Choćebuz (dpa/SN). Syć přećiwo prawicarskemu ekstremizmej je minjeny pjatk dwaj ekstremistiskej njeskutkaj wozje­wiła. Jedyn z njeju drje sta so před bydlenjom ewangelskeho fararja w Choće­buzu. Njeznataj chcyštaj fararja zatrašić, kotryž­ so w iniciatiwje ,,Wěste městna na juhu Braniborskeje“ angažuje. Neonacijej wobškodźištaj bydlenske durje duchowneho a nalěpištaj nalěpki z napisom „Piss dich nach Berlin“.

„Nadpad na bydlenje našeho fararja w Choćebuzu mje jara šokěruje“ rjekny ewangelski krajny biskop Christian Stäblein­. „Wot prawicarskich parolow, kiž budźa strach a měrja so přećiwo čłowjeskosći, so cyrkej jasnje wotwobroća“, tak biskop dale. Cyrkej je njeskutk póndźelu wobkrućiła, policija jón přepytuje a pyta za swědkami.

Na samsnej dróze bu w Choćebuzu „antifašistisce aktiwna wosoba“ na kolesu nadběhowana a wusměšowana, tak iniciatiwa „Wěste městna w juhu Braniborskeje“. Prawicarske nadběhi w Choćebuzu jasnje přiběraja. Tež młodźinski klub a alternatiwny­ bydlenski projekt su prawicarjo hižo nadběhowali.

Frankfurt n. M. (dpa/SN). Koncern Lufthansa je póndźelu swoje planowane šmórnjenje lětow na krótkich čarach zahajił. Hač do kónca meje chcedźa 120, hač do oktobra samo 20 000 hospodarsce njerentabelnych lětow wotstronić. Z naprawu zalutuje předewzaće dohromady něhdźe 40 000 tonow kerozina, kotrehož płaćizna je so wot spočatka wójny w Iranje podwojiła.

Trump přiměr podlěši

Washington/Teheran (dpa/SN). US-prezident Donald Trump je přiměr z Iranom w poslednjej mjeńšinje jako podlěšeny deklarował. Na próstwu Pakistana nochce z nadpadami na Iran pokročować, ­doniž wjednistwo w Iranje „dojednany ­namjet“ za zakónčenje wójny njepředpołoži, tak zdźěli na swojim kanalu w socialnych medijach Truth Social. Z mórskej blokadu iranskich přistawow pak chcedźa USA pokročować. Teheran sej podlěšenje přiměra wuprosył njeje, rozprawješe iranska powěsćernja Tasnim.

Castor do Ahausa dojěł