Bywši wobhospodar słowjanskeho hrodźišća w Radušu David Chmelík chce po informacijach „Lausitzer Rundschau“ (LR) nowy internetny portal „Slowjanski Swet Luzyca“ załožić.

Budyšin (SN/VŽ). Najebać dotalne spušćomne rozprawnistwo LR wo wšěch rozestajenjach dokoławokoło Chmelíka je naš wječornik direktnje z nim rěčeć spytał. Tola přez oficialne telefoniske čisło jeho załožby „Slavonic Europe“ njebě nichtó docpějomny. Tohodla smy so pola Hajka Kozela wobhonili, kotryž je nachwilnje za słowjanske hrodźišćo jeho poradźowar skutkował. Kozel pak praji, zo z Chmelíkom hižo hromadźe njedźěła a z nowym projektom ničo činić nima. Chmelik bě drje hrodźišćo wotnajał, dósta pak so bórze do financielnych wušparanjow. Dokelž najenski pjenjez, mzdy a zličbowanki wospjet sčasom zapłaćił njeje, je město Wětošow zrěčenje z nim wupowědźiło. W februaru slědowaše insolwencne jednanje.

London (dpa/SN). Wobydlerjo Šotiskeje a Walesa wola dźensa swoje regionalne parlamenty. Wobydlerjo Jendźelskeje wola nimo toho swojich wobwodnych radow a wjesnjanostow. Eksperća su sej wěsći, zo změja wólby za stronu Labour, kotraž tuchwilu knježi, jara špatne wuslědki. Za premierministra Keira Star­mera móhli wólby rozsudne być, wšako móhła swójska strona jeho při dalšich stratach w nutřkownej politice ze zastojnstwa stłóčić.

Lěto a mjenje wobydlerjow

Drježdźany (dpa/SN). Ličba wobydlerjow budźe w Sakskej přichodne lěta dale spadować. Wotwisne wot toho, kotry model w prognozach wužiwaja, móhło woby­dlerstwo wo 8,2 resp. 15,2 procentaj spadnyć. 2045 by tak 3,71 milionow, resp. 3,43 milionow ludźi w Sakskej by­dliło. W lěće 2024 bě jich hišće 4,04 miliony ludźi. Statistikarjo su tři wšelake modele wuwili, kiž bazuja na datach wuwića ludnosće w lětach 2021 do 2024.

Telko nadawkow kaž 2023