Busy znowa njepojědu
Drježdźany (dpa/SN). Na wuchodnu Saksku so přichodne koło warnowanskich stawkow w regionalnym bliskowobchadźe měri. Dźěłarnistwo Verdi namołwja dźěłopřijimarjow we wokrjesach Zhorjelc, Budyšin, Sakska Šwica-Wuchodne Rudne horiny, Mišno a Drježdźany wot štwórtka hač do njedźele stawkować. Potrjechene su wobchadne předewzaća RBO, GVB, VGH, DVS, VGM a RVSOE, dźěłarnistwo zdźěli. Tramwajki, busy a přewozy zawoda DVB w Drježdźanach porno tomu po planje pojědu.
Pozadk nowych stawkow su dlijace so tarifowe jednanja ze Zwjazkom dźěłodawarjow bliskowobchada, kotrež po informacijach Verdi tež w pjatym kole jednanjow wuslědki wunjesli njejsu. Strona dźěłodawarjow dale žane bytostne powjetšenje finančneho ramika njeposkićuje. Tež centralne žadanja kaž polěpšenje dźěłoweho časa w změnach a wjace lětneho dowola dźěłodawarjo dale zańć nimaja. Nawoda jednanjow ze stron dźěłarnistwa, Sven Vogel, připowědźi w přichodnych tydźenjach dalše, wjetše a wobšěrniše stawki, kotrež nětko hižo planuja.
Teheran swjeći swoje dobyće
Teheran (dpa/SN). W iranskej stolicy Teheranje su po wozjewjenju přiměra wobydlerjo na dróhu šli. Na Naměsće rewolucije w centrumje města zhromadźichu so přiwisnicy knježerstwa. Prezident USA Donald Trump je so žadanjam Irana podwolił, rěčnicy wołachu. „Pozicija Irana w Hormuskim přeliwje je sylnjena. To je dobyće Irana. To je wjećba přećiwo tomu, kiž twjerdźi, zo ma najwjetše a najlěpše wójsko swěta“, tam rěkaše.
Sewjerna Koreja rakety testuje
Seoul (dpa/SN). Sewjerna Koreja je po informacijach wójska Južneje Koreje wjacore rakety krótkeje distancy do směra na wuchod startowała. Rakety padnychu skónčnje do Japanskeho morja, po tym zo běchu 240 kilometrow lećeli. Hižo wčera bě Sewjerna Koreja raketu startowała, kotruž njemóžachu w Južnej Koreji prawje identifikować. Wočiwidnje jedna so wo zwrěšćeny start. Po rezoluciji UNO je Sewjernej Koreji zakazane, balistiske rakety startować.
Nowa koalicija w Mainzu?
Dale a wjac ludźi protestuje w USA přećiwo wójnje swojeho kraja ...
Dowolnosć trěbna njeje
Berlin (dpa/SN). Zwjazkowy zakitowanski minister Boris Pistorius (SPD) je wujasnił, zo njetrjebaja mužojo, kiž su za wójsko kmani, tuchwilu dowolnosć za dlěše wukrajne jězby. Do toho běchu mnozy nowy zakoń wo wobornej słužbje kritizowali. Wón předwidźeše, zo trjebaja mužojo mjez 17 a 45 lětami, kiž chcedźa dlěje hač tři měsacy we wukraju přebywać, za to dowolnosć zwjazkowej wobory. Zakitowanske ministerstwo pak wuzběhny, zo su tajke jězby dowolene, dołhož je woborna słužba dobrowólna.
Runočasnje Pistorius připowědźi, w padźe napjatosćow a njeměrow wotpowědne postupowanje hižo dočasnje přihotować, zo móhli w chutnym padźe spěšnje reagować.
Ćěriwo najebać zakoń dróše
UNO: Přiměr dodźeržeć!
Washington (dpa/SN). Po dojednanju na přiměr mjez USA a Iranom namołwjeja zjednoćene narody wšitke wobdźělene strony, wójnsku přestawku dodźeržeć. Tole je trěbne, zo móhł so „rubać puć trajacemu a wobšěrnemu měrej w regionje“, zdźěli rěčnik generalneho sekretara UNO Antónia Guterresa. Generalny sekretar dwaj tydźenje trajacy přiměr zasadnje wita. Zdobom pak wšitke konfliktne strony pohonjuje, swojim zamołwitosćam wotpowědować, rjekny Stéphane Dujarrić. Z tym poćahowaše so wuraznje na Israel. Iran a USA běchu so krótko do kónca ultimatuma prezidenta USA Donalda Trumpa na přiměr dojednali. Zakład je dźesać dypkow wopřijacy plan Irana. Trump mjenowaše jón „praktikabelny zakład wuradźowanjow“.
Iran je zwólniwy, Hormuski přeliw zaso wotewrěć, zo by zastaranje z wolijom a płunom zaručene było. Teheran pak zdobom připowědźi, zo přeliw zaso zawrěje, jeli USA přiměr njedodźerža.
Plan njefungował
Komunalny deficit zaso wjetši
Wiesbaden (dpa/SN). Deficit komunalnych kasow Němskeje je loni dale rozrostł. Cyłkownu sumu, kotraž w etatach Zwjazka, krajow, gmejnow a socialnych zawěsćernjow pobrachuje, wobliča fachowcy mjeztym na 127,3 miliardy eurow, Zwjazkowy statistiski zarjad we Wiesbadenje zdźěla.
Z tym bě deficit financowanja wo 22,9 miliardow eurow wyši hač 2024 a docpě nimale dokładnje niwow lěta energijoweje krizy 2022.
Hinak hač 2022, jako bě jenož zwjazkowy etat w minusu, rozdźěli so deficit 2025 na wšitke statne runiny. Tuž smě so wočakować, zo so tole tež na zadołženje Němskeje negatiwnje wuskutkuje. Lěta 2022 bě tomu hinak, dokelž je němski stat w prěnim lěće wójny w Ukrainje najebać tehdyše nuzowe połoženje mjenje kreditow wzał hač bě planowane.
Z cyłkownje 31,9 miliardami eurow bě minus pola komunow loni tak wulki kaž hišće nihdy po znowazjednoćenju 1990. Deficit Zwjazka je samsny čas wo dobrej dwě třećinje na 85,4 miliardy eurow rozrostł. Zawinowali su deficit nowe kredity na dobro zakitowanja, infrastruktury a škit klimy.
Kamelija wopytowarjow znowa zahoriła
To a tamne (08.04.26)
Štyrjo astronawća swětnišćoweje měsačkoweje misije Artemis 2 su po puću domoj. Ze swojej kapslu Orion su mjeztym dypk docpěli, hdźež je grawitacija zemje sylniša hač měsačka. W nocy na sobotu ma wobsadka w Pacifiskim oceanje přizemić. Po wjace hač 50 lětach su to prěni astronawća, kotřiž su njedaloko měsačka pobyli. Minjeny štwórtk běchu wotlećeli.
Domjace nadawki w swojej dotalnej formje su po měnjenju zwjazka wučerjow Němskeje wohrožene. Přičina je kumštna inteligenca (KI), kotruž šulerjo dźeń a časćišo wužiwaja. Tež wobšěrniše dźěła we wučbje su přiběrajcy potrjechene. Přichodnje dyrbja so šulerjow dokładnišo prašeć, kak su nadawki spjelnili. Zwonka šule hodźi so mjeztym wšitko z KI zrjadować. Jedna móžnosć je, sej zaso rukopisne dźěła šulerjow žadać, zo bychu jebanstwu zadźěwali.
