Tel Aviv (dpa). Lěwo-liberalna israelska nowina Haaretz je wčera rozprawu wozjewiła, z kotrejež wuchadźa, zo su Zjednoćene arabske emiraty israelskeho ministerskeho prezidenta Benjamina Netanjahuwa krótko do teroristiskeho nadpada 7. oktobra 2023 wo planach ofensiwy islamistiskeje Hamas informowali. W zdźělence na to skedźbnjeja, zo njeje Netanjahu najebać warnowanja israelske wěstotne zarjady informował.

Israelske knježerstwo rozprawu jako „wopačnu“ wotpokazuje. „Ministerski prezident do 7. oktobra žane warnowanje ze Zjednoćenych arabskich emiratow dóstał njeje“, běrow Netanjahuwa wčera wječor zdźěli.

Inwestigatiwnu rozprawu staj israelskaj žurnalistaj Schlomi Eldar a Ruth Juval napisałoj. Zakładne informacije pochadźeja z jeju rešeršow za knihu wo zastajencach w Gazaskim pasmje a wo tamnišej wójnje. W tutym zwisku staj so z dźesatkami ludźi rozmołwjałoj, mjez druhim z wliwapołnymi politikarjemi Israela a dalšich statow po cyłym swěće.

16 000 ludźi w Běłohrodźe na chowanju Ratka Mladića so wobdźěliło

Běłohród (SN/LuNo). Póndźelu bu w serbiskej stolicy Běłohrodźe něhdyši wojerski general a zasudźeny wójnski złóstnik Ratko Mladić pochowany. W času juhosłowjanskich wójnow běše wón wjeršny rozkazowar a jako tajki tež za ludomordarstwo w Srebrenicy (wjac hač 8 000 morjenych) kaž tež při woblěhowanju Sarajewa (wjac hač 10 000 morjenych) zamołwity.

Pućujo sej domiznu wotkrywać a z dušu wuknyć – dožiwjeja-li tole šulerjo, potom sej nazhonjenja čas swojeho žiwjenja zachowaja. Tak tež dźěći a młodostni, kotřiž su zašłu njedźelu na wopomnjenju za morjene židowske žony w pěskowej jamje w Słonej Boršći pobyli. Móžachu swoje začuća lědma ze słowami wuprajić. Hač pomniki našich wótcow kaž ródny dom Zejlerja w tamnišej wsy, hač Lipjo, po kotrymž bě so Ćišinski wuchodźował, hač Zahor a Kocorej wěnowany pomnik, hač rjadowniska jězba k hatam w Němskich Pazlicach abo twjerdźizna Stołpin, kotraž je na serbsku Łužicu wuprudźała – na tychle městnach posrědkuje so šulerjam wěda, kotruž dźensa we wučbnicach njenańdu. Tola na papjerje duša domiznu runje tak mało začuwa, kaž hdyž wjedźe pućowanski dźeń do serbskich institucijow abo do Drježdźan. Sym swojimaj wučerjomaj knjeni Langerowej a knjezej Mětej dźakowna. Staj mi domiznu zbližiłoj, z čehož wšědnje čerpam. Milenka Rječcyna

Gröden/Urtijëi (SN/MiP). W póndźelnišej nowinskej zdźělence skedźbnja prezident Třěšneho zwjazka Ladinjanow w Dolomitach, Roland Verra, na 80. róčnicu tak mjenowaneho Pariskeho zrěčenja, kotruž tele dny w Južnym Tirolu a Trentinje z wšelakorymi zarjadowanjemi woswjeća. Pariske zrěčenje je mjenujcy zakład za dźensnišu wosebitu awtonomiju regiona. We wobłuku Pariskeje měroweje konferency běštaj je tehdyši awstriski wonkowny minister Karl Gruber a italski ministerski prezident Alcide De Gasperi 5. septembra 1946 podpisałoj. Za dobyćerske strony Druheje swětoweje wójny běše wone tež zakład za to, zo su přisłušnosći Južneho Tirola Italskej přihłosowali.