Po nimale měsacu chcedźa w pěsku tčacu wjelrybu w Baltiskim morju nětko z pomocu nakładneho čołma wuswobodźić a do hłubokeho morja dowjezć. Nakładny čołm bě wčera do Kiela dojěł. Wottam ma po kanalu Baltiske morjo docpěć. Najzašo jutře wočakuja čołm na městnje, hdźež wjelryba přeco hišće we wodźe leži. Zwěrjo je mjeztym chětro słabe. Najebać to maja fachowcy wuchowanje za móžne. Nowy pospyt wuswobodźenja financuja priwatnicy.

Njemdri šoferojo, kotřiž so doprědka tłóča a so při tym wěstotneho wotstawka wohladaja, su na dróhach najnjewoblubowaniši. Tole je wuslědk woprašowanja mjez dobrymi tysac šoferami wosobowych awtow. 44 procentow z nich tole najbóle hněwa, mjez žonami je jich samo 47 procentow.

London (dpa/SN). Britiski parlament je wutoru historiski zakoń schwalił, kotryž předawanje tobaka zakazuje. Trěbne ­je jenož hišće formalne přihłosowanje ­krala. Štóž je so po 1. januarje 2009 na­rodźił, njesmě po zakonju hižo cigarety a po­dobne wudźěłki kupować. Kurjenje samo na sebi pak zakazane njeje. Male­diwy su dotal jenički kraj na swěće, w kotrymž su tajki dospołny zakaz tobaka schwalili.

Tankowanski rabat přińdźe

Berlin (dpa/SN). Zwjazkowy sejm je dźensa tak mjenowany tankowanski ­rabat wobzamknył. Knježerstwo zniži z tym dawk na diesel a bencin wot spočatka meje hač do kónca junija wo ně­hdźe 17 centow na liter. Naprawa płaći Zwjazk něhdźe 1,6 miliardow eurow. Zniženje energijoweho dawka chcyše Zwjazkowa rada na swojim posedźenju dźensa připołdnju schwalić.

Přiměr w Libanonje podlěšili