Wuradźowanja dobre a wunošne
Genf (dpa/SN). W třećim kole wuradźowanjow z USA su po informacijach iranskeho wonkowneho ministerstwa dalše wuspěchi docpěli. Přichodnu póndźelu planuja „techniske rozmołwy“, rjekny wonkowny minister Abbas Araghtschi nowinarjam. Potom chcedźa sej nadrobnosće móžneho zrěčenja z USA dorěčeć. „Chutnosć jednanjow bě widźomniša hač hdy do toho“, minister hladajo na wuradźowanja podšmórny. Po jeho słowach bě konferenca w Genfje „najlěpša a najwunošniša scyła“.
We wuradźowanjach dźe wo wjele diskutowany atomowy program Irana. USA chcedźa tomu zadźěwać, zo twari Iran atomowu bombu. Iran na tym wobstawa, jadrowu energiju wužiwać směć.
Pakistan a Afghanistan wojujetej
Kabul/Islamabad (dpa/SN). Po ofensiwje afghaniskich talibanow je Pakistan z wojerskimi lětadłami objekty w susodnym kraju nadběhował. Při tym su tež afghansku stolicu Kabul a objekty w prowincomaj Kandahar a Paktia bombardowali. Wo woporach njeje hišće ničo znate.
Afghanistan bě do toho zepěranišća pakistanskeje armeje w pomjeznej kónčinje – wo kotruž so wadźa – nadběhował. Při tym su 55 pakistanskich wojakow morili. To zdźěla zakitowanske ministerstwo w Kabulu.
Generalny sekretar UNO António Guterres je Pakistan a Afghanistan namołwjał, so dalšeje namocy wzdawać a problemy diplomatisce rozrisać.
Poćahi mjez susodnymaj krajomaj Afghanistan a Pakistan su hižo dlěje napjate a su so minjeny čas masiwnje pohubjeńšili. Minjenu nazymu bě k prěnim wojowanjam dóšło. Tehdy je 70 afghaniskich ciwilistow zemrěło. Pakistan wumjetuje Afghanistanej, zo hospoduje w swojim kraju teroristow, kotřiž w Pakistanje stajnje zaso nadpady skućeja.
To a tamne (27.02.26)
Nakładne awto z ruku ćahnyć – a to cyłu hodźinu – chce Felix Zappe z Berlina. 35lětny, kiž je hižo ćahi a awta ćahał, zwaži so tak na nowy rekordny pospyt. Při tym chce wón čaru 750 metrow zmištrować. Přewjesć chcedźa rekordny pospyt jutře w centrumje wobchadneje wěstoty ADAC w braniborskim Linthe. Na ćahanje jězdźidłow bě so Zappe za čas koronapandemije specializował, „jako běchu wšě fitnesowe studija swěta zawrjene“.
Při lawinowych njezbožach je lětsa w Awstriskej dotal 26 ludźi žiwjenje přisadźiło. To je wo wjele wjace hač po wjelelětnym přerězku, awstriski kuratorij za wěstotu w Alpach zdźěla. Wosebje zlě bě mjez 15. a 24. februarom, jako 14 ludźi pod sněhom zahiny. Mjez woporami su štyrjo z Němskeje – pućowar a třo sněhakowarjo kotřiž, běchu zboka přihotowanych čarow po puću.
Istrorumunojo – Na mjezy pozhubjenja rěče
Najebać někotre wuspěšne prócowanja wo etniskorěčnu rewitalizaciju (Baskojo, Walizojo, Samojo …) namakamy w Europje wjacore etnikumy a rěče na kóncu swojeje eksistency. Tajkimle skupinam přisłušeja tež Istrorumunojo, rěčacy wosebitu romanisku rěč. Woni su dotal žiwi w někotrych zanjesenych kutach połkupy Istra na sewjeru Chorwatskeje. Tučasne mnóstwo rěčnikow istrorumunšćiny pak njehodźi so runjewon lochce postajić. W encyklopedijach nańdźemy w tym zwisku často ličbu tysac, kotraž pak wuchadźa ze situacije před modernej globalizaciju a mobilitu wobydlerstwa. Mnozy istrorumunsce rěčacy njebydla mjeztym hižo w swojich tradicionelnych sydlišćach, ale su do druhich kónčin kraja přećahnyli. Za cyłu Chorwatsku płaći dźensa skerje podaće wo něhdźe 500 wosobach (z toho jenož někotre dźesatki młódšich), kotřiž su rěče kmani. Nimo toho eksistuje paradoksneho razu 400 do 500 ludźi wopřijimaca skupina istrorumunskich wupućowarjow, kotraž je domiznu mjez lětami 1945 do 1970 do zamórskich krajow (USA, Kanada, Awstralska) wopušćiła.
