Wutwarja železnisku čaru
Hrody a parki dyrbja lutować
Drježdźany (dpa/SN). Hrody a parki Sakskeje přiwabjeja syły wopytowarjow. Loni zličichu w objektach, w kotrychž maja ludźo zastup płaćić, dobrej dwaj milionaj wopytowarjow. To je nimale runje telko kaž lěto do toho, Statny zawod za hrody a parki (SBG) zdźěla. Hród Pillnitz z parkom wopyta 313 000 hosći, při čimž bě jich loni 94 000 mjenje hač 2024. Přičina njebě jenož špatne wjedro. Sypnjeneho Carolineho mosta dla njebě móžno, so z parnikom po Łobju na wulět do Pillnitz podać.
Hród w Moritzburgu je sej 306 000 wopytowarjow wobhladało. Drježdźanska železnica wožeše 224 000 hosći po parku Wulkeje zahrody. Statny zawod hrodow a parkow je swój wobrot na 13,5 mio. eurow zwyšił. Swobodny stat je 2025 cyłkownje 16,8 mio. eurow připłaćił (2024: 16,0 mio.). Starosće wobradźeja zamołwitym zalutowanja. Nimale wšudźe su postajili, durje za wopytowarjow přidatne dny zawrjene wostajić. Zo bychu stupace wudawki za milinu wurunali, zatwarja w někotrych objektach solarne připrawy. Palmowy pawiljon w Pillnitzu škitaja z wosebitej foliju před zymu.
To a tamne (19.03.26)
Finojo su najzbožowniši lud swěta. W najnowšej swětowej rozprawje wo zbožu steja wobydlerjo kraja na sewjeru Europy dźewjaty króć pospochi na prěnim městnje. Z Islandskej, Danskej a Šwedskej zaměstnja so tři dalše sewjerne kraje mjez prěnimi pjećomi. Mjez nimi steji Costa Rica na 4. městnje. Němska je so z 22. na 17. městno polěpšiła a při tym Awstrisku přesćahnyła.
Z wisatym mostom wabi Eiffelowa wěža w Parisu nowych wopytowarjow. Něhdźe 60 metrow wysoko móža so zmužići na čumpaty zwisk mjez wuchodnym a zapadnym sćežorom wěže zwažić. Móst wobsteji ze saka, splećeneho z robustnych powjazow, po kotrymž móža turisća a domoródni krosnować. Nowa atrakcija ma najprjedy raz hač do 3. meje na prěnim poschodźe sławneje wěže přistupna być. Ludźo čakaja w dołhich rynkach na zastup.
Dwurěčne popisanja su zakonske prawo
Serbska rada Braniborskeje je so wčera ze wšelkimi temami rozestajała. Nimo digitalneho kulturneho registra zaběrachu čłonow tež straty na polu zjawneje dwurěčnosće.
Němska poskićuje pomoc
Berlin (dpa/SN). Němska a Francoska poskićujetej USA a Israelej pomoc nastupajo politiske rozrisanje w potrjechenej kónčinje po skónčenju wójny přećiwo Iranej. Přihotować měli so wotpowědne rozmołwy, z kotrymiž je móžno, zhromadnje z krajemi Persiskeho zaliwa puć k nowej wěstotnej architekturje namakać. Tole je sej wonkowny minister Johann Wadephul (CDU) na podijowej diskusiji ze swojim francoskim kolegu Jeanom-Noëlom Barrotom w Berlinje žadał.
Iranski funkcionar morjeny
Teheran (dpa/SN). Iran je wobkrućił, zo je wodźacy funkcionar Ali Laridźani žiwjenje přisadźił. Powěsćernja Fars rozprawja, zo bě generalny sekretar narodneje wěstotneje rady „jako martrar“ zemrěł. Laridźani bě minjeny čas jako jedna z centralnych wosobinow w iranskim mócnarskim aparaće postupił. Israelski zakitowanski minister Israel Katz je zdźělił, zo bě wójsko kraja Alija Laridźanija při zaměrnym nadpadźe moriło.
Raketa milinarnju trjechiła
Wšitke lěty wotprajene! Tole bě jenička informacija, kotruž ...
UNO wumjetuje Israelej namóc
Genf (dpa/SN). Židowscy sydlerjo w Zapadnojordanskim kraju su swoje aktiwity minjeny čas widźomnje zesylnili. To wuchadźa z rozprawy běrowa UNO za čłowjeske prawa. Akcije na to pokazuja, zo su z politisce zamołwitymi wothłosowane a zo měrja so na to, arabskich wobydlerjow wućěrić a kónčinu etnisce wučisćić. Namócne přesydlenje ludźi by po měritkach UNO wójnske złóstnistwo było.
Běrow dokumentuje w času hač do oktobra 2025 cyłkownje 1 732 padow namocy židowskich sydlerjow, dwanaće měsacow do toho bě jich 1 400 padow. Palestinjenjo ćerpja njepřestajne šikany a zatrašenja, wobrónjeni sydlerjo jich domy a pola zniča, zo bychu jich wućěrili. Israelski stat tole podpěruje.
SPD čaka na posudk z Berlina
Berlin (dpa/SN). Wonkowny politikar a zapósłanc SPD w zwjazkowym sejmje Adis Ahmetović žada sej wot zwjazkoweho knježerstwa ludoprawniski posudk nadpadow USA na Venezuelu a Iran. Wobaj nadpadaj njewotpowědujetej směrnicam ludoweho prawa, rjekny wonkopolitiski rěčnik frakcije SPD w zwjazkowym sejmje nowinarjam.
Dobrej tydźenjej po zahajenju wójny USA a Israela přećiwo Iranej doskónčny ludoprawniski posudk zwjazkoweho knježerstwa přeco hišće njepředleži. Zwjazkowy kancler Friedrich Merz (CDU) je dotal jeničce rjekł, zo tajki posudk lědma što wuskutkuje. Wobdźělenje Němskeje na misiji w Hormuskim přeliwje wón wotpokazuje.
Trump pomoc NATO hižo njetrjeba
Washington (dpa/SN). Prezident USA Donald Trump je NATO kritizował, dokelž jemu podpěru při zawěsćenju wolijowych tankerow w Hormuskim přeliwje zapowědźa. W Běłym domje Trump rjekny, zo je wot zwjazkarjow přesłapjeny. Wón je sej wěsty, zo je to „błazny zmylk“. Do toho Trump na swojej internetnej stronje pisaše, zo běchu jeho zwjazkarjo NATO wo tym informowali, zo so na wojerskim zasadźenju w Hormuskim přeliwje njewobdźěla. Informacija bě jeho „šokowała“, tak Trump. Słowo zwjazkarjo staji wón do pazorkow.
Trump dale piše, zo hižo wo dalšu pomoc partnerow za zaručenje wěstoty łódźow njerodźi. „Dokelž smy tajke wojerske wuspěchi docpěli, pomoc krajow NATO hižo njetrjebamy.“ To samsne płaći za Japansku, Awstralsku a Južnu Koreju. Do toho bě Trump NATO chětro raznje namołwjał, jemu wojersce pomhać.
