Čěska njemóže Sakskej wodu dać, dokelž sama dosć nima

Praha (SN/LuNo). Njedostatk wody je wokomiknje najwjetši problem Europy. Najwjetša francoska rěka Loire je nimale prózdna, na mnohich městnach su jenož hišće łuže, hewak je wšudźe pěsk. Woblubowany jězor Lac des Brenets w Šwicarskej je prózdny, jenož hišće mała rěčka w nim běži. Druha najwjetša rěka Europy, Dunaj, ma najmjenje wody w swojich stawiznach. Tohodla je rumunske wójsko póndźelu kanale rozšěriło, zo by wjace wody do Dunaja běžało, dokelž trjebaja ju nuznje za chłódźenje atomowych milinarnjow. Wšo to su zdźělenki tutoho tydźenja. Powěsć, zo su w Bołharskej mało wody dla na dnje Dunaja kosćowc mamuta namakali, hladajo na to lědma koho zwjesela.

Woda je tema tež w Sakskej a Čěskej a hdźežkuli hladaš, we wšitkich rěkach woda pobrachuje. Na južnej Morawje běchu wutoru prěnje wsy bjez wody, dokelž njejsu wobydlerjo po doporučenjach zarjadow wodu lutowali. Nawopak, přetrjeba běše samo stupała, doniž njeběše wodowy reservoir prózdny a ludźo so hóršachu.

Horce lěća a dny – chiba samo tydźenje – bjez dešća wjedu k tomu, zo je přemało wody.

Štož zdaše so dołho problem druhich regionow a krajow kaž Španiskeje abo Italskeje, zaběra dawno nimale cyłu južnu a srjedźnu Europu a je z tym tež naš problem, kotryž tež we Łužicy widźimy a pytnjemy.

Woda je zakład žiwjenja. Tohodla dyrbimy so z problemom přemało wody chutnje a zaměrnje zaběrać!

Je trjeba, zo mamy tež při horcoće, kajkuž ju runje dožiwjamy, wšitcy doma na zahrodźe čerstwy a tučny zeleny trawnik a k tomu pool? Je trjeba, zo z pitnej wodu wopłokujemy a samo awta rjedźimy?

Druhe kraje, wosebje na sewjeru Europy, su w tutym nastupanju wo wjele dale hač (nic jenož) my w Němskej a inowatiwniše a měli nam z přikładom być.

Zo njeby woda jenož žórło našeho, ale tež žiwjenja přichodnych generacijow była! Stefan Šmit