Fasadu dwórnišća wozdebili
Pospyty sabotaže tež w Sakskej
Dohromady 21 samotwarjenych rozbuchadłow su sakske wěstotne zarjady minjeny pjatk blisko přepinarnjow w Bjerwałdźe a Syjku (Graustein) pola Slepoho nadešli.
Drježdźany/Düsseldorf (dpa/SN/MiP). Po pospytach sabotaže na milinowu syć w Braniborskej a Porynsko-Westfalskej w běhu zašłeho tydźenja su minjeny pjatk tež w Sakskej samopaslene rozbuchadła blisko přepinarnjow nadešli. Na zakładźe informacijow wjacorych wěstotnych zarjadow kaž tež pokiwa kedźbliweho wobydlerja wotkrychu a znješkódnichu rozbuchadła blisko přepinarnje w Bjerwałdźe kaž tež blisko přepinarnje w Syjku. To zdźěli sakske ministerstwo za infrastrukturu a wuwiwanje kraja. Škody nastali njejsu. Znješkódnjenja dla su milinu nachwilnje wotpinyć dyrbjeli.
To a tamne (07.09.26)
Dwě- a třilětne dźěćo nadeńdźechu w swojich pjelškach a jenož z přikrywu na ramjenjomaj sobotu rano na dwórnišću w porynsko-pfalcowskim měsće Rülzheim. Mjeztym zo staršej spaštaj, twochnyštej z domu, dokelž chcyštaj sej w předawanskej pasaži dwórnišća nowe črije kupić. Zastojnicy policije móžachu wobeju bórze zaso čiłej a strowej staršimaj přepodać.
„Festiwalej kumštneje inteligency“ zadźěwać chce profesor za matematiku na grjekskej uniwersiće w Patrasu, třećim najwjetšim měsće w Grjekskej. Tohodla maja jemu studenća z nawočemi, kotřiž so na pruwowanjach wobdźěla, z wopismom lěkarja dopokazać, zo je woprawdźe trjebaja. Dźeń a husćišo wón dožiwja, zo wužiwaja studenća smartne KI-nawoči, z kotrymiž spytaja w pruwowanju wobšudźić. To wuzběhny profesor na online-platformje města.
Wuznamny komponist a hudźbny redaktor był
Žarujemy wo Ulricha Pogodu. Wón bě wuznamny komponist a rozhłosowy hudźbny redaktor. Kulowska cyrkwinska wosada je zdźěliła, zo je Ulrich Pogoda póndźelu, 31. awgusta, w starobje 72 lět zemrěł.
Ulrich Pogoda bě čłowjek, kotryž je wěcy zmóžnjał. Jako hudźbny redaktor dźěłaše wón wot lěta 1985 hač do 2019 pola serbskeho rozhłosa. Dlěje hač 30 lět je so wo to starał, zo delnjoserbski hudźbny swět rosće. Wón nawjaza zwiski do wšěch hudźbnych sferow, přeswědči druhich komponistow so zajimować za to serbske, zdoby sej producentow, tekstarjow, interpretow a stwori serbsku hudźbu. Zdobom spěchowaše lěto wob lěto młode talenty, z čimž hudźbny profil serbskeho radija wobnowi a wobohaći.
Kutschke nawjeduje biskopstwo
Generalny wikar Andreas Kutschke, kotryž je w Serbach tež jako křižer w Radworskim procesionje znaty, nachwilnje biskopstwo Drježdźany-Mišno nawjeduje. 52lětny bu wčera wot tachantskeho kapitla swjateho Pětra za diecezanskeho administratora wuzwoleny. W tutej funkciji předsteji Kutschke katolskej cyrkwi w Sakskej a wuchodnej Durinskej, kotrejž přisłuša něhdźe 124 700 wěriwych, doniž njebudźe nowy biskop pomjenowany. Andreas Kutschke bě hižo po wotchadźe biskopa Heinera Kocha w lěće 2015 Drježdźansko-Mišnjanske biskopstwo w času sediswakancy nawjedował.
Foto: archiw SN/Hanka Šěnec, biskopstwo Drježdźany-Mišno/Michael Baudisch
Lutowanski plan VW schwalili
Wolfsburg (dpa/SN). Cyle njejapcy su zamołwići koncerna VW swoje za dźensa planowane posedźenje, w kotrymž měješe kontrolna rada lutowanske plany předsydstwa schwalić, na wčera přestorčili. Překwapjacy je tež wuslědk posedźenja: Kontrolny gremij VW je tak mjenowanemu „planej přichoda 2030“ jednohłósnje přihłosował. Po lutowanskim planje chce koncern přichodne lěta něhdźe 50 000 dźěłowych městnow šmórnyć. Přichod produkciskich stejnišćow w Němskej, tež w Šwikawje, je nadal njejasny. Zamołwići pruwuja za tute zawody „alternatiwne móžnosće wužiwanja“.
Kónc koalicije w Durinskej?
Erfurt (dpa/SN). Po tym zo běchu srjedź tydźenja hižo třo zapósłancy frakciju BSW w Durinskim krajnym sejmje wopušćili, je nětko dalšich dźewjeć zapósłancow připowědźiło, zo chcedźa frakciju a stronu wopušćić. Po informacijach powěsćernje dpa su mjez nimi tež wšitcy třo durinscy ministrojo, kiž stronje BSW přisłušeja. Koalicija so dźensa z podawkami zaběra.
Dźiwadło mjez najlěpšimi kraja
Tónle naćisk noweho Carolineho mosta, kotryž je planowanska ...
Ministerkomaj projekt předstajili
Njezapomnić, ale so dopominać
Wopomnišćo w Słonej Boršći stanje so njedźelu z městnosću žiwjenja
Słona Boršć (SN/MiR). Na wuchodnej kromje Słoneje Boršće leži nimale 270 metrow wysoki Tchór (Chorberg). Na jeho wjeršku steji wjedrowa stacija a blisko njeje je pomnik, kotryž dopomina na 43 žonow židowskeho pochada, kotrež běchu nacionalsocialisća w lěće 1945 na smjertnym pochodźe z Auschwitza do Buchenwalda na tymle městnje morili. Byrnjež tam dwurěčne pućniki stali, so jenož mało ludźi trochu schowaneje pěskoweje jamy dohlada. To ma so přichodnu njedźelu, 6. septembra, změnić. Dopołdnja napoł jědnaćich wotměje so tam wopomnjeće we wobłuku festiwala „kommen und gehen“ Zwjazka šesćiměstow, kotrehož předsyda je Hans Narva.
W Słonej Boršći je jedna ze stacijow busoweje ekskursije k městnosćam přesćěhowanja Židow kaž tež nuzoweho dźěła w dobje nacionalsocializma w Hornjej Łužicy. Nimo toho dojědu sej wobdźělnicy do Kamjenca-Herrentala, Budyšina, Hainewalde a Zhorjelca. Na wopomnjeće w Słonoboršćanskej pěskowej jamje su nimo nich wšitcy zajimcy přeprošeni, wosebje tež Serbja a wobydlerjo wokolnych wsow.
