Wjace lěkoww EU produkować
Premier Starmer w krizy
London (dpa/SN). Po katastrofalnych wuslědkach swojeje Labour-strony w regionalnych a komunalnych wólbach minjeny tydźeń we Wulkej Britaniskej steji tamniši premierminister Keir Starmer pod dźeń a wjetšim ćišćom. Nutřkowna ministerka Shabana Mahmood a wonkowna ministerka Yvette Cooper stej jemu radźiłoj, zo parlamentej časowy plan hač k złoženju swojeho zastojnstwa předpołoži. Wot něhdźe 400 zapósłancow Labour je Starmerej wjace hač 70 w běhu wčerawšeho dnja podpěru wupowědźiło. Wjacori parlamentariscy asistenća ministrow knježerstwa připowědźichu, zo wróćo stupja. Starmer sam je žadanja złožić zastojnstwo wospjet wotpokazał.
Wjace hač 1 400 mandatow je Labour w komunalnych gremijach zhubiła. Tójšto z nich je sej prawicarsko-populistiska strona Reform UK zdobyła. We Walesu, hdźež bě Labour lětdźesatki dołho najsylniša strona, je mjeztym jenož hišće na třećim městnje, za stronomaj Plaid Cymru a Reform UK, kotraž zamó w Šotiskej ličbu wolerjow podwojić.
Škitnu murju spotorhali
Rumunscy socialdemokraća z prawicarskej stronu knježerstwo wotsadźili
Bukarest (dpa/SN). Němske medije su podawkam minjeneho tydźenja w Rumunskej jenož mało kedźbnosće wěnowali. Prawicarsko-ekstremistiska strona AUR je w parlamenće zhromadnje ze stronu socialdemokratow PSD wothłosowanje wo wuprajenju njedowěry nastorčiła. Z wulkej wjetšinu su zapósłancy tydźenja wutoru za wotsadźenje knježerstwa pod nawodom Europskej uniji přichileneho ministerskeho prezidenta Ilie Bolojana hłosowali. Podobnje kaž w Němskej běchu so rumunscy demokraća stajnje za škitnu murju přećiwo prawo-nacionalnej stronje AUR wuprajili. Tule murju je PSD nětko spotorhała.
Šerjenje ducy po Europje
MDR: Žane nowe produkcije
To a tamne (12.05.26)
Tójšto drohoćinkow je dźěćo pěstowarskeje skupiny na hrajkanišću w Berlinje našło. W pěskowym kašćiku w měšćanskim dźělu Wilmersdorf wuhrjeba wone slěbornaki, złoćane debjenki, kruch złota, luksusowe časniki a 6 000 eurow hotowych pjenjez, zdźěli policija w socialnych medijach. Kriminalna policija nětko přepytuje, hač su namakane wěcy dźěl rubjenstwa.
Před zawrjenymi durjemi hłowneho twarjenja stejachu póndźelu studenća Berlinskeje Techniskeje Uniwersity. Wjednistwo uniwersity běše je kónc tydźenja po přepruwowanskim terminje techniskich njedostatkow dla njejapcy zawrěć dyrbjała. Hižo dawno běše po dešćach z wjercha twarjenja woda kapała. Jako „srjedźnu katastrofu“ wopisa situaciju Berlinska senatorka za wědomosć Ina Czyborra (SPD).
Octavian Ursu jasny faworitza druhe koło
Zhorjelc (AK/SN/BŠe/mb). Octavian Ursu (CDU), Zhorjelski wyši měšćanosta, móže po wšěm zdaću w swojim zastojnstwje zakónčić, štož je započał – tole je sej wón do wólbow přał. W prěnim kole drje steješe njedźelu kandidat AfD Sebastian Wippel po wuličenju wólbnych wokrjesow dołho z wotstawkom na prěnim městnje, tola naposledk so Ursu z 49,1 procentom samo jasnišo hač wočakowane přesadźi – před Wippelom ze 44,3 procentami. Dalšej kandidataj Sabine Christian (Lěwica) a Hagen Jeschke (bjezstronski) staj jenož 3,4 resp. 3,2 proc. wolerjow přeswědčiłoj. Christian je hižo připowědźiła, w druhim kole wólbow za dwě njedźeli wjac njenastupić a město toho Octaviana Ursu podpěrać. 58,8 procentow ludźi, kotřiž běchu k wólbam namołwjeni, su swoje prawo tež wužiwali. Dokelž njeje žadyn kandidat wjace hač 50 procentow hłosow docpěł, je druhe koło wólbow trěbne, kaž před sydom lětami. Wippel našemu wječornikej zdźěli, zo „njeje CDU najebać podpěru wšěch lěwicarskich syćow ani połojcu hłosow dóstała“, a nima wólby za rozsudźene.
Sylnosće našeho kraja sej wuwědomjeć
33. Budysku narěč je zašły pjatk Marcel Fratzscher, prezident Němskeho instituta za hospodarske slědźenje, w tachantskej cyrkwi swj. Pětra dźeržał. Wón so za tym prašeše, kak móhli so dalši techniski postup, globalizacija a polarizowanje na demokratiju wuskutkować.
Nabožina wójnu njedowola
Jerusalem (B/SN). Za abta benediktinskich mnichow w Jerusalemje, Nikodemusa Schnabela, njeje znjewužiwanje židowskeje, křesćanskeje a islamskeje nabožiny we wójnje na Bliskim wuchodźe legitimne. Je načasu so za deeskalaciju, wotbrónjenje a diplomatiju zasadźeć. W Božim mjenje wójnu wjesć je benediktinej Schnabelej bohahanjenje.
Za škit nowinarstwa
Vatikan (B/SN). Na njedźelnišej modlitwje na Pětrowym naměsće je bamž Leo XIV. swobodu nowinarstwa zakitował a sej žadał zajatych žurnalistow pušćić. „Bohužel so prawo medijow na wotewrjene abo zakryte wašnje často rani. Spominamy na mnohich žurnalistow a reporterow, kotřiž stachu so z woporom wójnow a namocy. Jenož informowani ludźo móža so swobodnje rozsudźić.“
Biskop wotstupił
Magyar zastojnstwo nastupił
Budapest (dpa/SN). Péter Magyar, jasny dobyćer madźarskich parlamentariskich wólbow w aprylu, je sobotu zastojnstwo ministerskeho prezidenta nastupił. Nawoda byrgarsko-konserwatiwneje strony Tisza naslěduje po 16 lětach Viktora Orbána. Z dohromady 199 zapósłancow w parlamenće je 140 za njeho a 54 přećiwo njemu hłosowało. Magyar sam běše so hłosa wzdał, štyrjo zapósłancy so na wólbach njewobdźělichu.
Koaliciske zrěčenje schwalili
Stuttgart (dpa/SN). Na swojimaj stronskimaj zjězdomaj stej Badensko-Württembergskej stronje Zelenych a CDU kónc tydźenja zhromadne koaliciske zrěčenje schwaliłoj. Dźensa podpisataj nawodaj stronow Cem Özdemir (Zeleni) a Manuel Hagel (CDU) zrěčenje. Dnja 13. meje maja zapósłancy Badensko-Württembergskeho krajneho sejma wo Cemje Özdemiru jako ministerskim prezidenće wothłosować.
Sudniski proces zahajili
