Wólby madźarskeho parlamenta z njedobrym wukóncom za Viktora Orbána a jeho stronu Fidesz maja tež grawěrowace wuskutki za 13 připóznatych narodnych mjeńšinow w kraju. W nowym parlamenće wone ani jeničkeho zapósłanca njezměja.

Za proeuropsku stronu Tisza a jeje nawodu Pétera Magyara wuspěšne njedźelniše wólby w Madźarskej su pozitiwne a negatiwne aspekty madźarskeho mjeńšinoweho prawa wujewili. Na prěni pohlad zdawa so wone jara doprědkarske: Kóžda připóznata mjeńšina ma prawo na zastupjerja w parlamenće. Tele prawo pak mjeńšina hakle ma, registruje-li so wona z t. mj. narodnostnej lisćinu k wólbam. Zo by tutu lisćinu nastajić móhła, dyrbi so znajmjeńša jedyn procent a nic mjenje hač 1 500 wólbokmanych přisłušnikow mjeńšiny za nju wuprajić. W aktualnych wólbach bě so 12 narodnostnych lisćinow registrowało. Ručež jedna z tutych lisćinow jenički wólbny hłós docpěje, smě tak mjenowany narodnostny rěčnik zajimy mjeńšiny, kotraž bě lisćinu zapodała, w parlamenće zastupować. Tutón pak ma w parlamenće jeničce rěčne, nic pak wólbne prawo.