Muža ze sydom a poł kilogramom šokolady we wačoku je zwjazkowa policija na hłownym dwórnišću Kamjenicy lepiła. Po informacijach policije měješe muž dohromady 24 taflow šokolady při sebi. Jako zastojnicy jeho personalije kontrolowachu, zwěsćichu, zo jeho hižo padustwa dla pytaja. Dokelž muž ani za słódkosće ani za tři pakćiki cigaretow w toši dopokaz nakupa njeměješe, mužej nětko dalše padustwo wumjetuja.

Runje tak kaž křesćenjo zahaja tež muslimojo dźensa čas posćenja. Započatk jich póstneho měsaca ramadana padnje lětsa na nóc mjez dźensnišej srjedu a jutřišim štwórtkom. Dźensa, popjelnu srjedu, zahaji so tohorunja 40 dnjow trajacy póstny čas do jutrow. Ramadan traje dokładnje měsac. W Němskej zahaja jón oficialnje jutře, w mnohich arabskich krajach pak hižo dźensa.

Cortina d’Ampezzo (SN/JFK/MiR). Wot 6. hač do 22. februara wotměwaja so w Mailandźe a w Cortinje d’Ampezzo na sewjeru Italskeje 25. zymske olympiske hry. Něhdźe 2 900 sportowčow a sportowcow so tam wubědźuje. Cortina d’Ampezzo leži wosrjedź domizny mjeńšiny Ladinow, dalše olympiske wubědźowanišća su w bliskosći. Zwjazk Ladinow poskićuje we wobłuku hrow wjacore přewodźace aktiwity. Tak su mjez druhim mini-słownički ze sportowej terminologiju w ladinšćinje z přełožkom do wjacorych rěčow přihotowali. Dale wudawaja informaciski material wo Ladinskej za mjezynarodny publikum. Z lokalnymi akcijemi skedźbnjeja hosći na ladinsku woprawdźitosć. Zakład za to su nazhonjenja ze 7. zymskich olympiskich hrow, kiž běchu so 1956 na samsnym městnje wotměli. Tutón podawk měješe skerje negatiwne wuskutki na ladinšćinu.

Drježdźany (dpa/SN). Sakski krajny zarjad za dróhotwar a wobchad (LASuV) je přehladku loni spěchowanych projektow za wutwar a polěpšenje kolesowarskich šćežkow a chódnikow kaž tež zjawneho bliskowobchada wozjewił. Dohromady su 213 milionow eurow wudali. Regionalnje pak su srědki jara rozdźělnje zasadźowali. Ze 24 projektami je město Lipsk najbóle ze spěchowanja profitowało. Budyski wo­krjes je z 18 spěchowanymi projektami na druhim městnje. Mjez druhim su z pomocu srědkow 12 elektriskich busow ­kupili a sydom bjezbarjernych busowych zastanišćow na- a přetwarili.

185,8 milionow eurow – najwjetši dźěl spěchowanskich pjenjez – je zarjad za modernizowanje bliskowobchada wudał. Do infrastruktury za kolesowarjow a pěškow je jenož 27,3 miliony eurow in­westował. Jedyn z dohromady dźesać spěchowanych projektow w tutym wobłuku je nowa kolesowanska šćežka mjez Wulkim Šunowom a Jonsdorfom w Zhorjelskim wokrjesu. Mjez jeničce třomi spěchowanymi projektami za pěškow je ponowjenje a wutwar chódnika podłu zwjazkoweje dróhi B6 w Bukecach.

Beirut (dpa/SN). Zwjazkowy prezident Frank-Walter Steinmeier přebywa tuchwilu w Libanonje. Dźensa, druhi dźeń swojeho wopyta, poda so wón do přistawa stolicy, hdźež bě w lěće 2020 žałostna eksplozija wulke škody zawiniła. Tehdy bě wjace hač 220 ludźi swoje žiwjenje přisadźiło, tysacy buchu zranjeni. Zhromadnje ze swojej žonu Elke Büdenbender chce Steinmeier tam kwětki połožić. Jeho přichodny cil je stolica Jordaniskeje, Amman.

Prócowanja lěpje koordinować

Kopenhagen (dpa/SN). Po ekspertizy slědźerjow klimy dyrbi so Europska unija nuznje lěpje na rizika přihotować, kiž su sćěh změny klimy. Wosebje měli prócowanja lěpje koordinować, europska wědomostna přirada za změnu klimy w rozprawje napomina. „Hižo dźensa zawinuja ekstremne wuskutki wjedra a klimy wulke straty po wšej Europje“, rjekny němski předsyda přirady Ottmar Edenhofer. Dźesatki tysacow dočasnych smjertnych padow su jedyn tajki sćěh.

Simson kontra AfD