Berlin (dpa/SN). Lutowanski paket čorno-čerwjeneje koalicije za wudawki w strowotnistwje je wot dźensnišeho z wobstatkom debaty w parlamenće. Ministerka Nina Warken (CDU) wotpowědny namjet zwjazkowemu sejmej předstaji. Z nim chce zakonske chorobne kasy w lěće 2027 wo 16,3 miliardy eurow wotćežić a tak wyšim přidatnym přinoškam zadźěwać. Paralelnje zaběraja so tež zastupjerjo zwjazkowych krajow w zwjazkowej radźe z namjetom. Naćisk předwidźa mjenje wudawkow w lěkarskich praksach, klinikach a w farma-industriji. Na zawěsćenych měrja so wyše připłatki za medikamenty a wobmjezowanja při darmotnym sobuzawěsćenju mandźelskich. Koalicija chce zakoń hač do spočatka lěćneje přestawki wosrjedź julija wobzamknyć. Přećiwo planowanym naprawam ­lutowanja su zastupjerjo cyłeho strowotniskeho systema hižo protestowali. Zwjazkowy kancler Friedrich Merz (CDU) pak je sej hižo žadał, zo njeměli mjenje lutować, hač nětko planowane. Nawopak sej wón samo wuprosy, zo by so potencial zalutowanja hišće powjetšił.