Würzburg (dpa/SN). We Würzburgu wotměwa so wot dźensnišeho nalětnja hłowna zhromadźizna Němskeje biskopskeje konferency. Zetkanje ma tónkróć wosebity wuznam, dokelž wuzwola biskopja jutře, wutoru, noweho předsydu. Dotalny nawoda Georg Bätzing z Limburga po šěsć lětach w tymle zastojnstwje hižo njenastupi. Wón bu lěta 2020 wuzwoleny zasadźowaše so jasnje za reformy w katolskej cyrkwi. Naposledk pak je spjećowanje přećiwo jeho kursej rozrostło.

Njeje jasne, štó Bätzingej naslěduje, wotpowědni kandidaća njebuchu dotal pomjenowani. Dobre šansy pak přicpěwaja fachowcy biskopam na přikład z Paderborna, Mainza, Essena, Hildesheima abo Fuldy.

Washington (dpa/SN). Po wusudźe najwyšeho sudnistwa USA přećiwo cłownej politice prezidenta Donalda Trumpa spyta Europska unija zhromadnje z druhimi krajemi dokładne sćěhi za globalne hospodarstwo posudźować. W parlamenće EU je so dźensa tohodla europska delegacija za cłowne wuradźowanje mjez USA a EU na wurjadne posedźenje zešła. Nimo toho je zwjazkowy kancler Friedrich Merz (CDU) připowědźił, zo chcył přichodne dny na swojim wopyće we Washingtonje wo cłach USA rěčeć.

W historiskim wusudźe bě najwyše sudnistwo USA Supreme Court minjeny pjatk prezidentej USA zakazało, so na nuzowy zakoń z lěta 1974 powołać, zo móhł krajam za import tworow do USA cła napołožić. Agresiwna cłowna politika je jadrowy element Trumpoweje druheje doby zastojnstwa. Bjezposrědnje po wusudźe wón připowědźi, zo chcył nowe móžnosće wučerpać, zo móhł cła tola hišće wukazać. W mnohich krajach mjeztym pruwuja, kak móhli sej přewjele płaćene cła wot USA wróćo žadać.

Ruska swoje fosilne nošerje energije hižo tak derje zwičnić njemóže

Moskwa (dpa/SN). Ruski eksport wolija bě w januarje po informacijach mjezynarodneje agentury za energiju (IEA) wo 350 000 barrelow snadniši hač hišće w měsacu do toho, hačrunjež China tuchwilu wosebje wjele ruskeho wolija kupuje. Předewšěm Indiska bě w poslednim času jasnje mjenje wolija kupowała. W decembrje móžachu ruske koncerny wolija hišće dwójce telko do Indiskeje předać, w januarje 2025 samo 3,5 razy telko. Zdźěla móža tole z tym rozkłasć, zo EU hižo bencin njekupuje, kotryž su z ruskeho wolija produkowali.

Sportowe zarjadowanja kaž olympiske hry so kóždemu na swójske wašnje do pomjatka zaryja, kiž je event na někajke wašnje sobu dožiwił. Mi nochcedźa na přikład wone spodźiwne kostimy němskeho mustwa z hłowy, kotrež bychu so sportowcam z Łaćonskeje Ameriki lěpje hodźeli. Zo wostanu sportowe wubědźowanja tež při najlěpšej organizaciji wot wjedra wotwisne, pokaza so minjeny štwórtk, jako so po wšej sewjernej Italskej cyły dźeń sněžeše. Njezapomnity wostanje mi tež spodźiwny podhlad, zo su so wšitcy, kotřiž su swój zymski dowol lětsa w Cortinje planowali, olympiskich hrow dla do kónčiny wuwinyli, hdźež běchmy runje my w dowolu. Tam so z ludźimi mjerwješe, zo so samo domoródni dodźiwać njemóžachu. Mjerzaca wostanje na kóždy pad bilanca njedźakownych štwórtych městnow. Žadyn kraj njebě w tym tak „wuspěšny“ kaž Němska. To dawa znajmjeńša nadźiju, zo budźe 2030 w francoskich Alpach lěpje hač lětsa w Italskej. Marko Wjeńka