Damaskus (dpa/SN). Wjace hač połdra lěta po změnje mocy w Syriskej je wčera sudnistwo něhdyšeho prezidenta Bašara al-Assada w njepřitomnosći k smjerći zasudźiło. Před twarjenjom sudnistwa ludźo wusud wyskajo swjećachu, wšako běchu na tutón wažny wokomik w zwisku z předźěłanjom stawiznow kraja dołho čakali. Zasudźenje pak ma skerje symboliski wuznam. Po tym zo běše swoju móc zhubił, ćekny Bašar al-Assad w decembrje lěta 2024 do Moskwy, hdźež do dźensnišeho přebywa. Krjeml bě jemu a jeho swójbje z humanitarnych přičin azyl přizwolił.

Wčerawši wusud běše syriska statna telewizija live přenjesła. Sudnistwo w stolicy Damaskusu wobwinowaše bywšeho mócnarja wotpohladneho mordarstwa, čwělowanja, samowólneho zajeća a złóstnistwa přećiwo čłowjeskosći dla. K smjerći zasudźili su sudnicy tež jeho kuzenka Atefa Nadschiba, bywšeho nawodu politiskeje wěstotneje słužby w južnej prowincy Daria. Tam běchu zajeća młodostnych dla w lěće 2011 prěnje zběžki přećiwo režimej al-Assada wudyrili.

Hladajo na lěto a wyše stupace temperatury změny klimy dla namołwja Sakske statne ministerstwo za hospodarstwo, dźěło, energiju a škit klimy (SMWA) komuny a institucije, so wo financne spěchowanje za škitne naprawy před horcotu požadać.

Drježdźany (SN). We wčerawšej nowinskej zdźělence wuzběhny nawoda ministerstwa Dirk Panther (SPD): „Škit před horcotu njeje nakromna tema, ale wažny nadawk do přichoda za města, gmejny a hospodarstwo. Štóž dźensa planuje a inwestuje, tón dołhodobnje wobydlerjow škita a zdobom jich žiwjensku kwalitu polěpša.“