Podstupim (dpa/SN). Křesćanske chorownje w Braniborskej posudźuja swoje hospodarske połoženje kritisce a žadaja sej wjace financielneje pomocy wot Zwjazka. „Chorownje steja hižo nětko pjenježnje pod wodu“, rjekny wobchodny předsyda Zwjazka chorownjow diakonisow w Teltowje Hans-Ulrich Schmidt. Hladajo na reformu wón praji: „Njemóžemy sej hižo we wšitkich chorownjach kompletny poskitk dowolić.“ Z někotrych klinikow drje stanu so fachowe chorownje. Cyłkownje 15 čłonskich chorownjow Zwjazka diakonisow zastaruje wob lěto něhdźe 185 000 pacientow. Tam dźěła 5 500 ludźi. Domy nadźěłachu lěta 2024 nimale 530 milionow eurow wobrota. Chorownja w Teltowje je nastupajo management za chorownju w Baršću zamołwita, byrnjež ta Zwjazkej diakonisow njepřisłuša. Chorownje bědźa so wosebje z inflaciju a z raznymi zwyšenjemi tarifow. Domy žadaja sej wot Zwjazka pjenježne wurunanje za přiběrace wudawki. Reforma chorownjow, kotraž bě so spočatk 2025 zahajiła, ma kóšty znižić a kwalitu zwyšić. Chorownje steja pod wulkim pjenježnym ćišćom: 80 procentow z nich dźěłaja z běžnym deficitom.

W piwowym stanje dyrbjachu pomocnicy minjenu njedźelu w Augsburgu listowe wólby wuličić. Tradicionalna městnosć, wulka wikowanska hala, bě w třećim najwjetšim měsće Bayerskeje wobsadźena. Poprawom podłožki listowych wólbow tam rjaduja a wuliča, před tydźenjomaj pak to móžno njebě. Při planowanju terminow drje njejsu na móžne rozsudne wólbne koło myslili. Dokelž bě wulki piwowy stan za jutry hižo natwarjeny, wobalki tam wuličichu.

Kumštna inteligenca je we wšědnym žiwjenju mnohich dźěći a młodostnych mjeztym kruće zakótwjena. Na wšěch 21 procentow wšěch woprašanych w starobje mjez dźesać a 17 lětami programy kaž ChatGPT abo Gemini wjace króć wob tydźeń wužiwa, šěsć procentow čini to wšědnje, chorobna kasa DAK zwěsća.

Vatikan (B/SN). Bamž Leo XIV. je ze swojimi najwušimi sobudźěłaćerjemi do renowěrowaneho bydlenja pod třěchu na Pětrowym naměsće we Vatikanje zaćahnył. Bydlenje wobsteji z wjacorych stwow, z biblioteki a z fitnesoweje rumnosće. Nimo toho ma priwatnu kapałku a dźěłowu stwu z woknom na Pětrowe naměsto. Po póndźelach wón zwjetša w Castelu Gandolfo přebywa.

Dowěra Američanow

New York (B/SN). Po naprašowanju New-Yorkskeho sćelaka NBC ma wobydlerstwo USA jeničce dwěmaj wosobomaj dowěru: W Chicagu rodźenemu bamžej Lejej XIV. a komediantej Stephenej Colbertej. Přezjedni su sej tysacy woprašanych w jara negatiwnym hódnoćenju prezidenta Donalda Trumpa a dalšich načolnych politikarjow.

Dwělomne herbstwo misionow

Berlin (dpa/SN). Předsyda SPD Lars Klingbeil wočakuje po słabym wuslědku swojeje strony we wólbach krajneho ­sejma w Porynsko-Pfalcy personalne dis­kusije. Prašenje za wosobinskimi konsekwencami Klingbeil w sćelaku ARD njewotmołwi. Wón město to připowědźi, zo chcył „debatu wo reformach“ znowa nastorčić. Předsyda frakcije SPD w zwjazkowym sejmje Matthias Miersch wosobinske konsekwency na čole strony wotpokazuje. „To tla njeby ničo přinjesło.“

Zeleni nětko na čole Mnichowa

Mnichow (dpa/SN). Zeleni su sej w Mnichowje prěni króć w stawiznach města najwyše zastojnstwo radnicy zdobyli: W rozsudnym kole we wólbach wyšeho měšćanosty je so 35lětny kandidat Zelenych Dominik Krause přećiwo wjele­lětnemu mějićelej zastojnstwa Dieterej Reiterej (SPD) přesadźił. To je posledni dźeń swojeje politiskeje karjery, rjekny Reiter po wuličenju wólbow. Wón přizna, zo je wólby „sam skepsał“.

Apoteki zawrjene wostali