Nowy pospyt na dobro wjelryby
To a tamne (17.04.26)
Dulu złota je muž z hornjeje Bayerskeje w starym trezorje namakał. Złoto bě w tajnym fašku schowane, kotryž so připadnje wočini, jako muž trezor powali. 90lětny wobsedźer bě drje na złoto zabył, jako woclany kamor za runje 15 eurow předa. Nowy wobsedźer jemu złoto bjez wahanja wróći. „Štož mi njesłuša, mi žane wjeselo njewobradźa“, 56lětny rjekny. Ćim bóle so 90lětny wjeseleše: Złoto je 32 000 eurow hódne.
Dalšich 129 skóržbow su dźěći w awstralskim Sydneyju přećiwo bywšemu hladarjej zapodali, kotryž wot lěta 2025 znjewužiwanja dźěći dla w přepytowanskej jatbje sedźi. Dotal wumjetuja jemu wosom padow znjewužiwanja. Nowe skóržby potrjechja zhotowjenje materiala wo znjewužiwanju, filmowanje ludźi bjez jich dowolnosće a splažne znjewužiwanje dźěći. Njeskutki su so po dotalnych přepytowanjach w času mjez 2009 w 2025 w dźěsćowni wotměli.
Caritas spěchuje projekty za demokratiju
Hornjołužiski zwjazk Carity přewozmje na jedne lěto koordinowanje „Partnerstwa za demokratiju“. Z tym je poradźowanje wo spěchowanju projektow w měsće Budyšinje za lěto 2026 zahajene.
Budyšin (SN/MiR). „Partnerstwo za demokratiju“ podpěruje tež lětsa zaso kreatiwne projekty, kotrež towaršnostnu zhromadnosć w Budyšinje skrućeja. K tutym słuša mjez druhim 48hodźinska akcija, na kotrejž młodostni na dobro swojeje komuny skutkuja. Pola Biskopičanskeje syće za dźěći a młodźinu KiJu angažuje so Bernadett Zellerowa za tule akciju, kotraž so lětsa hižo 20. raz wotměje. „Wosebitosć lětsa je, zo wjacore wokrjesy akciju w samsnym času planuja. Z tym wočakujemy wjetši angažement. Lětsa wotměje so wona wot 29. hač do 31. meje.“ Po tym zo mějachu akterojo w Budyskim wokrjesu loni wobmyslenja, na kotre wašnje móža ju přewjesć, su partnerojo kaž Budyska wokrjesna a Wuchodosakska nalutowarnja tež lětsa pomoc připowědźili. Wokrjes wšak bě swoju podpěru a z tym tež spěchowanje KiJu w tutym wobłuku a tam wobstejace dźěłowe městno za demokratiju zakónčiło.
USA za nowe rozmołwy
Washington (dpa/SN). Nowe wuradźowanja mjez USA a Iranom móhli so hišće tutón tydźeń zahajić. Tole je prezident USA Donald Trump připowědźił. Knježerstwo we Washingtonje je optimistiske, zo so na „deal“ dojednaja, rjekny rěčnica Trumpa Karoline Leawitt. Druhe koło rozmołwow wotměje so zaso w pakistanskej stolicy Islamabadźe. Tež wiceprezident JD Vance je sej wěsty, zo so z Iranom dojednaja. Prěnje wuradźowanje móžneho přiměra dla bě zwrěšćiło.
Mortwy ruskeho truta da
Odessa (dpa/SN). Při zražce ruskeho truta do bydlenskeho bloka w ukrainskim přistawnym měsće Odessa je wčera wječor znajmjeńša jedyn wobydler žiwjenje přisadźił. Při tym jedna so wo 60lětneho muža, guwerner Oleh Kuper zdźěla. Šěsć dalšich wobydlerjow dowjezechu zranjenych do chorownje. Nastaty woheń móžachu spěšnje zhašeć. W stolicy Kijewje su ruske truty porno tomu wjacore wohenje zawinowali.
Jadrowe milinarnje wužiwać
Z demonstraciju su přewodźerjo pućowacych w lětadłach wčera w ...
Bórze zaso tuńšo tankować?
Pjenjezy za Sudan nazběrali
Berlin (dpa/SN). Na mjeztym třećej mjezynarodnej konferency na dobro Sudana w Berlinje su za běžne lěto wjace hač 1,3 miliardy eurow za humanitarnu pomoc nazběrali, z kotrejž chcedźa hłód tradacym ludźom pomhać. Wonkowny minister Johann Wadephul (CDU) rěčeše wo dobrym znamjenju w swěće, kiž ma „dale a mjenje humanitarnych srědkow“. Němska je swój podźěl na 230 milionow eurow zwyšiła.
W třećim najwjetšim kraju Afriki howri mjeztym tři lěta krawna wobydlerska wójna, kiž zawinuje po informacijach UNO najwjetšu humanitarnu krizu swěta. Tuchwilu je 11,6 milionow ludźi na ćěkancy, wjace hač 19 milionow ludźi trada z hłodom. Pomocne srědki njedosahaja.
Pantisano chce předsyda Lěwicy być
Berlin (dpa/SN). Zapósłanc zwjazkoweho sejma Luigi Pantisano chce so z předsydu strony Lěwicy stać. 46lětny je so za naslědnistwo rozžohnowaceho so předsydy Jana van Akena přizjewił. Předsydu chcedźa na zjězdźe strony w juniju w Podstupimje wuzwolić. Van Aken, kotryž Lěwicu wot lěta 2024 zhromadnje z Ines Schwerdtner nawjeduje, chce so ze strowotniskich přičin wróćo sćahnyć.
„Sym so pokornje za tutu kročel rozsudźił“, Pantisano swój rozsud na swojej internetnej stronje wobkruća. „Lěwica je so z Janom na čole ponowiła a zesylniła.“ Wjace hač 70 000 ludźi je do strony zastupiło. „Zhromadnje smy sej předewzali, z Lěwicy organizowacu klasowu stronu wuwić.“ Strona chce wšěch wróćo zdobyć, kotřiž su wot politiki přesłapjeni a roznjemdrjeni, wón rjekny. Jeho staršej běštaj 1979 do Němskeje přišłoj. Pantisano bě w dźěłaćerskej swójbje wotrostł, na čož je wón jara hordy.
Předsydka frakcije Lěwicy Heidi Reichinnek nochce za předsydku kandidować, dokelž je w swojej funkciji wućežena.
Ludźom FDP njepobrachuje
Liberalni demokraća chcedźa z nowym mustwom na čole zaso do sejma
Berlin (dpa/SN). FDP wojuje wo swoje politiske přežiwjenje, po tym zo je we wjacorych wólbach krajnych sejmow na mjezy pjeć procentow zwrěšćiła. Přiwšěm wjetšina ludźi w Němskej z tym njeliči, zo so na tradicije bohata strona na wulki politiski parket nawróći. Tole pokazuja wuslědki reprezentatiwneho woprašowanja slědźenskeho instituta YouGov w nadawku powěsćernje dpa. Po tym wjace hač 70 procentow woprašanych njewočakuje, zo budźe FDP po přichodnych wólbach zwjazkoweho sejma zaso w parlamenće zastupjena. Něhdźe 43 procentow „to skerje njewěri“ a 30 procentow tole „scyła njewěri“. Jenož 16 procentow ma nawrót strony za móžny.
