To a tamne (02.04.26)
Socialistiska nowina nd (hač do 2022 Neues Deutschland) wot wčerawšeho hižo wšědny dźeń w ćišćanej formje njewuchadźa. Jenož kónctydźenske wudaće so hišće na papjerje produkuje. Něhdyši centralny organ SED (wot 1946) měješe 1989 hišće 1,2 milionaj abonentow, tuchwilu je jich 12 000. Wudawaćel je nd.drustwo. Wutoru su so z titulom „Tschüss Papier, HALLO PIXEL“ ze wšědnym ćišćanym wudaćom rozžohnowali.
Tři hodźiny w sněze za psom pytali su pomocnicy hórskeje słužby njedaloko Berchtesgadena. Na kóncu móžachu zwěrjo njezranjene zaso jeho wobsedźerce přepodać. Wona bě ze sněhakami ze swojim złotym labradorom na zasněženych horach po puću, jako so pos z nahłeje skały do hłubiny suny. Žona njemóžeše jeho hižo namakać, tuž zawoła hórsku słužbu na pomoc.
„Móžemy wot was něšto nawuknyć“
Serbska měrowa iniciatiwa so w Budyšinje skonstituowała
Budyšin (at/SN). W Serbach pomhać mysl měra šěrić, to chce Serbska měrowa iniciatiwa. Wona je so póndźelu, 30. měrca w Serbskim ludowym ansamblu wutworiła. Dwanatk ludźi, Serbja a Němcaj z Hornjeje a Delnjeje Łužicy, so z hosćom Gerhardom Emilom Fuchsom-Kittowskim, prezidentom Němskeje měroweje rady z.t. z Berlina, wo tym wuměni.
Wuchadźišćo za dalše rozmyslowanje wo měrje leži dwě lěće wróćo. „Tehdy su so serbske wosobiny na iniciatiwu Marka Sucheho na prezidentow Ruskeje federacije a Ukrainy z namołwu wobroćili, zo by so wójna w Ukrainje tak spěšnje kaž móžno zakónčiła“, Hajko Kozel podšmórny. Mało je so po tym stało. Je na času, sej nadawki měroweje politiki w Serbach wuwědomić. Wona akcija najmjeńšeho słowjanskeho ludu za kónc bratrowskeje wójny je Fuchsa-Kittowskeho přewšo jimała. „Jeničce tale symbolowa politika fascinuje. Móžemy wot was něšto nawuknyć“, wón přizna.
Mejemjetanje w Budyšinje přewjesć
Budyšin (SN/MiP). Hinak hač Budyski wokrjes, kiž bě loni na iniciatiwu krajneho rady Uda Witschasa (CDU) pokročowanje Partnerstwa za demokratiju (PfD) zakónčił, wjedźe je město Budyšin dale. PfD su komunalne syće akterow, kiž so přećiwo prawicarskemu ekstremizmej, rasizmej a nječłowjeskosći zasadźuja a tolerantnu, měrliwu a diwersnu zhromadnosć a mjezsobnosć spěchuja. Zwjazk podpěruje wotpowědne komunalne iniciatiwy a projekty financielnje ze srědkami swojeho programa „Žiwa demokratija“.
Tak mjenowane Zwjazkarstwo PfD – hłowny gremij, kotryž wo zapodatych projektach wuradźuje a je schwali – je so wčera w Budyšinje schadźował. Wone ma dohromady 33 čłonow. Předewšěm su to towarstwa, ale tež třěšny zwjazk Domowina je mjez nimi. Lětsa schadźuje so gremij dohromady šěsć króć. Na wčerawšim druhim posedźenju zwjazkarstwa je so jednaćelka Domowiny Judit Šołćina wobdźěliła.
Hegseth: Rozsudne dny
Washington (dpa/SN). Zakitowanski minister USA Pete Hegseth je přeswědčeny, zo su přichodne dny we wójnje přećiwo Iranej rozsudne: „W jenož jednym měsacu smy wuměnjenja postajili, přichodne dny su rozsudne“, rjekny wón na nowinarskej konferency we Washingtonje. Hegsethej by lubo było, wójnu ze zrěčenjom skónčić. Doniž tak daloko njeje, „argumentujemy z bombami.“ Dźensa wječor chce so prezident USA Donald Trump k dalšemu wuwiću wójny přećiwo Iranej wuprajić.
Němska israelski zakoń šwika
Berlin (dpa/SN). Zwjazkowe knježerstwo je rozsud israelskeho parlamenta za znowapostajenje smjertneho chłostanja za teroristow kritizowała. Zwjazkowe knježerstwo zhladuje starosćiwje na nowy zakoń, zdźěli rěčnik knježerstwa Stefan Kornelius. Zakoń w Israelu „drje jenož přećiwo Palestinjanam w palestinskich kónčinach nałožuja“, wón rjekny. Zwjazkowe knježerstwo njemóže tuž rozsudej kneset přihłosować. Mjeztym wšitke čłonske kraje EU zakoń raznje šwikaja.
Bamž křiž sam ponjese
Wulki nawal medijow knježi tuchwilu na swětnišćowym centrumje ...
Płaćizny wšědnje jónu zwyšić
Wójna wiki kóncuje
Předstajeja narodnu drastu
To a tamne (01.04.26)
Kritizuja namjet Merza
Berlin (dpa/SN). Wuprajenja zwjazkoweho kanclera Friedricha Merza (CDU) nastupajo nawrót 80 procentow syriskich ćěkancow z Němskeje do swojeje domizny budźa kritiku, tež ze stron koaliciskeho partnera SPD. „Njeje žana dobra ideja zwjazkoweho kanclera, konkretne ličby w konkretnych časach do ruma stajeć, dokelž njemóže wón tajke wočakowanja snano ani dodźeržeć“, rjekny městopředsydka SPD Anke Rehlinger. Merz bě ličbu w zwisku z wopytom syriskeho prezidenta Ahmeda a-Scharaa mjenował.
Smjertne chłostanje schwalene
Jerusalem (dpa/SN). Israelski parlament je naćisk zakonja wo zawjedźenju smjertneho chłostanja za teroristow wobzamknył. 62 z cyłkownje 120 zapósłancow knesset je wjele diskutowanemu namjetej strony Otzma Jehudit prawicarsko-ekstremistiskeho ministra za policiju Itamara Ben-Gvira přihłosowało. Kritikarjo maja zakoń za rasistiski, dokelž wón faktisce jenož Palestinjanow potrjechi. Němska zakoń wotpokazuje.
Mortwy a zranjeni w Poltawje
