Mnichowska konferenca zahajena
Mnichow (dpa/SN). Ze zasadnej narěču wo wonkopolitiskich prašenjach je zwjazkowy kancler Friedrich Merz (CDU) dźensa Mnichowsku wěstotnu konferencu zahajił. Při tym so wón za to wupraji, Europu jako samostatnu politisku móc sylnić a tež hladajo na zakitowanje skrućić. Nowa politika prezidenta USA Donalda Trumpa na mjezynarodnej runinje je Merzej nastork, naležnosće Europy w swójskej zamołwitosći rjadować. Wuraznje so kancler za to zasadźowaše, styki Europy z USA dale pěstować.
Lětuša wěstotna konferenca je po informacijach zarjadowarjow konferenca superlatiwow. Na nju wočakuja wjac hač 60 statnych a knježerstwowych šefow, to je wjace hač hdy do toho. Nimo toho wobdźěli so wjac hač sto wonkownych a zakitowanskich ministrow. W srjedźišću wuradźowanjow steja łamki swětoweho porjada, wójna w Ukrainje a hrožaca wójna mjez USA a Iranom. Na kromje konferency wočakuja wjacore demonstracije, mjez druhim přećiwo awtoritarnemu iranskemu knježerstwu w Teheranje.
Zwada Nobeloweho myta dla
Njesłyšany diplomatiski skandal mjez Waršawu a Washingtonom
Waršawa. Polacy nochcedźa swojimaj wušomaj a wočomaj wěrić: Tradicionalnje dobre a wutrobne poćahi k USA su po skurilnej diplomatiskej zwadźe, kotraž nima w najnowšich stawiznach swojeho runjeća, ćežko wobškodźene.
Minjeny štwórtk bě wulkopósłanc USA w Pólskej Tom Rose wozjewił, zo USA wšitke styki z prezidentom pólskeho sejma Włodzimierzom Czarzastym přetorhnu. Přesyda sejma bě rjekł, zo spožčenje měroweho Nobeloweho myta prezidentej USA Donaldej Trumpej wotpokazuje. Do toho bě kongres USA zhromadnje z nawodnistwom israelskeho parlamenta Knesset wšitkim krajam list z namołwu pósłał, so za Trumpa jako noweho lawreata myta wuprajić. Po diplomatiskim eklaće so dale a wjace pólskich politikarjow z prezidentom sejma we Waršawje solidarizuje.
Porjedźenka
To a tamne (13.02.26)
Třeći króć dwójnikaj wočakuje Jasmin Schmidt z frankskeho Fürtha. Spočatk junija matej so holčce narodźić. Starše sotry – dwójniki – narodźichu so 2023 a 2024. Zo so w tak krótkim času trójce dwójniki narodźa, je něšto cyle wosebiteho. Tež w Fürthskej chorowni maja tole za wulki připad přirody, ćim bóle, dokelž njebuchu jejkowe bańki kumštnje wopłodźene. Přemało železa w kreji dla dyrbi mać prawidłownje do kliniki. Hewak pak so 36lětnej dosć derje dźe.
5,5 milionow nowych chłostanskich jednanjow su statne rěčnistwa loni w Němskej zličili. Ličba njewotzamknjenych sudniskich procesow je w tym zwisku mjezu miliona padow překročiła. Tole zdźěla Zwjazk sudnikow Němskeje. Kónc 2020 bě jich hišće 700 000 wotewrjenych padow. Hač do dźensnišeho je to rozrost wo nimale 50 procentow, sudnicy zdźěla.
Franjo von Allmen z historiskim hattrickom
Pjaty wubědźowanski dźeń Zymskich olympiskich hrow w Italskej wobradźi nam hnujace wokomiki při alpinskim sněhakowarskim sporće, napjatosć při biatlonje a wyskanje w lodowym kanalu. Předewšěm jedne mjeno njebě wčera přesłyšeć: Franjo von Allmen.
