Wobaraja so kontroli chatow
Naležna diskusija wo planach EU za bój přećiwo znjewužiwanju dźěći
Berlin (dpa/SN). Unija w zwjazkowym sejmje wupraja so přećiwo kontroli internetnych powěsćow bjez wosebiteje přičiny. „To je, jako by něchtó wšitke listy wočinił a hladał, hač w nich snano něšto zakazaneho njesteji“, rjekny předsyda frakcije CDU/CSU Jens Spahn w Berlinje hladajo na tuchwilnu debatu na runinje Europskeje unije. „To scyła njeńdźe a to z nami móžno njebudźe.“
Přiwšěm je wažne, přećiwo znjewužiwanju dźěći wojować a tole chłostać, rjekny Spahn do posedźenja frakcije. Dowěrliwa indiwiduelna komunikacija ludźi pak měła dale bjez zasahnjenja móžna wostać, sej Spahn žada.
Wjele wuspěcha!
Z wikami na nazymu so nastajili
To a tamne (08.10.25)
Chětro napity šofer wosoboweho awta je so wčera wječor na policajskej straži w mecklenburgsko-předpomorskim Güstrowje přizjewił, dokelž je do dźiwjeho zwěrjeća zrazył. Při protokolowanju podawka zastojnikam napadny, zo je muž dospołnje pjany. Test wunjese 2,43 promilow. Na to wotewzachu jemu krej a jězbnu dowolnosć. Klučiki awta přepodachu žonje. Krótko po tym muž policistam znowa napadny – na kolesu. Tón króć pokazowaše alkomat 2,02 promile.
Nowe předpisy za e-scootery planuje zwjazkowe knježerstwo. Zwjazkowe wobchadne ministerstwo je wotpowědny naćisk wukaza zdźěłało. Tak trjebaja nowe e-scooter wot lěta 2027 směrowe lampki. Města a komuny smědźa přichodnje swójske rjadowanja za wotstajenje rolerow postajić, kotrež internetne platformy ludźom přenajeja.
Knjez hrodźišća ma wušparanja
Hdźe je David Chmelík, kotrehož čěska justica z mjezynarodnym wukazom zajeća pyta (SN su wčera rozprawjeli)? Zašły kónc tydźenja w słowjanskim hrodźišću, praji nam Wětošowski měšćanosta Bengt Kanzler (bjezstronski).
Wětošow (SN/mb). Město Wětošow je wobhospodarja słowjanskeho hrodźišća w Radušu, Davida Chmelíka, hižo wospjet namołwjało, zo ma so přizjewić. Dotal bjez wuspěcha. Chmelík najprjedy w hotelu rezidowaše, doniž njeje do bydlenja w městu přisłušacej wjesce přećahnył. Swoju dotalnu oficielnu adresu w Brüsselu, hdźež je jeho załožba Slavonic Europe zaměstnjena, je wočiwidnje cofnył. Tohodla je wobwodne sudnistwo w Klatovach mjezynarodny wukaz zajeća postajiło, zo bychu jeho na wospjetne sudniske jednanje skazać móhli. Hižo před lětomaj bě čěska platforma novinky.cz wozjewiła, zo su Chmelíka wopačneho wočornjenja wučerjow-mandźelskeju čěskeho a ruskeho pochada dla zasudźili (hlej SN 19.12.2023).
Warnuje před antisemitizmom
Berlin (dpa/SN). Zwjazkowy kancler Friedrich Merz (CDU) warnuje składnostnje 2. róčnicy nadpada Hamas na Israel před antisemitizmom w Němskej. „Po 7. oktobru 2023 dožiwjamy w Němskej nowu žołmu antisemitizma. Tón pokazuje so w starym a nowym šaće – w socialnych medijach, na uniwersitach, na dróhach, wótře, njehańbićiwje a namócnje.“ Merz wobydlerjow prosy, zo so njech Židam a židowskim wosadam bóle přiwobroća.
Merz: Hybridna wójna
Berlin (dpa/SN). Ruska wjedźe hybridnu wójnu přećiwo Němskej. Wo tym je zwjazkowy kancler Friedrich Merz (CDU) kruće přeswědčeny. Putin wjedźe informacisku wójnu přećiwo nam a wojersku wójnu přećiwo Ukrainje. Tuta wójna měri so přećiwo nam wšěm, rjekny Merz w sćelaku ntv. Hladajo na kopjace so pady cuzych trutow w Němskej a druhich krajach Merz rjekny: Putin chce nam strach načinić. „Njedamy so pak zatrašić a so tež tutomu wohroženju wobaramy“, wón zjima.
Kak wobchadźeć z trutami?
Policisća wotwleku zajateho demonstranta. Wón bě před hłownym ...
AfD w Sakskej ze 37 procentami
Paris pyta za wupućom z krizy
Wopory masakra Hamas wopominali
Berlin (dpa/SN). Z poł wysoko wisacymi chorhojemi, wopominanskimi stražemi a wustajeńcami su w Němskej dźensa wopory nadpada Hamas na Israel před lětomaj wopominali. W Lipsku je so zwjazkowy prezident Frank-Walter Steinmeier ze zastupnikami židowskeje wosady zetkał. Prezidentka zwjazkoweho sejma Juila Klöckner (CDU) je w Berlinje wustajeńcu wotewrěła, kotraž nadpad islamistiskich teroristow na hudźbny festiwal Nova zwobraznja. Před Braniborskimi wrotami w Berlinje su mjena wšěch woporow předčitali. Na naměsće Bebela w stolicy zarjaduja dźensa wječor wopomnjensku stražu.
7. oktobra 2023 běchu terorisća radikalno-islamistiskeje Hamas najhórši masaker na Židach po Druhej swětowej wójnje skućili. Něhdźe 1 200 ludźi su při tym morili a wjace hač 250 do Gazaskeho pasma zawlekli. Jeničce na festiwalu Nova morichu wjace hač 400 wopytowarjow. Stat Israel reagowaše z masiwnym wojerskimi nadpadami na Gazaske pasmo a je tam 60 000 Palestinjanow morił.
