Drježdźany (SN). Sakska je swjedźensku tradiciju karnewala, póstnicow a zapusta na wuchodźe Němskeje do krajneje lisćiny imaterielneho kulturneho herbstwa přiwzała. We wčera wozjewjenej medijowej zdźělence ministerki za kulturu a turizm Barbary Klepsch (CDU) k tomu rěka: „Wuchodoněmski karnewal je wjace hač prosty nałožk. Je wuraz zhromadnosće a kreatiwity. Přez generacije su čestnohamtsce skutkowacy tutón wosebity kulturny podawk wobchowali a dale wuwiwali.“ Požadanje wo přiwzaće tradicije běchu wuchodoněmske wotnožki Zwjazka němskich karnewalow wudźěłali. W Durinskej a Braniborskej bu hižo do wotpowědnych lisćinow zapisana.

Spočatki wuchodoněmskeho karnewala sahaja hač do srjedźowěka wróćo a su wusko z křesćanskim póstnym časom zwjazane. Najstarši nałožk naspominacy historiski dokument z lěta 1391 chowaja w durinskim městačku Königsee. Dźensa pěstuje něhdźe 95 000 čłonow w dohromady 930 towarstwach w Braniborskej, Berlinje, Mecklenburgsko-Předpomorskej, Sakskej, Saksko-Anhaltskej a Durinskej karnewalistisku tradiciju.

Štyrjoch so tepjacych z rěki Ruhr wuchowała je angažowana kolesowarka w Bochumje. Po informacijach policije běchu najprjedy tři žony při swójbnym grilowanju na přibrjoze rěki do wody padnyli. Přiwuzny chcyše jich wuchować. Dokelž pak runja žonam płuwać njezamóže, tčeše spěšnje sam w nuzy. Připadnje nimo jěduca kolesowarka – lěkarka – na blaku zapřimny, wšitkich z wody wućahny a zahaji naprawy prěnjeje pomocy.

Dowolowa łódź „Hondius“, na kotrejž běchu před něšto tydźenjemi třo pasažěrojo infekcije z hanta-wirusom dla ze­mrěli, je wot přichodneho kónca tydźenja zaso na morjach swěta po puću. Zamołwići nižozemskeje łódźernje Oceanwide Expeditions zdźěleja, zo su fachowcy łódź dokładnje wurjedźili a desinfikowali, tak zo su nižozemske strowotniske zarjady dowolnosć za dalše wužiwanje dali.

Erfurt (B/SN). Ministerski prezident Durinskeje Mario Voigt zasudźa financielne hroženja strony AfD napřećo cyrkwjam a nabožinam. Nabožinska swoboda je w Zakładnym zakonju rjadowana, a statna pomoc njeje dar knježerstwa, ale zapisane prawo. „Stronje AfD faluje přistojnosć“, praji Voigt redakciskej syći Němskeje. W padźe přewzaća mocy chce AfD cyrkwjam financy skrótšić.

Wabjenje za wučbu nabožiny

Drježdźany (B/SN). Sakska ewangelska krajna cyrkej je wudała nowy wabjenski material za nabožinu, kotryž hodźi so na zakładnych a srjedźnych šulach kaž tež na gymnazijach wužiwać. Material, wobstejacy z pohladnicow, plakatow a jara wobšěrnych informacijow, je předewšěm za wučerjow, ale tež za šulerjow předwidźany. Dalše informacije pod

Přećiwo zanjerodźenju přirody