wjetšinu ze Zelenymi a Lěwicu tworić? Łužiskaj zapósłancaj CDU prajitaj haj.
Budyšin/Kamjenc/Drježdźany (SN/mb). Čim dlěje Lěwica, SPD a Zeleni po wólbach krajneho parlamenta w Berlinje wo móžnym knježerstwje pod lěwicarskej měšćanostku jednaja, ćim wótřiše je wołanje, zo njech CDU nimo „wohnjoweje murje“ přećiwo AfD tež tajkule dolěwa wobkrući. To by pak łoskoćiwe jednanja wo přichodnym dwójnym etaće Sakskeje 2027/2028 potrjechiło. Je hišće dowolene, so kaž posledni raz z frakcijomaj Zelenych a Lěwicy dorěčeć? Frakcija BSW, z kotrejež pomocu móhłoj CDU a SPD tohorunja wjetšinu tworić, je koaliciji hač do přichodneje póndźele čas dała, na jeje žadanja wotmołwić. Wosebje namołwa, so přiražkow do fondsa wzdać, z kotrehož maja so w přichodźe pensije dźensnišich zastojnikow płaćić, je za CDU twjerdy worjech a spřećiwja so principam jeje finančneje politiki, přichodnym generacijam žane přidatne ćeže njenabrěmjenjeć.
Rekord woporow horcoty
London (dpa/SN). Wědomostnicy dweju Londonskeju institutow su wobličili, zo je w Europje lětsa něhdźe 50 000 ludźi wulkeje horcoty dla zemrěło. To je wjace hač hdy do toho. Nimale dwě třećinje smjertnych padow stejitej w direktnym zwisku z horcotu, tak pisaja. Přepytowali su daty z něhdźe 850 městow po cyłej Europje. W lěće 2022 běchu slědźerjo w zwisku z horcotu w Europje něhdźe 29 000 smjertnych woporow wuličili.
W Tibeće zemja ržała
Nagqu (dpa/SN). Po wčerawšim ćežkim zemjerženju w Tibeće pytaja wuchowanske słužby dale za zasypanymi. Dotal su zamołwite zarjady 16 smjertnych woporow a 76 zranjenych wozjewili. Po informacijach chinskich medijow je dźensa wopołnocy we wokrjesu Baqing w chinskim awtonomnym regionje Tibeće zemja ze sylnosću 7 we hłubokosći něhdźe 10 kilometrow ržała.
Podhladneho spiona zajeli
