Sydom zranjenych pola Zhorjelca
Policija trjeba wjac prawow
Berlin (dpa/SN). Justicna senatorka Berlina Felor Badenberg (CDU) žada sej wjace prawow za policiju, zo móhła skutkownišo přećiwo ekstremizmej postupować. W sćelaku rbb wona wčera rjekny, zo měli tajne słužby wjace inwestować hač dotal. Za wotkrywanje kriminelnych syćow trjeba policija w digitalnym swěće wjace prawow. „To je wažne, dokelž su prawicarsko-ekstremistiske, lěwicarsko-ekstremistiske a islamistiske skupiny swoje aktiwity w dalokej měrje do digitalneho ruma přepołožili.“
Při tym njeńdźe jenož wo składowanje IP-adresow, Badenberg potwjerdźi. Wěstotne zarjadnišća trjebaja techniku, zo móhli wobrazy na awtomatizowane wašnje wuhódnoćić a lěpje spóznawać.
Z wida justicneje senatorki zjawnosć bój lěwicarskich ekstremistow złahodnja, dokelž „wojuja tute skupiny za dobre zaměry. Druhdy za klimu, druhdy přećiwo prawicarjam a přećiwo rasizmej, druhdy přećiwo namocy stata“. Nastanje zaćišć, zo stat tajke njeskutki milišo posudźuje. „Njeje žanoho dobreho ekstremista“, senatorka rjekny. „W Berlinje so ekstremizm dale a bóle wuwiwa.“
To a tamne (15.01.26)
Z mortwej mandźelskej w jězbnym stole je 80lětny turist na kupje Teneriffa spytał, do swojeje domizny wróćo lećeć. Sobudźěłaćerjam wěstotneje kontrole lětanišća staruška napadny, ćim bóle, dokelž bě jeje ruka hižo cyle zymna. Přiwołany lěkar smjerć žony zwěsći. Zwotkel žona pochadźa a dokal muž z njej chcyše, njeje znate. Hač je 80lětny scyła wědźał, zo jeho žona w stole hižo žiwa njeje, tohorunja njewědźa.
Njesprawnje mordarstwa dla k jastwu zasudźeny Manfred Genditzki dóstanje wot bayerskeho stata 1,3 miliony eurow wotškódnjenja za 13 lět jatby. Tole zdźěla bayerske justicne ministerstwo. Mnichowske krajne sudnistwo měješe lěta 2008 za dopokazane, zo je Genditzki starušku z města Rottach-Egern we wani kupjele zatepił. Po 13 lětach běchu jeho w rewizijnym procesu 2023 wuwinowali. Wot toho časa rěča wo wotškódnjenju.
Budyska narěč: USA na direktnym puću do awtokratije
Budyšin (CS/SN). Přećiwo šćipatej zymje wšak njejsu tepjene ławki w Budyskej tachantskej cyrkwi wjele wuskutkowali. Najebać to je minjeny pjatk wjele ludźi do Božeho domu přišło, dokelž lubjachu sej w zwisku z „Budyskej narěču“ dokładniše informacije wo tym, što so w USA tuchwilu stawa. Za to njejsu lěpšu referentku namakać móhli kaž Cathryn Clüver Ashbrook. Sobudźěłaćerka Bertelsmannoweje załožby je jako dźowka Američanki a němskeho nana we woběmaj towaršnosćomaj doma.
Trump hrozy Teheranej
Teheran/Detroit (dpa/SN). Prezident USA Donald Trump je statne wjednistwo Irana warnował, wobdźělnikow masowych protestow wotprawić. Stanje-li so to, „budźemy jara rozsudźeni jednać“, rjekny republikan telewizijnemu sćelakej CBS News w Detroiće. Jasnišo pak so wón njewupraji. Justica Irana bě do toho procesy přećiwo prěnim zajatym demonstrantam zahajiła.
Söder: Zwjazkowe kraje zjednoćić
Bad Staffelstein (dpa/SN). Zjednoćenje mjeńšich zwjazkowych krajow je sej šef CSU Markus Söder na klawsurje swojeje strony w hornjofrankskim klóštrje Banz žadał. „Trjebamy wjetše kraje a trjebamy mjenje krajow. Njemóže być, zo mamy někotre zwjazkowe kraje, kotrež su lědma hišće žiwjenja kmane a kotrež dyrbi mjez druhim Bayerska financować“, wón rjekny. Nimo toho žada sej wón wot knježerstwa, zo Bonn jako dalše sydło ministerstwow nimo Berlina wotstroni.
Tež minjene lěto přećopło było
Wosobowy ćah ze znajmjeńša 200 pasažěrami je dźensa rano ...
Wjelki třělić bórze lóšo
Haseloff hišće w januaru wotstupi
Rěča wo přichodźe Grönlandskeje
Washington/Berlin (dpa/SN). Danski wonkowny minister Lars Løkke Rasmussen je dźensa we Washingtonje z wonkownym ministrom USA Marcom Rubiom a wiceprezidentom J. D. Vanceom wo přichodźe Grönlandskeje wuradźował. Prezident USA Donald Trump je minjeny čas wospjet wo tym rěčał, zo USA arktisku kupu za swoje narodne wěstotne zajimy trjebaja. Při tym njebě wón wuzamknył, za přiswojenje Grönlandskeje wojerske srědki zasadźić. Grönlandska słuša ludoprawnisce k Danskej. Tam so žadanjam USA dotal raznje spjećuja.
Němski wonkowny minister Johann Wadephul (CDU) na tym wobstawa, zo měli wobydlerjo Grönlandskeje sami wo přichodźe swojeje domizny rozsudźić.
Wobkedźbowarjo z toho wuchadźeja, zo spytaja USA Dansku ze wšelakimi hospodarskimi a zakitowanskimi přilubjenjemi pohnuć, jim kupu přewostajić.
