Wšitcy młodostni do wójska?
Zakładnu mzdu wotpokazali
Zeńdu so na Ceremoniju měra
„Reformacija swět změniła“
Ministerski prezident Saksko-Anhaltskeje nochce swjatk šmórnyć
Halle (dpa/SN). Ze swojim namjetom, wotstronić reformaciski dźeń, je społnomócnjena zwjazkoweho knježerstwa za naležnosće srjedźostawskeho hospodarstwa Gitta Connemann (CDU) razne spjećowanje ze Saksko-Anhaltskeje zbudźiła. „Reformacija njeje jenož Němsku změniła, ale wšón swět. Saksko-Anhaltska je kraj reformacije. Wotstronjenje reformaciskeho dnja za mnje tuž scyła do prašenja njepřińdźe“, rjekny ministerski prezident Reiner Haseloff (CDU) w Halle wuchadźacym Srjedźoněmskim nowinam.
Connemann bě so za to wuprajiła, reformaciski dźeń jako oficialny swjatk šmórnyć a město toho hospodarstwo dale sylnić. „Móžemy sej wěste wěcy hišće dowolić, kotrež płaća nas hospodarsku wukonliwosć? To hladam na reformaciski dźeń, na kotrymž su tež w ewangelsce wusměrjenej Delnjej Sakskej cyrkwje prózdne“, bě Connemann w interneće argumentowała.
Wojacy a rjemjeslnicy
Aktiwisća dom zaso wopušćili
Lipsk (dpa/SN). Na wuchodźe Lipska je policija znowa wobsadźenje domu skónčiła. Zastojnicy njejsu w nocy na sobotu hižo nikoho w twarjenju wile Krause w měšćanskim dźělu Lindenau našli, rěčnica policije zdźěli. Město toho su so wjacori ludźo napřećo domej k spontanje přizjewjenej zhromadźiznje zešli.
Aktiwisća běchu do toho na wili transparenty z hesłom „Susodstwo zhromadnje pěstować“ připrawili. Mjez ludźimi knježeše měrniwa atmosfera, na dworje bě tykancowy bufet natwarjeny. Policija bě z wjacorymi awtami na městnje.
„Z wobsadźenjom wile Krause chcemy so přiběracej indiwidualizaciji na bydlenskich wikach spjećować a susodstwo sylnić“, zdźěli skupina „Awtonomne dny wobsadźenja“. Nimo toho chcedźa aktiwisća na špatne połoženje nastupajo bydlenje a na njesprawne rozdźělenje financow skedźbnjeć. Jako koncept wužiwanja namjetuje skupina wothladanje dźěći, pomoc při domjacych nadawkach, wobchod z poskitkom darmotnych wěcow, prawidłowne zetkanja susodow a dźěłarnju mjezsobneje pomocy. Aktiwisća běchu dom pjatk wječor wobsadźili.
Zajim za nowostki njezlemjeny
Wjace dawkow na rentu
Drježdźany (dpa/SN). Dźeń a wjace ludźi w Sakskej dyrbi za swoju rentu dawki płaćić. Po informacijach financneho ministerstwa su 2024 na wšěch 634 445 wotpowědnych dawkowych žadanjow rozesłali. Lěta 2017 bě jich 1 100 było, pjeć lět pozdźišo hižo 142 000. W lěće 2023 je ličba hišće raz bytostnje na něhdźe 444 000 stupała.
„Njelubozna tema dawkow na renty tež pola nas na wuchodźe dźeń a wjace rentnarjow potrjechi, ličba wotpowědnych zličbowankow raznje přiběra. Potrjecheni su srjedźodobnje wšitcy, kotrychž renta zakładnu bjezdawkowu sumu 12 084 eurow wob lěto přesahuje, rjekny Susanne Schaper, předsydka frakcije Lěwicy w zwjazkowym sejmje. Wona bě so pola krajneho knježerstwa rentu nastupajo wobhoniła.
„Hižo wjacore sta eurow dawkow su mnohim ludźom wulke poćežowanje, wšako dyrbja rentnarjo swój přinošk za chorobnu kasu a hladanske zawěsćenje sami płaćić“, rjekny Schaper powěsćerni dpa. Lěwica žada sej minimalnu rentu 1 400 eurow a wyše dawki za ludźi z mzdu wjace hač 8 000 eurow.
To a tamne (13.10.25)
Wjacorych policistow je 69lětna šoferka sobotu w Berlinskim měšćanskim dźělu Spandau ze swojim awtom zraniła, jako chcyše so wobchadnej kontroli wuwinyć. Zastojnicy běchu ju zadźerželi, dokelž njeběše na wjacorych křižowanišćach čerwjenu amplu wobkedźbowała. Jako chcychu personalije šoferki přepruwować, pak stupi žona znowa na płun. W sćěhowacej přesćěhanskej jězbje zrazy wona na kóncu do awta policije, kotryž běše jej puć zaraćiło. Při tym wjacorych policistow zrani.
Nadpada Orca-rybow dla je so 84 kilometrow před pobrjohom Portugalskeje płachtak francoskeje swójby podnurił. Po informacijach nowiny Correio da Manhã su staršej a jeju tři dźowki w starobje wosom, dźesać a dwanaće lět „nadpad ze stróželemi přetrali“ a njebuchu zranjeni.
USA sćelu wojakow za Gazu
Washington (dpa/SN). USA chcedźa ze swójskimi wojerskimi jednotkami zaručić, zo je přiměr mjez Israelom a Hamas stabilny. Za kónčinu Bliskeho wuchoda zamołwita komandowa centrala wójska USA chce 200 wojakow sylnu jednotku zestajeć. Wojacy pak njebudu w Gazaskim pasmje zasadźeni, rjekny wysoki zastupnik knježerstwa USA w telefoniskej rozmołwje ze žurnalistami we Washingtonje.
Israel „wjeseli so na Trumpa“
Tel Aviv (dpa/SN). Předsyda israelskeho parlamenta Amir Ohana je prezidenta USA Donalda Trumpa oficialnje přeprosył, we wobłuku swojeho wopyta w Israelu před parlamentom kraja rěčeć. Narěč Trumpa by była „wusahowace znamjo našeje wěčneje dźakownosće za wašu jónkrótnu sylnosć nawjedowanja a njerozłamajomneho zwjazka“ wobeju krajow, rěka w přeprošenju. Trump je „najwjetši přećel židowskeho naroda w modernych stawiznach“, Ohana piše. Israel wjeseli so na „prezidenta měra“. Trump chce so zajutřišim, njedźelu, směr Bliski wuchod podać.
Sudnistwo zakazuje gardu
