„Po mojim měnjenju bě to wulki srjedźoeuropski kardinal“, sudźeše zašły tydźeń w Čěskim rozhłosu po smjerći kardinala Dominika Duki znaty a wuznamny nowinar Tomáš Němeček. Jeho słowa su wažniše, hač na prěni pohlad wupada. A su tež kluč do přichoda a k prašenju, hdy zaso Čěska (a z njej Łužica) kardinala změje. Bě-li w minjenych lětdźesatkach mjenujcy za nas samozrozumliwe, zo w Praze kardinal sedźi, kiž so za Serbow samozrozumliwje zajimuje a Serbow rady wopytuje (to je Duka činił, ale tež jeho předchadnik Miloslav Vlk) abo jich w Praze wita (to je činił Vlkowy předchadnik František Tomášek hišće w komunistiskich časach), tole w přichodźe hižo samozrozumliwe njebudźe.