Wadephul: Ruska NATO njewohroža
Riga (dpa/SN). Ruska njeje tuchwilu žane direktne wohroženje za NATO. Tole je němski wonkowny minister Johann Wadephul (CDU) na nowinarskej konferency w letiskej stolicy Riga rjekł. Do toho bě letiska wonkowna ministerka Baibe Braze z Wadephulom wo aktualnym połoženju na sewjernej kromje teritorija NATO wuradźowała. Wadephul bě sej w rozmołwje z nowinarjemi wěsty, zo sylnosć zapadneje aliancy Rusku wot móžneho nadpada na zapad wotdźeržuje.
Najebać to wonkowny minister potwjerdźi: „Wězo Ruska dale spyta, nas destabilizować. A tole njepřestanje, tež po móžnym měrowym zrěčenju z Ukrainu nic.“
Letiski zarjad za škit wustawy bě rozprawu předpołožił, w kotrejž aktiwity Ruskeje na njedobro kraja naliči. Po tym Ruska wosebje swoje tajne słužby zasadźuje, zo by sabotažne akcije a kampanje za šěrjenje wopačnych informacijow přewjedła. Nimo toho měri so z cyberowymi nadpadami dale a bóle na wulke systemy k wodźenju industrijnych zawodow we wjacorych zapadnych krajach, w rozprawje wěstotnych fachowcow rěka.
Běrokratiju wotstronić?
W Strobicach 33. zapust swjećili
Sakscy separatisća před sudnistwom
Drježdźany (dpa/SN). W procesu přećiwo čłonam pozdatnje militantneje neonacistiskeje skupiny „Sakscy separatisća“ su wjacori prawiznicy wobskorženych dźěło zwjazkoweho statneho rěčnistwa do prašenja stajeli. Statni rěčnicy su skóržbu jenož zapodali, dokelž bě sej politika tole žadała, rjekny Freiburgski prawiznik Dubravko Mandić, kotryž zastupuje ze štyrjomi kolegami Grimmaskeho komunalneho politikarja, druhi dźeń sudniskeho jednanja na wyšim krajnym sudnistwje w Drježdźanach.
Mandić wumjetuje zwjazkowemu statnemu rěčnistwu kaž tež sudnikam, zo wobhladuje wobskorženych jako njepřećelow. Wón rěčeše wo politiskej justicy a wo inscenowanym procesu. Jeho kolega Mike Thümmler bě hižo do toho kritizował, zo su přepytowarjo zaměrnje jenož za negatiwnym materialom pytali a jón znosyli.
Wobskorženych je wosom muži w starobje mjez 22 a 26 lětami. Na wšěch 19 prawiznikow jich zakituje. Zwjazkowe statne rěčnistwo wumjetuje mužam čłonstwo w teroristiskej organizaciji a přihot wulkopřeradniskeho předewzaća.
To a tamne (28.01.26)
Wótriše mjezy alkohola za kolesowarjow, zniženje wudawkow za jězbnu dowolnosć a razniše chłostanje za wužiwanje mobilnych telefonow za wodźidłom – wo tutych temach diskutuja přichodne dny wobchadni sudnicy na zeńdźenju w Goslaru. Tři dny trajace wuradźowanje fachowcow je najwažniše zetkanje wobchadnych fachowcow, hdźež nadźěłaja doporučenja za zakonjedawarja.
Zakaz wužiwanja socialnych medijow za dźěći a młodostnych pod 15 lětami je francoska narodna zhromadźizna nastorčiła. Zapósłancy su wotpowědnemu naćiskej w Parisu přihłosowali. Nowy zakoń předwidźi, małolětnym pod 15 lětami zakazać, wužiwać „internetnu syć, kotruž internetna platforma z onlinowej słužbu poskićuje“. Dokładny tekst chcedźa w senaće, w druhej komorje parlamenta, wuformulować.
Socialny stat ludźom bliši?
Berlin (dpa/SN). Šwižniši, ludźom bliši a transparentniši: Zwjazk, kraje a komuny chcedźa socialny stat zasadnje přerjadować. Tole wuchadźa z naćiska, kotryž su dźensa připołdnju zwjazkowej ministerce za dźěło Bärbel Bas (SPD) přepodali. Centralne elementy kaž wobydlerski pjenjez, dźěćacy pjenjez a bydlenski pjenjez chcedźa w nowym systemje socialneje podpěry zjednoćić. Zasadnje maja socialne posłužby přichodnje spěšnišo a jednorišo přistupne być.
W chorownjach stawkuja
Berlin (dpa/SN). Z warnowanskimi stawkami su přistajeni 22 uniwersitnych chorownjow dźensa w tuchwilnym tarifowym rozestajenju ćišć na dźěłodawarjow w zjawnej słužbje zwyšili. Po informacijach dźěłarnistwa ver.di jutře dale stawkuja. Nuzowe zastaranje pacientow je přiwšěm zaručene. Tarifowe jednanja njejsu dotal žane wuslědki wunjesli. Dźěłarnistwo žada sej sydom procentow wjace mzdy, znajmjeńša pak 300 eurow měsačnje.
Trump: Iran zwólniwy
Zymski wichor je w USA chaotiske poměry zawostajił a sej dotal 30 ...
Zastojnicy ICE wopušća město
Minneapolis (dpa/SN). Po smjertnych wutřělach na 37lětneho maja nětko prěni sobudźěłaćerjo zarjada za imigraciju ICE Minneapolis wopušćić. Tole je měšćanosta Jacob Lawrence Frey po telefonaće z prezidentom USA Donaldom Trumpom zdźělił. Po informacijach medijow ma tež wuwołany nawoda jednotki Gregory Bovino město wopušćić. Jeho nadawki ma dosć zasakły zastupnik knježerstwa Tom Homan přewzać. Tón ma Trumpa běžnje wo najnowšim wuwiću informować.
Ze swojim postupowanjom reaguje Trump tež na hroženja demokratow. Tući chcedźa etat Trumpa w parlamenće blokować, štož móhło dźěło knježerstwa znowa wjacore měsacy zlemić.
Kretschmer waži sej Haseloffa
Njezrozumjenje za lifestyle-debatu
Berlin (dpa/SN). Namjet hospodarskeho křidła CDU/CSU, prawo dźěławych na skrótšeny dźěłowy čas wobmjezować, žněje njezrozumjenje a kritiku. „Za CDU njeje derje, hdyž stajnje zaso twjerdźi, zo ludźo w Němskej dosć njedźěłaja“, rjekny ministerska prezidentka Mecklenburgsko-Předpomorskeje Manuela Schwesig nowinarjam.
Ludźo maja jara rozdźělne přičiny, dźělnočasnje dźěłać. „Stat njesměł tule mjez dobrymi a špatnymi přičinami rozeznawać“, politikarka SPD rjekny. Město toho by wažne było, wuměnjenja za to stworić, zo móža ludźo swoje powołanske a swójbne winowatosće lěpje zwjazać. „Potom by so wjace ludźi za to rozsudźiło, połnočasnje dźěłać.“
Zwjazkowy nutřkowny minister Alexander Dobrindt (CSU) njewěri, zo so namjet zwoprawdźi. „Z toho žadyn politiski program njebudźe“, rjekny Dobrindt w sćelaku ntv. Hospodarske křidło CDU/CSU chce na zjězdźe CDU naćisk zapodać. Wón ma hesło „Žane prawo na dźělne dźěło lifestyla dla!“.