W alpinskej sněhakowarskej disciplinje super-G muži zawěsći sej Franjo von All-men ze Šwicarskeje w 1:25,32 min. złotu medalju. Z tym 24lětny swoju wosobinsku olympisku stawiznu dale pisaše. Po tym zo bě von Allmen we wotjězdźe a w mustwowej kombinaciji triumfował, bě to hižo jeho třeća złota medalja na tutych hrach. Tole je w alpinskim wobłuku wurjadna serija, kotraž dopokazuje jeho wobstajnosć a dominancu. Trójne olympiske dobyće w běhu něšto dnjow je samo w na tradicije bohatym sněhakowarskim sporće absolutne wuwzaće. Slěbro doby Ryan Cochran-Siegle z USA a bronzu zawěsći sej superstar Marco Odermatt ze Šwicarskeje.
Wjeršk putniskeje jězby je skupina serbskich holcow, žonow a ...
Merz měł z Putinom rěčeć
Mnichow (dpa/SN). Přemóžaca wjetšina wobydlerjow Němskeje přeje sej direktne rozmołwy zwjazkoweho kanclera Friedricha Merza (CDU) z ruskim prezidentom Wladimirom Putinom wo skónčenju wójny w Ukrainje. Při woprašowanju instituta YouGov w nadawku powěsćernje dpa by 58 procentow tajke styki witało, 26 procentow je wotpokazuje. Merz rozmołwy z Putinom dotal wuzamkuje, pokazawši na trěbne zhromadne postupowanje Europy, Ukrainy a USA.
Zelenskyj za přistup do EU
Kijew (dpa/SN). Ukrainski prezident Wolodymyr Zelenskyj sej žada, zo zapisaja w zrěčenju wo skónčenju wójny w Ukrainje kruty datum přistupa swojeho kraja do EU. Wažne je, zo je Ukraina hač do 2027 k tomu zwólniwa. „Žadam sej dokładny datum“, Zelenskyj potwjerdźi. Bjez tajkeho zapiska budźe Ruska dale spytać, proces přistupa Ukrainy blokować, je sej Zelenskyj wěsty. EU je za Ukrainu „jedna z trěbnych wěstotnych garantijow“.
Ministerka zmylk přiznała
W awstralskej metropoli Melbournje su dźensa přećiwo wopytej ...
Bolostna poražka za Trumpa
Washington (dpa/SN). Wjacori zapósłancy strony republikanow prezidenta Donalda Trumpa su w Domje reprezentantow wotum přećiwo cłam přesadźili, kotrež bě Trump přećiwo Kanadźe wukazał. Nimo skoro wšěch demokratow běchu tež šesćo republikanojo za rezoluciju hłosowali, kotraž ma cłam Trumpa zakład wzać. Republikanojo maja snadnu wjetšinu w tutej komorje parlamenta.
Rezolucija ma symboliski charakter. Za Donalda Trumpa pak je wothłosowanje bolostna politiska poražka. Hač do poslednjeho wokomika bě wón spytał, wotumej parlamenta zadźěwać. Zapósłancam swojeje strony wón z konsekwencami hrožeše, jeli so stronskej disciplinje njepodwola.
Skućićelka 18 lět stara była
Tumbler Ridge (dpa/SN). Po krawnym wobrónjenym nadpadźe w šuli na zapadźe Kanady su skućićelku identifikowali. 18lětna młoda žona bě w sydlišću Tumbler Ridge bydliła. Wona je so wčera do šule městačka zadobyła a tam šěsć wosobow a pozdźišo sebje samu moriła. Dwě dalšej ćěle je policija w bliskim domje našła. Wočiwidnje njeskutkaj mjez sobu zwisujetej. Woporaj staj 39lětna mać a 11lětny přirodny bratr podhladneje.
18lětna drje bě jeju zatřěliła a so po tym do šule podała. Tam policija pozdźišo wopory na schodach a w bibliotece namaka: tři šulerki, dweju šulerjow a wučerja. Policija rěčeše spočatnje wo dźesać mortwych, pozdźišo to skorigowa. Po jeje informacijach bě 18lětna wospjet psychiskich problemow dla napadnyła.
