Dróši zastup w kupjelach
Wiesbaden (dpa/SN). Lěćo, słónco, kupanske wjesela: Štóž chce w tutym lěću do lěsneje kupjele hić, dyrbi něšto wjace pjenjez za zastup wudać hač loni. To je zwjazkowy statistiski zarjad zwěsćiło. Płaćizny za wopyt kupjelow su w meji přirunujo z lětom 2024 wo 5,7 procentow stupali.
Tohorunja dosć rozdźělnje wuwiwaja so płaćizny za wěcy, kotrež su za kupanje wažne, na př. za kupansku drastu. Muska kupanska drasta je so wo 0,6 procentow podróšiła, płaćizna sportoweje a kupanskeje drasty žonow porno tomu je wo 1,1 procent spadnyła. To je naspomnjenja hódne, dokelž su powšitkowne płaćizny w Němskej wo 2,1 procent rozrostli.
W Němskej eksistuje 2 800 kupjelow, mjez nimi je 570 lěsnych kupjelow. Něhdźe 600 ludźi je w lěće 2023 wukubłanje na fachoweho přistajeneho za kupjele – kupanskeho abo płuwarskeho mištra – zahajiło.. To běchu tři procenty wjace hač lěto do toho. Dwě třećinje z nich běchu mužojo. W běhu minjenych dźesać lět je ličba ludźi, kotřiž su tajke wukubłanje zahajili, wo 27,5 procentow rozrostła.
Nowa wuhladna wěža nad Łobjom zbudźa diskusije
Wehlen (JM/SN). Po dołhim čakanju a wjele diskusijach je nětko skónčnje tak daloko: Přichodnu sobotu nowu wěžu na ruinje srjedźowěkowskeho hrodu we Wehlenje w Sakskej Šwicy oficialnje zjawnosći přepodadźa. Wěžu běchu wot lěta 2017 z wjele prócu ponowili. Hłownu zamołwitosć měješe skupina sydom njesprócniwych čłonow towarstwa „přećelow hrodu“ z měšćanostu Klausom Tittelom na čole. Jara spomóžne běchu tež njewočakowane spěchowanske srědki 364 000 eurow w lěće 2023, kotrež dalše dźěła zmóžnichu. Na kóncu je ponowjenje sydom metrow wysokeje wuhladneje wěže 475 000 eurow płaćiwo.
To a tamne (18.06.25)
Wo tójšto mjeńše hač myslene je rubježne zwěrjo, za kotrymž tuchwilu w jězoru pola Braunsbebra na juhu Saksko-Anhaltskeje pytaja. Mjeztym maja nowy widejo, kotrež pokazuje zwěrjo podobnje wulkej kóčce. Dotal z toho wuchadźachu, zo je rubježne zwěrjo puma. Na to běchu wulku pytansku akciju z trutami a samo helikopterom zahajili. To su mjeztym skónčili. Škitne naprawy pak najprjedy raz dale wobsteja, zamołwići zdźěleja.
Róčnicu zakaza su w Berlinje na swojorazne wašnje woswjećili: Něhdźe 300 ludźi je wčera w Berlinje njedaloko muzejoweje kupy do Sprjewje skočiło, sto lět po tym, zo je Berlinske knježerstwo kupanje w rěce zakazało. Protest měješe pokazać, zo je kupane tam móžne. Organizowało bě to towarstwo za kupanje w rěce, kiž hižo wjele lět přećiwo zakazej wojuje.
Teheranjenjo měli ćeknyć
Washington (dpa/SN). Hladajo na wójnu mjez Israelom a Iranom je prezident USA Donald Trump wobydlerjow milionoweje metropole Teherana namołwjał ćeknyć. „Wšitcy měli město hnydom wopušćić“, piše Trump na platformje Truth Social. W iranskej stolicy bydli dźewjeć milionow ludźi. Mjeztym su USA dalši lětadłonošak do regiona pósłali a dźesatki lětadłow do Europy přepołožili, kotrež zamóža druhe lětadła w powětře natankować.
Ruska zaso Kijew nadběhowała
Kijew (dpa/SN). Při ruskich nalětach na ukrainsku stolicu Kijew je so minjenu nóc po oficialnych informacijach tójšto ludźi zraniło. Měšćanosta Vitali Kličko rěči wo 16 zranjenych. Ruska bě stolicu z trutami a raketami nadběhowała. Po informacijach medijow su ruske wojerske jednotki wjacore ukrainske zepěranišća na wuchodźe a juhu kraja přewinyli a hibaja so dale do směra na zapad. USA su pječa dalšu wojersku techniku z Ukrainy do Bliskeho wuchoda přepołožili.
