Na forumje w Kamjencu fakty wo porodźerni wozjewili

Kamjenc (SN/MiR). Cyłkownje wosom lěkarjow skutkuje na porodnej a na gynekologiskej staciji Kamjenskeje chorownje swj. Jana. Štyrjom je nawodnistwo hižo wupowědźiło. Dwaj dźěłataj w medicinskim zastaranskim centrumje, ale hač móžetaj tam wostać, njeje jasne. Jedna lěkarka je na probu dźěłała a je wupowědźena, dalša je w staršiskim času. 17 babow a chorobnych sotrow za dźěći ma na druhich stacijach kliniki skutkować. Čas pak wěsći, zo wone po wjetšinje chorownju wopušća. Dalšich dźewjeć chorobnych sotrow z gynekologije ma so po chorowni rozdźělić a tam zaskočić, hdźež maja koleginy nadhodźiny wotbyć. Potom maja wone poskitk jako wupomoc dóstać, dokelž telko swobodnych městnow njeje. Tuž nawodnistwo chorownje z tym liči, zo sej wjetšina druhdźe dźěło pyta.