Zelenskyj a Trump telefonowałoj
Kijew (dpa/SN). Ukrainski prezident Wolodymyr Zelenskyj je z prezidentom USA Donaldom Trumpom telefonisce wo přichodnych wuradźowanjach nastupajo skónčenje ruskeje wójny přećiwo Ukrainje rěčał. Při telefonaće přitomnaj běštaj tež wurjadny pósłanc USA Steve Witkoff a přichodny syn Trumpa, Jared Kushner. Zelenskyj dźakowaše so USA za jeje pomoc. Dźensa běchu nowe wuradźowanja USA a Ukrainy w Genfje planowane.
2025 žurnalistam smjertne lěto
New York (dpa/SN). Lěta 2025 su po informacijach komiteja za škit žurnalistow telko nowinarjow a sobudźěłaćerjow medijow morili kaž minjene tři lětdźesatki nic wjace. Cyłkownje 129 tajkich smjertnych padow su zličili, w New Yorku zdźělichu. Za najwjace mortwych bě Israel zamołwity. Wjace hač 60 procentow wšěch 86 wot Israela morjenych zastupnikow medijow běchu palestinscy žurnalisća, kotřiž z Gazaskeho pasma rozprawjachu.
Dawk na cokor witany
Zwjazkowy kancler Friedrich Merz (CDU) je we wobłuku swojeje wizity w ...
Štyrjo mortwi na čołmje z USA
Iran nowy naćisk předpołožił
Madźarska liči z akcijemi Ukrainy
Budapest (dpa/SN). Madźarski ministerski prezident Viktor Orbán je přikazał, energijowu infrastrukturu swojeho kraja z wojakami a policistami škitać. Hłowna přičina je podhlad, zo planuje susodna Ukraina nadpady na madźarske energetiske zastaranje. Tole rjekny Orbán po posedźenju zakitowanskeje rady swojeho kraja w Budapesće. W zakitowanskej radźe dźěłaja mjez druhim nawodźa wójska a tajnych słužbow. Nimo toho je Madźarska zakazała, truty w powětrowym rumje podłu ukrainskeje mjezy wužiwać.
„Widźimy, zo Ukraina dalše akcije přihotuje, zo by energijowy system Madźarskeje myliła. Tohodla sym wukazał, kritisku energijowu infrastrukturu wosebje škitać“, Orbán rjekny. Policisća a wojacy maja „nadpadam zadźěwać“.
Madźarska Ukrainje wumjetuje, zo ruski zemski wolij blokuje, kiž Madźarska přez wolijowód „Družba“ dóstanje. Dołhož tole tak wostanje, njebudźe Madźarska nowemu kreditej 90 miliardow eurow na dobro Ukrainy přihłosować. Pipeline zastaruje Madźarsku a Słowaksku.
Hroža masiwne haćenja
Dźěłarnistwo ver.di planuje jutře warnowanske stawki bliskowobchada
Lipsk (dpa/SN). Ludźo w Sakskej dyrbja so kónc tydźenja na masiwne haćenja w bliskowobchadźe nastajić. Cyłoněmskeho warnowanskeho stawka dźěłarnistwa ver.di dla drje busy a nadróžne jutře we wjacorych městach njepojědu, w Lipsku najskerje tež sobotu nic. Přistajeni komunalnych wobchadnych zawodow su w nimale wšitkich zwjazkowych krajach namołwjeni, stawkować, ver.di zdźěla. Za dojězdźowarjow, šulerjow a staršich změje tole zdźěla razne wuskutki.
Ćežišćo stawka w Sakskej je jutře, pjatk. To chcedźa přistajeni komunalnych bliskowobchadnych zawodow w Drježdźanach, Kamjenicy, Šwikawje a Plauenje dźěło złožić. W Lipsku su stawki za pjatk a sobotu připowědźili. Najebać to njebudźe wobchad wšudźe dospołnje zlemjeny. W někotrych kónčinach zasadźuja priwatne busowe předewzaća.
Wobchadny stawk je na komunalne wobchadne předewzaća wobmjezowany. Tež regionalne ćahi, měšćanske železnicy a ćahi Němskeje železnicy po planje dale pojědu.