Komuny žadaja sej wurunanje
Nimale 86 lět po nadpadźe hitlerskeje Němskeje na Pólsku su wčera ...
Dnowna woda wohrožena
Berlin (dpa/SN). W dale a wjace kónčinach Němskeje hrozy nuza dnowneje wody. Tole je centralny wuslědk najnowšeho přepytowanja Zwjazka za wobswět a škit přirody BUND, kotruž su wčera wozjewili. W połojcy wšěch wokrjesow wjace dnowneje wody přetrjebaja, hač móže přiroda ze spadkami zaso narunać. Wosebje potrjechene njejsu jenož znate suche kónčiny kraja, ale tež sylnje wobsydlene kónčiny kaž Porynska abo regiony w Delnjej Sakskej.
Studija zdobom dopokazuje, zo klimowa kriza problem přiwótřa. 94 wokrjesow je akutnje wot pobrachowaceje dnowneje wody potrjechenych. Tule je mnóstwo wody minjene lěta widźomnje woteběrało. Najwyša je potrjeba pitneje wody.
Zelenskyj namołwja zapad
Kijew (dpa/SN). Ukrainski prezident Wolodymyr Zelenskyj žada sej po najnowšich zahubnych nalětach Ruskeje energiske mjezynarodne zasahnjenje přećiwo Moskwje. „Tajke nadpady su ryzy terorizm. Cyły swět, USA a Europa dyrbjeli jako ciwilizowane towaršnosće skónčnje na teror reagować“, piše Zelenskyj internetnje. Ruski prezident Wladimir Putin z wójnu přećiwo Ukrainje pokročuje, „dokelž móže sej wón tole dowolić.“
Zelenskyj chcyše na wjeršku G7 w Kanadźe poprawom z prezidentom USA Donaldom Trumpom wo nowych sankcijach přećiwo Moskwje a wo dalšej wojerskej podpěrje na dobro Ukrainy rěčeć. Po wotlěće Trumpa pak su wšitke planowane terminy z nim wotprajili.
Trump wjeršk G7 dočasnje wopušćił
Kananaskis (dpa/SN). Prezident USA Donald Trump je wójny mjez Israelom a Iranom dla wjerškowe zetkanje G7 w Kanadźe wopušćił. Po wječeri z druhimi statnymi a knježerstwowymi šefami w schadźowanišću w kanadskich horinach Rocky Mountains je wón z lětanišća w Calgaryju do Washingtona wotlećał. Běły dom bě hodźiny do toho njewočakowano zdźělił, zo dyrbi so Trump wójny dla dočasnje do Washingtona nawróćić. „Dyrbju wróćo. To je jara wažne“, rjekny Trump, a dźakowaše so „wulkotnemu hosćićelej Kanadźe“. Do toho rěkaše, zo je Iran po nalětach Israela k rozmołwam wo swojim atomowym programje zwólniwy a zo chcył so Trump „wo to starać“.
Zwjazkowe knježerstwo ma zrozumjenje za dočasny wotlět prezidenta USA krizy na Bliskim wuchodźe dla: „Po intensiwnych a dobrych wuradźowanjach wo swětowym hospodarstwje, wikowanju a surowiznach ma zwjazkowe knježerstwo zrozumjenje za wotlět prezidenta USA z kruha G7“, zdźěli rěčnik knježerstwa Stefan Kornelius medijam.
Kretschmer za mjenje běrokratije
Drježdźany (dpa/SN). Sakski ministerski prezident Michael Kretschmer (CDU) ma wottwar běrokratije za přewšo wažny nadawk. Němska dyrbjała zwólniwa być, njetrjebawše běrokratiske poćežowanja spušćić, kotrež na mnohich městnach wuwiće haća. Tole zwurazni Kretschmer na wopyće twarnišća noweho zawoda koncerna połwodźakow Infineon w Drježdźanach. „Njewěm, hač so nam to w małym wobłuku poradźi abo hač trjebamy generelne rozrisanje.“
Kretschmer namjetowaše w tym zwisku moratorij, přichodne lěta žane nowe běrokratiske prawidła njenastajić a wobstejace zakonje na europsku minimalnu runinu zwjesć. Němska w mnohich předpisach europske prawo přesahuje, čehoždla bywaja předewzaća dróše, pomałše a wobćežniše. „Takle dale njeńdźe.“ Twar noweje fabriki Infineon je přikład za to, zo hodźa so projekty spěšnje a eficientnje zwoprawdźić, hdyž wšitcy wobdźěleni profesionalnje dźěłaja a so wot přehnatych předpisow wuswobodźa. W Drježdźanach nastawa tuchwilu najmoderniša fabrika połwodźakow Europy z tysac nowymi dźěłowymi městnami.
