Šwika Bidena
Kral Charles III. pojědźe do Pólskeje
London (dpa/SN). Britiski kral Charles III. je w Buckinghamowym palasće wopory holocausta wopominał. 76lětny zetka wčera popołdnju 94lětneho Manfreda Goldberga, kiž bě koncentraciske lěhwo Stutthof a smjertny pochod přežiwił, kaž tež toho mandźelsku Shary Goldberg.
Kral zaswěći při tej składnosći swěčku projekta „80 swěčkow za 80 lět“, z kotrymž wopory nacionalsocializma wopominaja. Palast wčera rano zdźěli, zo wobdźěli so Charles na wopominanskich swjatočnosćach składnostnje 80. róčnicy wuswobodźenja němskeho nacionalsocialistiskeho lěhwa Auschwitz 27. januara w Pólskej. Do zarjadowanja wočakuje pólski prezident Andrzej Duda britiskeho krala Charlesa III. k rozmołwje.
27. januara 1945 běchu sowjetske wojerske jednotki přežiwjenych němskeho zaničowanskeho lěhwa we wobsadźenej Pólskej wuswobodźili. Nacionalsocialisća běchu tam wjace hač milion ludźi morili, přewažnje Židow. Wot lěta 1996 je to w Němskej dźeń wopominanja holocausta, UNO wopomina róčnicu wot lěta 2005.
Swójski podźěl faluje
Porjedźenka
Pellmann na čole Lěwicy w Sakskej
Drježdźany (dpa/SN). Lipšćanski politikar Lěwicy Sören Pellmann nawjeduje saksku lisćinu swojeje strony k wólbam zwjazkoweho sejma 23. februara. 47lětneho su minjeny kónc tydźenja na delegatnej konferency w Drježdźanach z 92,4 procentami hłosow wuzwolili. Jako dar přepodachu jemu pjasćowarske rukajcy, zo móhł porjadnje „ze swojej lěwicu wudźěleć“. Na druhe a třeće městno wuzwoli něhdźe 150 delegatow bywšeju zapósłancow zwjazkoweho sejma: Druhe městno zdoby sej Caren Lay (50,7 procentow) před Claru Bünger (49,3 procenty).
W swojej narěči pokaza předsydka sakskeje Lěwicy Susanne Schaper na rólu strony w zwjazkowym sejmje. „W tutym času trjebamy sylnu opozicisku móc w zwjazkowym sejmje, kotraž so błudnosći spjećuje. Tuta móc smy my.“ Pellmann je sej wěsty, zo njemóhł zwjazkowy sejm bjez Lěwicy hižo na dobro ludźi dźěłać. Wón je so wo to postarał, zo je Lěwica w zwjazkowym sejmje scyła hišće zastupjena, jako sej nimo Gregora Gysija a Gesiny Lötsch swój direktny mandat zdoby. Lěwica bě ze 4,9 procentami na mjezy pjeć procentow zwrěšćiła.
Zamołwitosć naslědnikej přepodała
To a tamne (14.01.25)
We woknje tčacy wostał je kóń w Eitzumje njedaloko delnjosakskeho Hildesheima. Skoćo bě z wočinjenym woknom do swobody skočić spytało. Při tym pak wosta tčacy a wisaše napoł z wokna. Dźesać wohnjowych wobornikow so wo konja staraše. Pomocnicy jeho najprjedy z pomocu hnoja „stabilizowachu“ a potom z powjazami wućahnychu. Akcija traješe połdra hodźiny. Kóń so při tym njezrani.
Zakaz priwatneho silwesterskeho praskotanja přeje sej wjetšina ludźi w Němskej. 58 procentow wšěch woprašowanych bě zakazej přihłosowało. Tole zwěsća institut Insa při woprašowanju w nadawku organizacije na prawa zwěrjatow Peta. Při praskanju wokoło noweho lěta před tydźenjomaj bě pjeć muži žiwjenje přisadźiło. Peticiju přećiwo praskotakam je 1,9 milionow ludźi podpisało.
Přećiwo mobbingej
Vatikan (B/SN) Na zetkanju z italskimi wučerjemi a kubłarjemi je so bamž Franciskus přećiwo mobbingej w kubłanišćach raznje wuprajił. „Šula kładźe zakłady za sprawniši swět. Hdyž w šuli mjez sobu wójnu wjedźeće, hdyž w šuli holcy a hólcow šikaněrujeće, kiž maja problemy, da so na wójnu přihotujeće, nic na měr!“, praji bamž kubłarjam a wučerjam.
Žadnostka židowskeje zašłosće
Drježdźany (B/SN). W Drježdźanskim měšćanskim archiwje su žadny relikt k židowskim stawiznam města našli. Je to hebrejski rukopisny fragment na pergamenće z 13. lětstotka, wotpisk komentara židowskeho wučenca Bena Shlomoka wo wućahu židowskeho ludu z Egyptowskeje. Kak je so dokument, hižo 1139 w Romje spisany, do Drježdźan dóstał, znate njeje. Komentar pochadźa z knihi Eksodus, zhromadneho prateksta židowskeje a křesćanskeje nabožiny.
Róla bamža za přichod
Trump kritizuje hašenja
Los Angeles (dpa/SN). Přichodny prezident USA Donald Trump je bój přećiwo zahubnym wohenjam w Los Angelesu jako njedosahacy kritizował. „Płomjenja přeco hišće cychnuja. Njekompetentni politikarjo nimaja žane zdaće, kak dyrbja je hašeć“, piše republikan Trump w interneće. Demokratiski guwerner Gavin Newsom je Trumpa na to přeprosył, sej rozměr katastrofy wosobinsce wobhladać. Dotal njeje jemu Trump wotmołwił.
Wo Pokrowsk dale wojuja
Kijew (dpa/SN). We wokolinje Pokrowska na wuchodźe Ukrainy po informacijach generalneho staba ukrainskeje armeje dale zasakle wojuja. Ruske jednotki běchu wčera cyłkownje 50 króć spytali, ukrainske zakitowanske linije přewinyć, w Kijewje zdźělichu. Při tym je Ruska 376 wojakow zhubiła, mjez nimi je 184 mortwych. Njewotwisne pruwowanje ličbow njeje móžne. Pokrowsk je strategisce wažne město zakitowanja Ukrainy.
Milanović wostanje prezident
