Změna klimy škodźi strowoće
Merza renty dla kritizuja
Debata njewurunana
Swjedźeń tulpow w Podstupimje
Třiceći lět mjeztym přiwabja Hollandska štwórć w Podstupimje srjedź apryla tysacy
ludźi na swjedźeń tulpow. Nastało bě sydlišćo we 18. lětstotku, jako pruski kral Friedrich Wilhelm I. hollandskich rjemjeslnikow do Podstupima wabješe. Ći natwarichu sej tam 150 domčkow z čerwjeneho cyhela. A to su nětko přitulne kofejownje, galerije a wobchodźiki, w kotrychž poskićeja twory wuměłskeho rjemjesła. Na swjedźenju, kiž bě lětsa 18. a 19. jutrownika, móžeš sej tulpy we wšěch móžnych barbach a cyble starych družin tulpow, wšelke rjemjeslniske wudźěłki a słódny twarožk kupić. Tónkróć su wopytowarjow tež rejwarjo De Krekkel zawjeselili. A štóž měješe zbožo, tomu darištej „kwětkowej rjanolince“ krasnu tulpu. Foto: Jolanta B.-Rječcyna
Diety njezwyša
Drježdźany (SN). Frakciji CDU a SPD w Sakskim krajnym sejmje stej wčera njejapcy swój naćisk za nowy Zakoń zapósłancow cofnyłoj. Wopodstatniłoj stej to z připowědźenjom frakcije Lěwicy, zo chce wona naćisk w plenumje wotpokazać. Do toho běše wona znajmjeńša jedne hłosawzdaće připowědźiła, kotrehož dla by parlamentariska wjetšina za nowy zakoń zaručena była.
Přez cofnjenje naćiska njejsu planowane zwyšenja dietow za zapósłancow, frakciske přiražki a pawšale za sobudźěłaćerjow politikarjow nětko móžne – w najhóršim padźe hač do kónca legislaturneje periody nazymu 2029.
To a tamne (22.04.26)
Alfons Schuhbeck nadal do jastwa hić njetrjeba. Z telewizy znateho kucharja a gastronoma su loni mjez druhim wobšudnistwa a dlijenja insolwency dla k štyrjom lětam a třom měsacam jatby zasudźili. Mjeztym je 76lětny na raka schorjeł a tohodla tuchwilu jatbykmany njeje, kaž posudźowar potwjerdźi. Mnichowske statne rěčnistwo je započatk jatby tohodla znajmjeńša hač do septembra přestorčiło. Po tym chce strowotu Schuhbecka znowa přepruwować dać.
W arenje w španiskim měsće Sevilla je wjac hač 500 kilogramow ćežki ćělc ze swojimaj rohomaj woblubowaneho španiskeho torera Morante chutnje zranił. Dwě hodźinje dołho su 46lětneho w chorowni operowali, rozprawja nowina El País. Arena z mjenom La Maestranza je jedna z najznaćišich městnosćow wulkich coridow – bojow z bykami – we kraju.
US-ministerka zastojnstwo złoži
Washington (dpa/SN). Jako třeća žona w běhu sydom tydźenjow wopušći US-ministerka za dźěło Lori Chavez-DeRemer knježerstwo prezidenta Donalda Trumpa. Jeje dotalny zastupnik Keith Sonderling zastojnstwo nachwilnje přewozmje. Hižo wjacore měsacy steješe Chavez-DeRemer wjacorych přepytowanjow njepřiměrjenych rozsudow w zastojnstwje dla pod ćišćom.
Změna na čole koncerna Apple
Cupertino (dpa/SN). Po 15 lětach dóstanje druhi najdrohotniši koncern swěta Apple noweho šefa. John Ternus, kiž je w předewzaću dotal wobłuk hardware nawjedował, naslěduje Tima Cooka, kiž běše wjednistwo w lěće 2011 wot legendarneho sobuzałožerja Steve Jobsa přewzał. 50lětny Ternus, wot kotrehož wočakuja, zo koncern wuspěšnje do doby kumštneje inteligency powjedźe, nastupi nowe zastojnstwo 1. septembra.
Přihotuja so na zmjerzki
