Mainz (dpa/SN). CDU a SPD stej so po informacijach němskeje powěsćoweje agentury dpa dojednałoj, w Porynsko-Pfalcowskej prěnju „wulku koaliciju“ wutworić. Nadrobnosće su wčera w Mainzu předstajili. Něšto mjenje hač šěsć njedźel po wólbach bě zajim wobkedźbowarjow wulki, na čo běštaj so dobyćer wólbow Gordon Schnieder (CDU) a Alexander Schweitzer (SPD) dojednałoj. Wo koaliciskim zrěčenju matej so wobě stronje nětko hišće dorozumić. SPD sobotu stronski zjězd zarjaduje. Za CDU rozsudźi samsny dźeń krajny wuběrk strony. Schniedera chcedźa 18. meje za ministerskeho prezidenta wuzwolić. Po 35 lětach skónči so z tym doba, w kotrejž bě SPD ministerskeho prezidenta zwjazkoweho kraja na zapadźe Němskej postajowała.

Berlin (dpa/SN). Němska je w rankingu nastupajo swobodu nowinarstwa po cyłym swěće znowa zestupiła. Zwjazkowa republika je jenož hišće na 14 městnje a je z tym w běhu lěta tři městna přisadźiła. Tole zdźěli organizacija Reporte­rojo bjez hranicow (RSF). Połoženje drje wona nadal jako „spokojace“ pohódnoća, tola žurnalistki a žurnalisća maja so dźeń a časćišo z wušparanjemi w syći a na dróze rozestajeć, w rozprawje rěka. Jako přičinu mjenuje organizacija předewšěm njepřihódny dźěłowy klima. Polarizowace temy kaž rozprawy wo powěsćach wuskutkuja dale a ćeše wuměnjenja w redakcijach, z čimž zdobom ćišć na žurna­listow stupa. Nimo toho rozprawjeja mnozy nowinarjo wo hidźe, difamowanju a spadźe dowěry medijam napřećo. Po cyłym swěće je so swoboda nowinarstwa znowa pohubjeńšiła. Jeničce w sydom krajach hódnoći organizacija RSF połoženje jako „dobre“, tam bydli po wuprajenjach RSF něhdźe procent wšěch ludźi na swěće. Prěnje městno je sej znowa Norwegska wudobyła.

Jehnjatko Henry je najmłódši sobudźěłaćer gmejnskeho zarjada w Čornym lěsu. Šefina radnicy gmejny Enzklösterle Sabine Zenker so wšědnje wo nje stara. Jako dźak ju jehnjo na wšěch jeje terminach přewodźa. Dokelž młodźo hižo mać nima, jemu nětko wjesnjanostka kóždu druhu hodźinu mloko dawa. Mało spara wona za swojeho „synka“ rady akceptuje.

Na awtodróze A 4 w směrje na Drježdźany je wčera popołdnju jězdźidło wójska USA z awtokranom hromadu zrazyło. Kak je k njezbožu blisko přijězda Frankenberg dóšło, policija hišće njewě. Wona pak pad nětko přepytuje. Šofer jězdźidła so lochce zrani. Awtodróha bě w směrje na Drježdźany wjacore hodźiny zašlahana. Škodu trochuja eksperća na něhdźe 50 000 eurow. Nawječor bě jězdnja zaso swobodna.

Washington (dpa/SN). Britiski kral Charles III. je w swojej narěči před kongresom USA wšelakim wuprajenjam prezidenta USA Donalda Trumpa znapřećiwił, bjez toho zo by jeho mjenował. Tak potwjerdźi monarch wuznam NATO, wosebje we wójnje na Ukrainje. Trěbna je „samsna njepowalna rozsudźenosć“, kotruž su zwjazkarjo w swětowymaj wójnomaj, w zymnej wójnje kaž tež w Afghanistanje pokazali, Charles zwurazni. Trump bě stajnje zaso rjekł, zo chcył NATO wopušćić.

Hormuski přeliw dale zawrjeny

New York (dpa/SN). Po zahajenju wójny USA a Israela přećiwo Iranej před měsacomaj je ličba łódźow, kotrež su Hormuski přeliw wužiwali, po informacijach UNO wo wjace hač 95 procentow wo­teběrała. Porno tomu su płaćizny za surowizny žiwidłow wo šěsć procentow stupali, zdźěli rěčnik UNO Stephane Dujarrić w New Yorku. Płaćizna zemskeho wolija je w Europje wo 53 procentow rozrostła. Wuradźowanja wo wotewrjenju přeliwa njejsu dotal ničo wunjesli.

Starmer wothłosowanje přetrał